હવે ટ્રાફિકના નિયમોનો ભંગ કર્યો તો ભારે પડશે, રાજ્યમાં એક મહિનો ચાલશે મેગા ડ્રાઇવ, DGP નો આદેશ

હિતલ પારેખ, ગાંધીનગરઃ અમદાવાદમાં બુધવાર-ગુરૂવારની મધ્ય રાત્રીએ ઈસ્કોન બ્રિજ પર થાર અને એક ટ્રક વચ્ચે અકસ્માત સર્જાયો હતો. આ અકસ્માત બાદ પોલીસ જવાન, હોમગાર્ડ જવાન અને કેટલાક લોકો મદદ માટે ત્યાં આવ્યા હતા. આ દરમિયાન તથ્ય પટેલ નામનો 19 વર્ષીય યુવક 142 કરતા વધુની સ્પીડે જગુઆર કાર લઈને આવે છે અને ત્યાં ઉભેલા લોકોને ટક્કર મારી દે છે. આ દુર્ઘટનામાં 10 લોકોના મોત થયા હતા. આ અકસ્માતના પડઘા સમગ્ર રાજ્યમાં પડ્યા હતા. આ દુર્ઘટના બાદ સરકાર પણ સફાળી જાગી છે. 

ટ્રાફિકનો નિયમ ભંગ કરનારા વિરુદ્ધ કાર્યવાહીના આદેશ
અમદાવાદમાં કાર ચાકલ દ્વારા 10 લોકોને મોતને ઘાટ ઉતારી દેવાની ઘટનાની રાજ્ય સરકાર દ્વારા ગંભીર નોંધ લેવામાં આવી છે. હવે રાજ્યના પોલીસ વડા વિકાસ સહાયે તમામ જિલ્લા પોલીસ વડાઓને ટ્રાફિકના નિયમોનો ભંગ કરનાર વિરુદ્ધ ખાસ ડ્રાઇવ ચલાવવાનો આદેશ આપ્યો છે. હવે રાજ્યમાં ઓવર સ્પીડિંગથી વાહન ચલાવતા કે ટ્રાફિકના નિયમોનો ભંગ કરતા લોકો વિરુદ્ધ કડક કાર્યવાહી કરવામાં આવશે. 

આ પણ વાંચોઃ જૂનાગઢમાં બિલ્ડિંગ પડવાની ઘટનામાં મૃત્યુઆંક વધ્યો, અત્યાર સુધી ચાર લોકોના મોત

એક મહિનો ચાલશે ડ્રાઇવ
ઈસ્કોન બ્રિજ અકસ્માતના ઘેરા પ્રત્યાઘાત પડ્યા છે. આ દુર્ઘટના બાદ ટ્રાફિક પોલીસની કાર્યવાહી સામે પણ સવાલો ઉઠ્યા હતા. હવે રાજ્યના ડીજીપીએ ખાસ આદેશ આપ્યો છે. રાજ્યના તમામ જિલ્લાઓમાં એક મહિનો ટ્રાફિક ડ્રાઇવ ચલાવવામાં આવશે. આ દરમિયાન લાયસન્સ, હેલમેટ કે ઓવર સ્પીડમાં જતા લોકો વિરુદ્ધ કાર્યવાહી કરવામાં આવશે. 

તમામ ડોક્યૂમેન્ટ હોય તો જ નિકળજો
જો તમે પણ લાયસન્સ, આરસી બુક, પીયુસી, હેલમેટ વગર વાહન ચલાવતા હોવ તો ખાસ ધ્યાન રાખજો. રાજ્યના ડીજીપીએ તમામ જિલ્લા પોલીસ અધિકારીઓને ખાસ સૂચના આપી છે. જો ટ્રાફિકના નિયમોનો ભંગ કરતા ઝડપાશો તો ફરજીયાત દંડ ભરવો પડશે. આ માટે કોઈની ભલામણ ચાલશે નહીં. 

લેટેસ્ટ ન્યૂઝથી અપડેટ રહેવા માટે અમારી Zee 24 Kalak App ડાઉનલોડ કરો, અમારી સાથે જોડાઓ : facebook | twitter | youtube