Monkey Pox Mutation: വാനര വസൂരി വൈറസിന് പ്രതീക്ഷിച്ചതിൽ കൂടുതൽ ജനിതക വകഭേദങ്ങളെന്ന് പഠനം

വാനര വസൂരിക്ക് കാരണമാകുന്ന വൈറസിന് സാധാരണ കാണുന്നതിലും  കൂടുതൽ ജനിതക വകഭേദങ്ങൾ സംഭവിച്ചുവെന്ന് പഠനം കണ്ടെത്തി. വാനര വസൂരി വൈറസിന്റെ ജനിതക മേക്കപ്പിൽ ശാസ്ത്രഞ്ജർ വിശദമായ പഠനം നടത്തി. പോർച്ചുഗലിലെ നാഷണൽ ഇൻസ്റ്റിറ്റ്യൂട്ട് ഓഫ് ഹെൽത്തിലെ ഗവേഷകർ പറയുന്നതനുസരിച്ച് 50 ലധികം മ്യൂറ്റേഷൻ സംഭവിച്ചു കഴിഞ്ഞതായി കണ്ടെത്തി.

2018 - 2019 കാലയളവിൽ കണ്ടെത്തിയ വൈറസുമായി നടത്തിയ താരതമ്യ പഠനത്തിലാണ് 50 ഓളം മ്യൂറ്റേഷൻ നടന്നിട്ടുണ്ടെന്ന് കണ്ടെത്തിയത്. മുമ്പ്  നടന്ന പഠനങ്ങൾ അനുസരിച്ച് വാനര വസൂരി വൈറസ് ഉൾപ്പെടുന്ന 
ഓർത്തോപോക്സ് വൈറസുകളിൽ 6 മുതൽ 12 മ്യൂറ്റേഷനുകൾ മാത്രമാണ് പ്രതീക്ഷിച്ചിരുന്നത്. 15 മങ്കിപോക്സ് വൈറസ് സീക്വൻസുകളിൽ നടത്തിയ പഠനത്തിലാണ് മ്യുട്ടേഷൻ പ്രതീക്ഷിച്ചതിലും പതിന്മടങ്ങ് വർധിച്ച വിവരം കണ്ടെത്തിയത്.

ALSO READ: Monkey Pox : 42 രാജ്യങ്ങളിൽ വാനര വസൂരി; 99 ശതമാനം രോഗികളും പുരുഷന്മാരെന്ന് ലോകാരോഗ്യ സംഘടന

  എന്താണ് മങ്കിപോക്‌സ്?

മൃഗങ്ങളില്‍ നിന്ന് മനുഷ്യരിലേക്ക് വൈറസ് വഴി പകരുന്ന ഒരു രോഗമാണ് മങ്കിപോക്‌സ് അഥവാ വാനരവസൂരി. തീവ്രത കുറവാണെങ്കിലും 1980ല്‍ ലോകമെമ്പാടും ഉന്മൂലനം ചെയ്യപ്പെട്ടതായി പ്രഖ്യാപിക്കപ്പെട്ട ഓര്‍ത്തോപോക്‌സ് വൈറസ് അണുബാധയായ വസൂരിയുടെ ലക്ഷണങ്ങളുമായി വാനര വസൂരിയുടെ ലക്ഷണങ്ങള്‍ക്ക് സാദൃശ്യമുണ്ട്. പ്രധാനമായും മധ്യ, പടിഞ്ഞാറന്‍ ആഫ്രിക്കയിലാണ് ഈ രോഗം കാണപ്പെടുന്നത്. 1958ലാണ് ആദ്യമായി കുരങ്ങുകളില്‍ രോഗം സ്ഥിരീകരിച്ചത്. 1970ല്‍ ഡെമോക്രാറ്റിക് റിപ്പബ്ലിക് ഓഫ് കോംഗോയില്‍ 9 വയസുള്ള ആണ്‍കുട്ടിയിലാണ് മനുഷ്യരില്‍ വാനരവസൂരി ആദ്യമായി കണ്ടെത്തിയത്.

രോഗ പകര്‍ച്ച

രോഗം ബാധിച്ച മൃഗങ്ങളുടെ രക്തം, ശരീര സ്രവങ്ങള്‍ എന്നിവ വഴി നേരിട്ടുള്ള സമ്പര്‍ക്കത്തിലൂടെ മൃഗങ്ങളില്‍ നിന്ന് മനുഷ്യരിലേക്ക് വാനരവസൂരി പകരാം. അണ്ണാന്‍, എലികള്‍, വിവിധ ഇനം കുരങ്ങുകള്‍ എന്നിവയുള്‍പ്പെടെ നിരവധി മൃഗങ്ങളില്‍ വാനര വസൂരി വൈറസ് അണുബാധയുടെ തെളിവുകള്‍ കണ്ടെത്തിയിട്ടുണ്ട്. വനമേഖലയിലോ സമീപത്തോ താമസിക്കുന്ന ആളുകള്‍ക്ക് രോഗബാധിതരായ മൃഗങ്ങളുമായുള്ള സമ്പര്‍ക്കമുണ്ടായാല്‍ രോഗബാധയുണ്ടാകാനുള്ള സാധ്യതയുണ്ട്.

രോഗബാധിതനായ ഒരാളുടെ ശ്വാസകോശ സ്രവങ്ങളുമായുള്ള അടുത്ത സമ്പര്‍ക്കത്തിലൂടെയാണ് മനുഷ്യരില്‍ നിന്ന് മനുഷ്യരിലേക്ക് രോഗം പകരുന്നത്. ക്ഷതങ്ങള്‍, ശരീര സ്രവങ്ങള്‍, ശ്വസന തുള്ളികള്‍, കിടക്ക പോലുള്ള വസ്തുക്കള്‍ എന്നിവയുമായുള്ള അടുത്ത സമ്പര്‍ക്കത്തിലൂടെയാണ് വാനര വസൂരി വൈറസ് ഒരാളില്‍ നിന്ന് മറ്റൊരാളിലേക്ക് പകരുന്നത്.

പ്ലാസന്റ വഴി അമ്മയില്‍ നിന്ന് കുഞ്ഞിലേക്കോ അല്ലെങ്കില്‍ ജനനസമയത്തോ, അതിനുശേഷമോ കുഞ്ഞുമായുള്ള അടുത്ത സമ്പര്‍ക്കത്തിലൂടെയും രോഗസംക്രമണം സംഭവിക്കാം. ലോകമെമ്പാടും വസൂരിക്കുള്ള വാക്‌സിനേഷന്‍ നിര്‍ത്തലാക്കിയതിനാല്‍ പൊതുജനങ്ങളില്‍ വസൂരിക്കെതിരെയുള്ള പ്രതിരോധശേഷി കുറയുന്നത് വാനര വസൂരിക്കെതിരെയുള്ള പ്രതിരോധശേഷി കുറയ്ക്കുന്നതിനും കാരണമായേക്കാം.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...