ତେବେ କ'ଣ ବିଗିଡ଼ି ଯିବ ଦ୍ରୌପଦୀ ମୁର୍ମୁଙ୍କ ଖେଳ? ନିର୍ବାଚନ ପ୍ରଚାର ସମୟରେ ଯଶୱନ୍ତ ସିହ୍ନା କଲେ ବଡ଼ ଦାବି

ନୂଆଦିଲ୍ଲୀ: President Election 2022: ରାଷ୍ଟ୍ରପତି ପଦ ପାଇଁ ଚଳିତ ମାସ ଅର୍ଥାତ ଜୁଲାଇ ୧୮ରେ ନିର୍ବାଚନ ଅନୁଷ୍ଠିତ ହେବ । ଏହାର ଫଳାଫଳ ଜୁଲାଇ ୨୧ରେ ବାହାରିବ । ଚଳିତ ରାଷ୍ଟ୍ରପତି ନିର୍ବାଚନରେ ​​ବିଜେପି (BJP) ନେତୃତ୍ୱାଧୀନ ଏନଡିଏ (NDA) ତରଫରୁ ଓଡ଼ିଶାର ପୂର୍ବତନ ମନ୍ତ୍ରୀ, ଝାଡ଼ଖଣ୍ଡର ପୂର୍ବତନ ରାଜ୍ୟପାଳ ତଥା ଆଦିବାସୀ ଚେହେରା ଦ୍ରୌପଦୀ ମୁର୍ମୁ (Draupadi Murmu) ଙ୍କୁ ପ୍ରାର୍ଥୀ କରାଯାଇଛି । ସେପଟେ ବିରୋଧୀ ଦଳଗୁଡ଼ିକ ମିଳିତ ଭାବେ ପୂର୍ବତନ କେନ୍ଦ୍ର ମନ୍ତ୍ରୀ ତଥା ତୃଣମୂଳ କଂଗ୍ରେସ ନେତା ଯଶୱନ୍ତ ସିହ୍ନା (Yashwant Sinha) ଙ୍କୁ ମୈଦାନକୁ ଓହ୍ଲାଛନ୍ତି । ଉଭୟ ପ୍ରାର୍ଥୀ ନିଜ ସପକ୍ଷରେ ସମର୍ଥନ ହାସଲ କରିବାକୁ ଉଦ୍ୟମ ଜୋରଦାର କରିଛନ୍ତି । ଅନେକ ଦଳ ସେମାନଙ୍କର ଆଭିମୁଖ୍ୟ ସ୍ପଷ୍ଟ କରିଛନ୍ତି । ଏହି କ୍ରମରେ ଶୁକ୍ରବାର ଅକାଳୀ ଦଳ ଦ୍ରୌପଦୀ ମୁର୍ମୁଙ୍କ ପାଇଁ ସମର୍ଥନ ଘୋଷଣା କରିଛି ।

ଏହା ମଧ୍ୟରେ ଯଶୱନ୍ତ ସିହ୍ନା ଏକ ସାକ୍ଷାତକାରରେ ଦାବି କରିଛନ୍ତି ଯେ, ନିର୍ବାଚନ ତାରିଖ ସୁଦ୍ଧା ତାଙ୍କ ସପକ୍ଷରେ ଅନେକ ପରିବର୍ତ୍ତନ ଆସିବ । ଏଭଳି ପରିସ୍ଥିତିରେ ପ୍ରଶ୍ନ ଉଠୁଛି ଯେ କ'ଣ ଏହି ପରିବର୍ତ୍ତନ ସହିତ ରାଷ୍ଟ୍ରପତି ନିର୍ବାଚନରେ ​​ଯଶୱନ୍ତ ସିହ୍ନା ଦ୍ରୌପଦୀ ମୁର୍ମୁଙ୍କ ଖେଳକୁ ବିଗାଡ଼ି ପାରିବେ କି? ଯଦି ହଁ ତେବେ ଏହା କିପରି ସମ୍ଭବ ହେବ? କେଉଁ ଦଳଗୁଡ଼ିକ ବର୍ତ୍ତମାନ ପର୍ଯ୍ୟନ୍ତ ଯଶୱନ୍ତ ସିହ୍ନାଙ୍କୁ ସମର୍ଥନ କରିଛନ୍ତି ଓ ଦ୍ରୌପଦୀ ମୁର୍ମୁଙ୍କ ପକ୍ଷରେ କିଏ ଛିଡା ହୋଇଛନ୍ତି? ଆସନ୍ତୁ ଜାଣିବା...

ପ୍ରଥମେ ଜାଣନ୍ତୁ ଯଶୱନ୍ତ ସିହ୍ନା କ’ଣ କହିଛନ୍ତି?

ଯଶୱନ୍ତ ସିହ୍ନା କେରଳରୁ ନିଜର ଅଭିଯାନ ଆରମ୍ଭ କରିଛନ୍ତି । ଏହା ପରେ ସେ ଛତିଶଗଡରେ ପହଞ୍ଚିଛନ୍ତି, ଯେଉଁଠାରେ କଂଗ୍ରେସର ସରକାର ରହିଛି । ଏଠାରେ ତାଙ୍କୁ ଗଣମାଧ୍ୟମ ପଚାରିଥିଲା ​​ଯେ ସେ ନିଜ ବିଜୟକୁ ନେଇ କେତେ ଆଶ୍ୱସ୍ତ ଅଛନ୍ତି? ଏହାର ଜବାବରେ ସେ କହିଛନ୍ତି ଯେ, ନିର୍ବାଚନ ପର୍ଯ୍ୟନ୍ତ ଅନେକ ସମୀକରଣ ବଦଳିଯିବ । କେବଳ ଏହାକୁ ଦେଖନ୍ତୁ । ଏହା ପୂର୍ବରୁ ନିଜର ନାମାଙ୍କନ ପତ୍ର ଦାଖଲ ସମୟରେ ମଧ୍ୟ ସିହ୍ନା ନିଜ ବିଜୟକୁ ନେଇ ବିଶ୍ୱାସ ବ୍ୟକ୍ତ କରିଥିଲେ ।

ଯଶୱନ୍ତ ସିହ୍ନାଙ୍କୁ କେଉଁ କେଉଁ ଦଳ କରୁଛନ୍ତି ସମର୍ଥନ?

କଂଗ୍ରେସ, ଏନସିପି, ଟିଏମସି, ସିପିଆଇ, ସିପିଆଇ (ଏମ) ସମାଜବାଦୀ ପାର୍ଟି, ଆରଏଲଡି, ଆରଏସପି, ଟିଆରଏସ, ଡିଏମକେ, ନ୍ୟାସନାଲ କନଫରେନ୍ସ, ସିପିଆଇ, ଆରଜେଡି, କେରଳ କଂଗ୍ରେସ (ଏମ) ଭଳି ଅନେକ ଦଳ ଯଶୱନ୍ତ ସିହ୍ନାଙ୍କୁ ସମର୍ଥନ କରୁଛନ୍ତି । ଅର୍ଥାତ ଯଶୱନ୍ତଙ୍କ ପାଖରେ ବର୍ତ୍ତମାନ ପ୍ରାୟ ୩ ଲକ୍ଷ ୮୯ ହଜାର ମୂଲ୍ୟର ଭୋଟ୍ ଅଛି । କେରଳର ବଡ଼ ଓ ଛୋଟ ସମସ୍ତ ଦଳ କେବଳ ଯଶୱନ୍ତ ସିହ୍ନାଙ୍କୁ ସମର୍ଥନ କରିଛନ୍ତି । ଏଭଳି ପରିସ୍ଥିତିରେ ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁ ଏଠାରୁ ଗୋଟିଏ ବି ଭୋଟ୍ ପାଇ ନ ପାରନ୍ତି ।

ଏହା ବି ପଢ଼ନ୍ତୁ:-ଶିବସେନାରେ ପୁଣି ବିଦ୍ରୋହ, ଏକନାଥ ସିନ୍ଦେଙ୍କ ପୁଅ ଶ୍ରୀକାନ୍ତଙ୍କ ସମେତ ୧୪ ଜଣ ସାଂସଦ ଛାଡ଼ିବେ ଦଳ!

ଏହା ବି ପଢ଼ନ୍ତୁ:-କହ୍ନେୟା ଲାଲ ହତ୍ୟା ମାମଲାରେ ଅଭିଯୁକ୍ତ ରିୟାଜ ଅଟାରୀର ବିଜେପି ନେତାଙ୍କ ସହ ରହିଛି ସମ୍ପର୍କ!

ଏହା ବି ପଢ଼ନ୍ତୁ:-ମହାରାଷ୍ଟ୍ର ପରେ ଏବେ ଝାଡ଼ଖଣ୍ଡର ପାଳି? କଂଗ୍ରେସକୁ ଏଠାରେ ମଧ୍ୟ ଲାଗିବ ଝଟକା!

କେଉଁ କେଉଁ ଦଳ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରୁଛନ୍ତି?

ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁ ଶନିବାର ଠାରୁ ପ୍ରଚାର ଆରମ୍ଭ କରିଛନ୍ତି । ବିଜେପି ବ୍ୟତୀତ ମୁର୍ମୁଙ୍କୁ ବର୍ତ୍ତମାନ ପର୍ଯ୍ୟନ୍ତ ବିଜେଡି, YSR କଂଗ୍ରେସ, ଜନତା ଦଳ ସେକୁଲାର, ଶିରୋମନି ଅକାଳୀ ଦଳ, ଜେଡିୟୁ, ଏଆଇଏଡିଏମକେ, ଲୋକ ଜନ ଶକ୍ତି ପାର୍ଟି, ଆପନା ଦଳ (ସୋନେଲାଲ), ନିଷାଦ ପାର୍ଟି, ବହୁଜନ ସମାଜ ପାର୍ଟି, ରିପବ୍ଲିକାନ ପାର୍ଟି ଅଫ୍ ଇଣ୍ଡିଆ (ଅଠାୱଲେ), NPP, NPF, MNF, NDPP, SKM, AGP, PMK, AINR କଂଗ୍ରେସ, ଜନନାୟକ ଜନତା ପାର୍ଟି, UDP, IPFT, UPPL ପରି ଦଳଗୁଡିକ ସମର୍ଥନ ଦେଇଛନ୍ତି । ବିରୋଧୀ ସତ୍ତ୍ୱେ ବିଜେଡି, YSR କଂଗ୍ରେସ, ଜନତା ଦଳ ସେକୁଲାର, ଅକାଳୀ ଦଳ ଏବଂ ବହୁଜନ ସମାଜ ପାର୍ଟି ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିଛନ୍ତି । ଏହି ସମସ୍ତଙ୍କ ପାଖରେ ୬ ଲକ୍ଷରୁ ଅଧିକ ମୂଲ୍ୟର ଭୋଟ୍ ଅଛି ।

ତେବେ ଏହି ଦଳଗୁଡ଼ିକରୁ ଯଶୱନ୍ତଙ୍କ ଭରସା?

ରାଷ୍ଟ୍ରପତି ନିର୍ବାଚନ ପାଇଁ ଅଧିକାଂଶ ପ୍ରମୁଖ ଦଳ ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି । କିନ୍ତୁ କିଛି ଦଳର ସ୍ଥିତି ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ପଞ୍ଜାବ ଓ ଦିଲ୍ଲୀରେ ଆମ୍ ଆଦମୀ ପାର୍ଟିର ସରକାର ଅଛି । ସେଠାରେ ଆପର ମଧ୍ୟ ୧୦ ଜଣ ରାଜ୍ୟସଭା ସାଂସଦ ଅଛନ୍ତି । ବର୍ତ୍ତମାନ ପର୍ଯ୍ୟନ୍ତ ଆମ୍ ଆଦମୀ ପାର୍ଟି ରାଷ୍ଟ୍ରପତି ନିର୍ବାଚନ ସମ୍ପର୍କରେ କିଛି ସ୍ପଷ୍ଟ କରିନାହିଁ ।

ଏହା ବ୍ୟତୀତ ଟିଡିପି, ଜେଏମଏମ ମଧ୍ୟ ଏପର୍ଯ୍ୟନ୍ତ ନିଜର ସ୍ଥିତି ସ୍ପଷ୍ଟ କରିନାହାଁନ୍ତି । ଶିବସେନାରେ ମଧ୍ୟ ଆଭ୍ୟନ୍ତରୀଣ କଳହ ଯୋଗୁଁ କୌଣସି ପ୍ରାର୍ଥୀ ସମର୍ଥନ ଘୋଷଣା କରିନାହିଁ । ତେବେ ବିଜେପି ସହ ସରକାର ଗଠନ କରୁଥିବା ବିଧାୟକ ତଥା ଅଧିକାଂଶ ସାଂସଦ ଏନଡିଏ ପ୍ରାର୍ଥୀଙ୍କୁ ସମର୍ଥନ କରିପାରନ୍ତି ।

ଏଭଳି ପରିସ୍ଥିତିରେ ଯଶୱନ୍ତ ସିହ୍ନା ଆମ୍ ଆଦମୀ ପାର୍ଟି, ଟିଡିପି ଏବଂ ଜେଏମ୍ଏମ୍ ଠାରୁ ବହୁତ ଆଶା ରଖିଛନ୍ତି । ଯଦି ଏହି ଦଳଗୁଡିକ ସିହ୍ନାଙ୍କୁ ସମର୍ଥନ କରନ୍ତି, ତେବେ ସେ ଦ୍ରୌପଦୀ ମୁର୍ମୁଙ୍କ ନିକଟତର ହୋଇପାରନ୍ତି ।

ବୁଝନ୍ତୁ ଗଣିତ

ରାଷ୍ଟ୍ରପତି ନିର୍ବାଚନରେ ​​ଉଭୟ ଗୃହର ନିର୍ବାଚିତ ସାଂସଦ, ସମସ୍ତ ରାଜ୍ୟର ବିଧାୟକ ଏବଂ ବିଧାନ ପରିଷଦର ସଦସ୍ୟମାନେ ଭୋଟ୍ ଦେଇଥାନ୍ତି । ସେମାନଙ୍କର ଭୋଟର ମୋଟ ମୂଲ୍ୟ ହେଉଛି ୧୦ ଲକ୍ଷ ୮୬ ହଜାର ୪୩୧ । ଏହିପରି, ଜିତିବା ପାଇଁ ଅଧାରୁ ଅଧିକ ଭୋଟ୍ ଆବଶ୍ୟକ । ଅର୍ଥାତ୍ ପ୍ରାର୍ଥୀଙ୍କୁ ଜିତିବା ପାଇଁ ଅତି କମରେ ୫ ଲକ୍ଷ ୪୩ ହଜାର ୨୧୬ ଭୋଟ୍ ଆବଶ୍ୟକତା ରହିଛି । ବର୍ତ୍ତମାନ ବିଜେପି ପାଖରେ ପ୍ରାୟ ୬ ଲକ୍ଷ ମୂଲ୍ୟର ଭୋଟ୍ ରହିଛି । ଏହାର ଅର୍ଥ ହେଉଛି ବିଜୟ ପାଇଁ ଆବଶ୍ୟକ ଭୋଟ୍ ଠାରୁ ଅଧିକ, ଯେତେବେଳେ କି ଯଶୱନ୍ତ ସିହ୍ନାଙ୍କ ପାଖରେ ପ୍ରାୟ ୩ ଲକ୍ଷ ୮୯ ହଜାର ଭୋଟ ରହିଛି । ଏହାର ଅର୍ଥ ବିଜୟ ପାଇଁ ସ୍ଥିର ଭୋଟ୍ ମୂଲ୍ୟଠାରୁ ପ୍ରାୟ ଦେଢ଼ ଲକ୍ଷ କମ୍ । ଏଭଳି ପରିସ୍ଥିତିରେ ବର୍ତ୍ତମାନ ପର୍ଯ୍ୟନ୍ତ ଦୃଶ୍ୟମାନ ହେଉଥିବା ପରିସଂଖ୍ୟାନ ସ୍ପଷ୍ଟ ଭାବରେ ଦର୍ଶାଉଛି ଯେ ଦ୍ରୌପଦୀ ମୁର୍ମୁ ଐତିହାସିକ ବିଜୟ ଆଡକୁ ଅଗ୍ରସର ହେଉଛନ୍ତି ।