'આ વિજય પછી અમને કોઈ અહંકાર નથી' : કર્ણાટક પેટાચૂંટણીમાં જીત બાદ કુમારસ્વામી

નવી દિલ્હીઃ કર્ણાટકમાં ત્રણ લોકસભા અને બે વિધાનસભા બેઠક પર થયેલી પેટાચૂંટણીના મંગળવારના પરિણામ બાદ કોંગ્રેસ-જેડીએસ ગઠબંધનને જે સફળતા મળી છે તેનાથી ઉત્સાહિત રાજ્યના મુખ્યમંત્રી કુમારસ્વામીએ જણાવ્યું કે, 'આ વિજય લોકોનો અમારા અંદર વિશ્વાસ દર્શાવે છે અને આ વિજયથી અમારામાં કોઈ અહંકાર આવ્યો નથી.' સાથે જ તેમણે રાજ્યની 28 લોકસભા બેઠકોપર આગામી સામાન્ય ચૂંટણીમાં પણ વિજય મેળવવાનું લક્ષ્ય જણાવ્યું હતું. 

પત્રકારો સાથે વાતચીતમાં કુમારસ્વામીએ જણાવ્યું કે, 'હું રાજ્ય અને કેન્દ્રમાં કોંગ્રેસના નેતાઓને અભિનંદન પાઠવું છું. સાથે જ જેડીએસના રાજ્યના નેતાઓ અને કાર્યકર્તાઓ, જેમણે આ વિજયમાં મહત્વનું યોગદાન આપ્યું છે. ભાજપે જેડીએસ-કોંગ્રેસ ગઠબંધનને અપવિત્ર મૈત્રી જણાવી હતી, પરંતુ તેમની એ દલીક આજે ખોટી સાબિત થઈ છે.'

તેમણે વધુમાં જણાવ્યું કે, 'ચૂંટણીનો હજુ તો આ પ્રથમ તબક્કો જ હતો. રાજ્યમાં લોકસભાની 28 બેઠક છે. અમે કોંગ્રેસની સાથે મળીને આ તમામ બેઠકો જીતીશું અને આ જ અમારું લક્ષ્ય છે. આ માત્ર દાવો નથી, કેમ કે અમે આજે જે વિજય મેળવ્યો છે એ બાબત દર્શાવે છે કે લોકોને અમારામાં સંપૂર્ણ વિશ્વાસ છે. આ વિજયથી અમારા અંદર જરા પણ અહંકાર આવ્યો નથી.'

મુખ્યમંત્રીએ વધુમાં જણાવ્યું કે, "મેં ક્યારેય એવું કહ્યું નથી કે ટીપુ જયંતી માનવો કે ન મનાવો. અમે એટલું જ કહેવું હતું કે આ દેશમાં અસંખ્ય સમુદાય રહે છે અને લોકો પોતાના નેતાઓની જયંતી માનવા માગે છે. જો તેઓ (ભાજપ) ઉત્સવનો ભાગીદાર બનવા માગતા નથી તો તેમણે તેમાં ભાગ લેવાની ક્યારેય જૂર નથી."