Maldives: ડખા પછી સાવ સસ્તુ થઈ ગયું માલદીવ, ભારે પડ્યો મોદીનો લક્ષદ્વીપ દાવ

India vs Maldives: વડાપ્રધાન નરેન્દ્ર મોદીની લક્ષદ્વીપની મુલાકાત બાદ માલદીવની ટીપ્પણીનો વિવાદ હવે ખોટમાં ફેરવાઈ રહ્યો છે. ભારતીયોને આકર્ષવા માટે માલદીવે ત્યાં જવાનો ખર્ચ અડધો કરી દીધો છે, છતાં કોઈ જતું નથી. અહીં લક્ષદ્વીપ અંગેના સર્ચમાં 34 ટકાનો વધારો થયો છે. એક ભૂલની સજા કેટલી આકરી હોઈ શકે છે તેનું જીવંત ઉદાહરણ માલદીવ છે. ભારતીયો પર અભદ્ર ટિપ્પણી કર્યા બાદ માલદીવે પોતાની ભૂલ સુધારવાનો પૂરો પ્રયાસ કર્યો હતો, પરંતુ મામલો હાથમાંથી નીકળી રહ્યો છે. લક્ષદ્વીપ અને માલદીવની આ લડાઈમાં કોઈ સ્પર્ધા જ ના હોય તેવું લાગી રહ્યું છે. પરિસ્થિતિને સંભાળવા માટે માલદીવે ત્યાં મુસાફરીનો ખર્ચ અડધો કરી દીધો છે, તેમ છતાં ભારતીયો પ્રવાસીઓએ હવે લક્ષદ્વીપમાં જ વિકલ્પો શોધવાનું શરૂ કર્યું છે અને ઓનલાઈન પોર્ટલ પર તેની સર્ચમાં 3,400 ટકાનો વધારો થયો છે.

આ સમગ્ર વિવાદ પહેલાં માલદીવ ભારતીયોના મનપસંદ પ્રવાસન સ્થળોમાંનું એક હતું. દર વર્ષે લાખો ભારતીયો ત્યાં આવતા હતા. માલદીવે પોતે કહ્યું છે કે તેના 44,000 પરિવારો હવે મુશ્કેલીમાં છે. ભારત અને ભારતીયો વચ્ચેની નારાજગીને કારણે તેના પ્રવાસન ઉદ્યોગ પર ખરાબ અસર પડી છે. ઓનલાઈન ટ્રાવેલ પોર્ટલ પર પણ લોકોએ માલદીવની મુલાકાત લેવાના વિકલ્પો શોધવાનું બંધ કરી દીધું છે. 

આંકડાઓ તમને આશ્ચર્યચકિત કરશે-
MakeMyTrip, જે પોર્ટલ ઓનલાઈન ટ્રાવેલ બુકિંગ માર્કેટ પર 50 ટકાથી વધુ નિયંત્રણ ધરાવે છે, તેણે કહ્યું કે છેલ્લા એક સપ્તાહમાં લક્ષદ્વીપ માટે પૂછપરછમાં 3,400 ટકાનો વધારો થયો છે. પ્રવાસીઓની ઉદાસીનતા જોઈને અને તેમને આકર્ષવા માટે ટ્રાવેલ એજન્ટોએ માલદીવની મુલાકાતનો ખર્ચ પણ 40 ટકા ઘટાડી દીધો છે.

માલદીવ પેકેજની કિંમત કેટલી?
ટાઈમ્સ ઓફ ઈન્ડિયાના અહેવાલ મુજબ, તેલંગાણાની રાજધાની હૈદરાબાદથી માલદીવ સુધીનું 3 દિવસનું પેકેજ જે પહેલા 70 હજાર રૂપિયા સુધીનું હતું તે હવે ઘટીને 45 હજાર રૂપિયા થઈ ગયું છે. કેટલાક ટ્રાવેલ એજન્ટ આના કરતા પણ ઓછા ભાવે માલદીવની મુલાકાત લેવાની ઓફર કરી રહ્યા છે. MakeMyTrip વેબસાઈટ અનુસાર, માલદીવમાં પહેલા 3 દિવસ અને 4 રાતનું પેકેજ જે રૂ. 2,29,772 હતું, તે હવે ઘટીને રૂ. 1,31,509 થઈ ગયું છે. આમાં બંને તરફની ફ્લાઈટ્સનો ખર્ચ પણ સામેલ છે. સમાન સમયગાળાનું બીજું પેકેજ જે અગાઉ રૂ. 2.03 લાખનું હતું, તે હવે ઘટીને રૂ. 1,16,258 થયું છે.

ફ્લાઇટના ભાડા પણ થયા ઓછા-
એવું નથી કે માત્ર ટૂર પેકેજમાં જ ઘટાડો થયો છે. ભારતથી માલદીવની ફ્લાઈટના ભાડામાં પણ ઘટાડો થયો છે. જે ભાડું પહેલા 20 હજાર રૂપિયા વન વે હતું તે હવે ઘટીને 12 થી 15 હજાર રૂપિયા થઈ ગયું છે. MakeMyTrip વેબસાઇટ પર, દિલ્હીથી માલદીવનું ભાડું માત્ર 8,215 રૂપિયા બતાવવામાં આવ્યું છે, તે પણ 17 જાન્યુઆરીએ. જો તમે આ તારીખે દિલ્હી-ચેન્નઈનું ભાડું જુઓ તો તે 8,245 રૂપિયા છે.

પ્રવાસીઓમાં ભારતીયોની સંખ્યા સૌથી વધુ-
જો માલદીવના કુલ પ્રવાસન ઉદ્યોગની વાત કરીએ તો અહીં ભારતીયોની સંખ્યા સૌથી વધુ જોવા મળે છે. વર્ષ 2023માં માલદીવની મુલાકાતે આવેલા કુલ 18.42 લાખ પ્રવાસીઓમાં ભારતીયોની સંખ્યા 11.2 ટકા હતી, જ્યારે રશિયા 11.1 ટકા સાથે બીજા ક્રમે છે. દર અઠવાડિયે ભારતથી માલદીવ સુધી દરરોજ લગભગ 60 ફ્લાઇટ્સ ઓપરેટ થાય છે. એર ઈન્ડિયા, વિસ્તારા, ઈન્ડિગો, એર ઈન્ડિયા એક્સપ્રેસ જેવી એરલાઈન્સ માલદીવ માટે ફ્લાઈટ્સ પૂરી પાડે છે. જો કે, નવીનતમ વિવાદ હોવા છતાં, આ એરલાઇન્સે હજુ સુધી તેમની ફ્લાઇટ્સ રદ કરી નથી.

રોજનું 8.64 કરોડનું નુકસાન-
તાજેતરના વિવાદ બાદ માલદીવ દરરોજ મોટી રકમની આવક ગુમાવી રહ્યું છે. 2023માં વિશ્વની મુસાફરી કરનારા ભારતીયોની સંખ્યામાં ઝડપથી વધારો થયો છે અને 2030 સુધીમાં, ભારત ચોથા સ્થાને પહોંચી શકે છે. ગયા વર્ષે જ ભારતીયોએ માલદીવમાં $380 મિલિયન (આશરે રૂ. 3,152 કરોડ) ખર્ચ્યા હતા. મતલબ કે જો ભારતીયો ત્યાં જવાનું બંધ કરશે તો માલદીવને રોજનું 8.6 કરોડ રૂપિયાનું નુકસાન થઈ શકે છે.