മോളിവുഡിനെ ലോക സിനിമയ്ക്ക് മുന്നിലേയ്ക്ക് കൈപിടിച്ചുയര്‍ത്തുകയാണ് ബ്ലെസി സംവിധാനം ചെയ്ത ആടുജീവിതം. പൃഥ്വിരാജ് എന്ന നടന്റെ അത്ഭുതകരമായ പകര്‍ന്നാട്ടം ലോകമെമ്പാടുമുള്ള സിനിമാ പ്രേമികളെ അമ്പരപ്പിച്ചിരിക്കുകയാണ്.
Blessy about Aadujeevitham cast: ബ്ലെസിയുടെ നീണ്ട 16 വര്‍ഷത്തെ പ്രയത്‌നത്തിനൊടുവിലാണ് ബെന്യാമിന്റെ ആടുജീവിതം എന്ന നോവല്‍ സിനിമയായത്. ഇതിനായി പൃഥ്വിരാജ് നടത്തിയ ട്രാന്‍സ്ഫമേഷന്‍ വലിയ ചര്‍ച്ചയായിരുന്നു.
ആമിര്‍ ഖാന്‍, വിക്രം എന്നിവരാണ് ഇന്ത്യന്‍ സിനിമയില്‍ തന്നെ കഥാപാത്രത്തിന് വേണ്ടി ശാരീരികമായി വലിയ മാറ്റങ്ങള്‍ വരുത്താറുള്ളത്. ഇവര്‍ക്കിടയിലേയ്ക്കാണ് മലയാളത്തില്‍ നിന്ന് പൃഥ്വിരാജ് നടന്നുകയറിയിരിക്കുന്നത്.
ശരീരഭാരം 31 കിലോ കുറച്ചാണ് പൃഥ്വിരാജ് നജീബ് എന്ന കഥാപാത്രമായി മാറിയത്. ഇതിന് 7 മാസം സമയമെടുത്തിരുന്നു. എന്നാല്‍ നജീബാകാന്‍ ബ്ലെസി പൃഥ്വിരാജിനെ ആയിരുന്നില്ല ആദ്യം സമീപിച്ചത് എന്നതാണ് വാസ്തവം.
തമിഴ് താരങ്ങളായ വിക്രമിനെയും സൂര്യയെയുമാണ് ബ്ലെസി ആദ്യം സമീപിച്ചത്. എന്നാല്‍ ഇരുവര്‍ക്കും സാധിക്കാതെ വന്നതോടെയാണ് ഈ കഥാപാത്രം പൃഥ്വിരാജിലേയ്ക്ക് എത്തിയത്. ബ്ലെസി തന്നെയാണ് ഇക്കാര്യങ്ങള്‍ വെളിപ്പെടുത്തിയത്.
ആടുജീവിതം ചെയ്യാന്‍ വിക്രമിന് താത്പ്പര്യമുണ്ടായിരുന്നെന്ന് ബ്ലെസി പറഞ്ഞു. എന്നാല്‍, നീണ്ട ഷെഡ്യൂളും ശങ്കര്‍ ചിത്രത്തിന് വേണ്ടി അദ്ദേഹം വലിയൊരു ഷെഡ്യൂള്‍ മാറ്റിവെച്ചതും കാരണമാണ് വിക്രമിന് ഈ സിനിമ ചെയ്യാന്‍ പറ്റാതായത്.
വാരണം ആയിരം എന്ന ചിത്രത്തിന് വേണ്ടി വലിയ ശാരീരിക മാറ്റങ്ങള്‍ വരുത്തുകയും വീണ്ടും പഴയ നിലയിലേയ്ക്ക് എത്തുകയും ചെയ്ത സമയത്താണ് സൂര്യയെ സമീപിച്ചത്. അതിനാല്‍ വീണ്ടും ശാരീരിക മാറ്റങ്ങള്‍ വരുത്താന്‍ അദ്ദേഹത്തിന് കഴിയില്ലായിരുന്നുവെന്നും അങ്ങനെയാണ് ചിത്രം ഉപേക്ഷിച്ചതെന്നും ബ്ലെസി കൂട്ടിച്ചേര്‍ത്തു.
അതിവേഗം 50 കോടി ക്ലബിലെത്തുന്ന മലയാള ചിത്രം എന്ന നേട്ടം സ്വന്തമാക്കിയ ആടുജീവിതം തിയേറ്ററുകളില്‍ കുതിപ്പ് തുടരുകയാണ്. റിലീസ് ചെയ്ത് 3-ാം ദിനം തന്നെ ചിത്രം 50 കോടി എന്ന നേട്ടം സ്വന്തമാക്കിയിരുന്നു. ചിത്രത്തിന്റെ ബജറ്റ് 82 കോടിയാണെന്ന് ബ്ലെസി അടുത്തിടെ വെളിപ്പെടുത്തിയിരുന്നു.
