Odisha Election 2024: ପୁରୀରେ ଚାଲିଛି ଜଗନ୍ନାଥଙ୍କ ଦୁଇ ଆୟୁଧ ଭିତରେ ଯୁଦ୍ଧ

Odisha Election 2024: ଗତ କିଛିଦିନ ହେଲା ଶ୍ରୀ ଜଗନ୍ନାଥଙ୍କୁ କେନ୍ଦ୍ର କରି ପୁରୀ ରାଜନୀତି ସରଗରମ ହୋଇଛି।  ଏପରିକି ବିଜେପି ସଂସଦୀୟ ପ୍ରାର୍ଥୀଙ୍କ ମୁହଁରୁ ‘ମୋଦୀ ଭକ୍ତ’ ଶବ୍ଦ ବାହାରିବା ଏବଂ ତାକୁ ନେଇ ସେ ତିନିଦିନ ଉପବାସ ରହିବେ ବୋଲି ସାମ୍ବାଦିକ ସମ୍ମିଳନୀରେ ଜଣାଇବା ପୁରୀରେ ବେଶ୍‍ ଆଲୋଡ଼ନ ସୃଷ୍ଟି କରିଛି। ଏହାକୁ ବିଜେଡି ଏକ ରାଜନୀତିକ ପ୍ରସଙ୍ଗ କରିଛି। ଜାତୀୟ ଗଣମାଧ୍ୟମରେ ବିଜେଡିର ଦ୍ୱିତୀୟ ଷ୍ଟାର କ୍ୟାମ୍ପେନରଙ୍କ ଇଣ୍ଟରଭ୍ୟୁ ଏହାକୁ ସ୍ପଷ୍ଟ କରୁଛି। ଏ ଭିତରେ ଶ୍ରୀ ଜଗନ୍ନାଥଙ୍କୁ ରାଜନୀତିଠୁ ଦୂରରେ ରଖିବାକୁ ନିବେଦନ କରିଛି ବିଜେଡି। ପ୍ରଶ୍ନ ହେଉଛି, ଶ୍ରୀମନ୍ଦିର ଏବଂ ଶ୍ରୀ ଜଗନ୍ନାଥଙ୍କୁ ରାଜନୀତିଠାରୁ ଦୂରରେ ରଖାଯାଇପାରିବ କି?
ଯୁଗେ ଯୁଗେ ଏହିଠାରୁ ହିଁ ଓଡ଼ିଶା ରାଜନୀତି ଆାରମ୍ଭ ହୋଇ ଆସିଛି। ସେ ଗଜପତି ଶାସନ ପ୍ରତିଷ୍ଠା କଥା କୁହନ୍ତୁ କି ଏହା ପୂର୍ବବର୍ତ୍ତୀ ଗଙ୍ଗବଂଶଙ୍କ ଶାସନ କଥା କୁହନ୍ତୁ ଅଥବା ସ୍ୱାଧୀନତା  ସମୟରେ ରାଜ୍ୟରେ କଂଗ୍ରେସର ପ୍ରଚାର ହେଉ ସବୁକିଛି ଏଇଠୁ ଆରମ୍ଭ ହୋଇଛି।  ଏବେ ବି ବିଜେଡି ସରକାରଙ୍କ ବିଭିନ୍ନ ଯୋଜନା ଶ୍ରୀ ଜଗନ୍ନାଥ ବା  କୌଣସି ଦେବ ଦେବୀଙ୍କ ନାଁରେ ନାମିତ ହୋଇଛି। ଚାଷୀ ପାଇଁ କାଳିଆ, ଦୂରାନ୍ତ ଗମନାଗମନ ପାଇଁ ଲକ୍ଷ୍ମୀ ଏହାର ଗୋଟିଏ ଗୋଟିଏ ଉଦାହରଣ। ଏପରି ପରିସ୍ଥିତିରେ ବିଜେଡିର ନିବେଦନ ରାଜନୀତି ନୁହେଁ କି?
ପୁରୀ ରାଜନୀତିକୁ ଦେଖିଲେ ଏଠାରେ ‘ହାତ’ ଦଳର ସ୍ଥାନ ନାହିଁ। ଲଢ଼େଇ ହେଉଛି ଶ୍ରୀ ଜଗନ୍ନାଥଙ୍କ  ଦୁଇ ଆୟୁଧ ଭିତରେ। ଗୋଟିଏ ଶଙ୍ଖ ଆଉ ଗୋଟିଏ ପଦ୍ମ। ଶ୍ରୀ ଜଗନ୍ନାଥଙ୍କ ଆୟୁଧ ଭାବେ ଶଙ୍ଖ, ଚକ୍ର, ଗଦା ପଦ୍ମ ଶୋଭା ପାଇଥାଏ। ସେହିପରି ବଳଭଦ୍ରଙ୍କ ଆୟୁଧ ହଳ ଲଙ୍ଗଳ ଭାବେ ପରିଚିତ। ୮୦ ଦଶକରେ ହଳ ଲଙ୍ଗଳ ବେଶ୍‍ ପରିଚିତ ହୋଇଥିଲା। ସେତେବଳର ଜନତା ପାର୍ଟି ଏହାକୁ ଚିହ୍ନ ରୂପେ ଗ୍ରହଣ କରିଥିଲା। ଆଜି ତାହା ନିଶ୍ଚିହ୍ନ। ସେହିପରି ଅବସ୍ଥା ଚକ୍ର ଦଳର ବି ହୋଇଛି। ୯୦ ଦଶକରେ ଜନତା ଦଳର ଚିହ୍ନ ହେଲା ଚକ୍ର। ଏବେ ସେ ଦଳ ଆଉ ନାହିଁ। ଲଢ଼େଇ ହେଉଛି ତ ବିଜେଡି ଓ ବିଜେପି ଭିତରେ ଅର୍ଥାତ୍‍ ପଦ୍ମ ଓ ଶଙ୍ଖ ଭିତରେ। 
ସାଂସଦ ପାଇଁ ଲଢ଼େଇ: 
ବିଜେପି ପକ୍ଷରୁ ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ମୈଦାନକୁ ଓହ୍ଲାଇଥିବାବେଳେ ବିଜେଡି ପୂର୍ବତନ ଆଇପିଏସ୍ ତଥା ମୁମ୍ବାଇର ପୂର୍ବତନ ପୁଲିସ କମିଶନର ଅରୂପ ପଟ୍ଟନାୟକଙ୍କ ଉପରେ ବାଜି ଲଗାଇଛି। ସମ୍ବିତ ଗତଥର ବିଜେଡି ପ୍ରାର୍ଥୀ ପିନାକୀ ମିଶ୍ରଙ୍କୁ କଡ଼ା ଟକ୍କର ଦେଇଥିଲେ ମଧ୍ୟ ସାଢ଼େ ୧୧ ହଜାର ଭୋଟରେ ପରାଜିତ ହୋଇଥିଲେ। ଅନ୍ୟପକ୍ଷରେ ଶ୍ରୀ ପଟ୍ଟନାୟକ ଗତଥର ଭୁବନେଶ୍ୱରରୁ ବିଜେଡି ଟିକେଟରେ ନିର୍ବାଚନ ଲଢୁଥିବାବେଳେ ବିଜେପିର ପୂର୍ବତନ ଆଇଏଏସ୍ ଅଧିକାରୀ ଅପରାଜିତା ଷଡ଼ଙ୍ଗୀଙ୍କ ଆଗରେ ତାଙ୍କୁ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା। ଏଥର ବିଜେଡି ତାଙ୍କ ଆସନ ବଦଳାଇ ତାଙ୍କୁ ଭୁବନେଶ୍ୱର ପରିବର୍ତ୍ତେ ପୁରୀରୁ ପ୍ରାର୍ଥୀ କରିବାକୁ ନିଷ୍ପତ୍ତି ନେଇଛି। ଶ୍ରୀ ପଟ୍ଟନାୟକ ମୂଳତଃ ପୁରୀର ବାସିନ୍ଦା। ଏଥର ଜୟନାରାୟଣ ପଟ୍ଟନାୟକ କଂଗ୍ରେସ ପକ୍ଷରୁ ନିର୍ବାଚନ ଲଢ଼ୁଛନ୍ତି। ତେବେ ପୂର୍ବରୁ କଂଗ୍ରେସ ସାମ୍ବାଦିକରୁ ରାଜନେତା ପାଲଟିଥିବା ସୁଚରିତା ମହାନ୍ତିଙ୍କୁ ଟିକେଟ ଦେଇଥିଲା। ଦଳରୁ ପାଣ୍ଠି ମିଳିନଥିବା କହି ଶ୍ରୀ ମହାନ୍ତି ଟିକେଟ୍ ଫେରାଇ ଦେଇଥିଲେ।
କଡ଼ା ମୁକାବିଲା: 
ସ୍ଥାନୀୟ ଲୋକେ ଏଠାରେ ବିଜେଡି ଓ ବିଜେପି ମଧ୍ୟରେ ପ୍ରତିଦ୍ୱନ୍ଦ୍ୱିତାକୁ ବିଚାର କରୁଛନ୍ତି। ବିଜେପିର ସମ୍ବିତ ପାତ୍ରଙ୍କ ପ୍ରତି ଲୋକଙ୍କ ସହାନୁଭୂତି ରହିଛି, ଯେଉଁକାରଣରୁ ସେ ଆଗୁଆ ରହିଛନ୍ତି। ଏହା ପଛର କାରଣ ହେଉଛି ହାରିବା ପରେ ମଧ୍ୟ ପାତ୍ର ୫ ବର୍ଷ ଧରି ପୁରୀବାସୀଙ୍କ ମଧ୍ୟରେ ସକ୍ରିୟ ରହିଥିଲେ। ପୁରୀ ସହରଠାରୁ ଆରମ୍ଭ କରି ଗାଁ ଗାଁ ପର୍ଯ୍ୟନ୍ତ ସେ ସ୍ଥାନୀୟ ଲୋକଙ୍କ ପ୍ରତ୍ୟେକ ସୁଖ ଦୁଃଖ ପହଞ୍ଚିବାକୁ ଯଥାସମ୍ଭବ ଚେଷ୍ଟା କରିଥିଲେ। ହିନ୍ଦୁମାନଙ୍କର ଏହି ମହାତୀର୍ଥ ତଥା ଚାରିଧାମରୁ ଅନ୍ୟତମ ପୁରୀ ଜିତିବା ପାଇଁ ବିଜେପି ଜୋରଦାର ପ୍ରୟାସ ଚଳାଇଛି। ଆସନ୍ତା ୨୦ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁରୀରେ ରୋଡ୍ ଶୋ' କରିଛନ୍ତି। ସାଢ଼େ ପନ୍ଦର ଲକ୍ଷରୁ ଅଧିକ ଭୋଟର ଥିବା ଏହି ପୁରୀ ସଂସଦୀୟ ଆସନରେ ୭ଟି ବିଧାନସଭା ଆସନ ଥିବାବେଳେ ସେଥିରୁ ୫ଟି ବିଜେଡି ଓ ୨ଟି ଆସନ ବିଜେପି ହାତରେ ରହିଛି।
ବିଜେଡି ମଧ୍ୟ ଜୋର ଦେଇଛି:
ନିଜ ଦୁର୍ଗକୁ ବଜାୟ ରଖିବା ପାଇଁ ବିଜେଡି ସବୁ ପ୍ରକାର ଉଦ୍ୟମ କରିଛି। କାଶୀ ଓ ଉଜ୍ଜୈନରେ ପରିକ୍ରମା ମାର୍ଗ ଓ କରିଡର ନିର୍ମାଣ କରି ବିଜେପି ତୀର୍ଥସ୍ଥଳର ସୁବିଧାର ବିକାଶ କରିଛି, ଯାହା ବିଜେଡି ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ସମାନ ଢଙ୍ଗରେ କାମ କରିଛନ୍ତି। ନିର୍ବାଚନ ପ୍ରକ୍ରିୟା ଆରମ୍ଭ ହେବାର କିଛି ସମୟ ପୂର୍ବରୁ ଆରମ୍ଭ ହୋଇଥିବା ଜଗନ୍ନାଥ ମନ୍ଦିରର ପରିକ୍ରମା ମାର୍ଗ ଓ କରିଡରକୁ ବିଜେଡି ଗତ କିଛି ବର୍ଷ ମଧ୍ୟରେ ପ୍ରସ୍ତୁତ କରିଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ହେବାର ମାତ୍ର ୪-୫ ଦିନ ପୂର୍ବରୁ ପରିକ୍ରମା ମାର୍ଗ ଆରମ୍ଭ ହୋଇଥିଲା। ଏଥିପାଇଁ ତିନିଦିନ ଧରି ମନ୍ଦିରରେ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏହି କରିଡର ନିର୍ମାଣ ପରେ ମନ୍ଦିର ଆଖପାଖରେ ଜନଗହଳି ପୂର୍ଣ୍ଣ ଅଞ୍ଚଳ ସମ୍ପୂର୍ଣ୍ଣ ଖୋଲା ହୋଇଯାଇଥିବାବେଳେ ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଭିନ୍ନ ଭିନ୍ନ ମତ ପ୍ରକାଶ ପାଇଛି। ଶ୍ରଦ୍ଧାଳୁଙ୍କ ସୁବିଧାର ଯତ୍ନ ନେଇ ଏହି ପଦକ୍ଷେପ ନିଆଯାଇଥିବା କୁହାଯାଉଛି। ଏହି ନୂଆ ବ୍ୟବସ୍ଥାକୁ ନେଇ କିଛି ଲୋକ ସନ୍ତୁଷ୍ଟ ଥିବାବେଳେ କିଛି ଲୋକ ଅସନ୍ତୋଷ ବ୍ୟକ୍ତ କରିଥିବା ଦେଖିବାକୁ ମିଳିଛି। କାରଣ ଏହି ଅଞ୍ଚଳରେ ଯେଉଁ ରୋଜଗାର ହେବ ତାହା ଆଉ କେଉଁଠି ହୋଇପାରିବ ନାହିଁ। ତେଣୁ ସେମାନଙ୍କୁ ନିଜର ବ୍ୟବସାୟ ବଦଳାଇବାକୁ ପଡ଼ିଛି। ତେବେ ମନ୍ଦିର ଆଖପାଖରେ ରହୁଥିବା ସାଧୁ ସନ୍ଥ ଓ ସ୍ଥାନୀୟ ଲୋକଙ୍କ ମଧ୍ୟରେ ଏହି ନୂଆ ବ୍ୟବସ୍ଥାକୁ ନେଇ କିଛି ଆପତ୍ତି ରହିଛି।