Saveera Prakash:ପାକିସ୍ତାନରେ ନିର୍ବାଚନ ଲଢୁଥିବା ଏହି ହିନ୍ଦୁ ମହିଳାଙ୍କୁ ନେଇ କ’ଣ ପାଇଁ ଏତେ ଚର୍ଚ୍ଚା ? ଜାଣନ୍ତୁ ଡାକ୍ତର ସବୀରା ପ୍ରକାଶ କିଏ ?

Saveera Prakash:

ଆସନ୍ତା ବର୍ଷ ଫେବୃଆରୀ 8 ରେ ପାକିସ୍ତାନରେ ସାଧାରଣ ନିର୍ବାଚନ ଅନୁଷ୍ଠିତ ହେବ। ଏହି ନିର୍ବାଚନରେ ପାକିସ୍ତାନୀ ରାଜନୀତିର ଅନେକ ବଡ ନେତାଙ୍କ  ଭାଗ୍ୟ ସ୍ଥିର ହେବ। କେବଳ ଏତିକି ନୁହେଁ ପାକିସ୍ତାନୀ ସେନା କେଉଁ ଦଳକୁ ସମର୍ଥନ କରୁଛି ତାହା ମଧ୍ୟ ଦେଖିବାକୁ ମିଳିବ । ତେବେ ଏସବୁ ଭିତରେ  ପାଖତୁନଖୱା ପ୍ରଦେଶର ଜଣେ ହିନ୍ଦୁ ମହିଳା ଡାକ୍ତରଙ୍କ ନାମାଙ୍କନ ପତ୍ର ଦାଖଲ ପାକିସ୍ତାନରେ  ଚର୍ଚ୍ଚାର ବିଷୟ ପାଲଟିଛି। ଏହି ମହିଳା ପ୍ରାର୍ଥୀଙ୍କ ନାମ ଡାକ୍ତର ସବୀରା ପ୍ରକାଶ। ସେ ଖାଇବର ପାଖତୁନଖୱା ରୁ ଜାତୀୟ ସଂସଦ ପାଇଁ ନାମାଙ୍କନପତ୍ର ଦାଖଲ କରିଛନ୍ତି। ପାକିସ୍ତାନରେ ହିନ୍ଦୁମାନଙ୍କର ରାଜନୀତିରେ ପ୍ରବେଶ ଏକ ବିରଳ ଘଟଣା ବୋଲି ବିବେଚନା କରାଯାଉଥିବା ବେଳେ ତାଙ୍କୁ ନେଇ ଚର୍ଚ୍ଚା ଜୋର ଧରିଛି ।

ସବୀରା ପ୍ରକାଶ କିଏ?

ଡକ୍ଟର ସବୀରା ପ୍ରକାଶ ବିଲାୱାଲ ଖାଇବର ପାଖତୁନଖୱାର ବନେର ଜିଲ୍ଲାର ବାସିନ୍ଦା। ସେ ଜଣେ ଡାକ୍ତରୀ ସ୍ନାତକ ଏବଂ ବିଲାୱାଲ ଭୁଟ୍ଟୋ ଜାରଦାରୀଙ୍କ ପାକିସ୍ତାନ ପିପୁଲ୍ସ ପାର୍ଟି (ପିପିପି) ଟିକେଟରେ PK-25 ସାଧାରଣ ଆସନରୁ ପ୍ରତିଦ୍ୱନ୍ଦ୍ୱିତା କରିବାକୁ ପ୍ରସ୍ତୁତ ହେଉଛନ୍ତି। ଡନ୍ ରିପୋର୍ଟ ଅନୁଯାୟୀ, ସବୀରା ପ୍ରକାଶ ପିପିପି ମହିଳା ୱିଙ୍ଗର ସାଧାରଣ ସମ୍ପାଦକ ଅଟନ୍ତି। ତାଙ୍କ ପିତା ଡ. ଓମ ପ୍ରକାଶ ତିନି ଦଶନ୍ଧିରୁ ଅଧିକ ସମୟ ଧରି ପିପିପି ସଦସ୍ୟ ରହିଆସିଛନ୍ତି।

କେଉଁଠୁ ପଢିଥିଲେ ଡାକ୍ତରୀ ପାଠ ?

ସବୀରା 2022 ମସିହାରେ ଖାଇବର ପାଖ୍ଟନଖୱା ଅନ୍ତର୍ଗତ ଆବୋଟାବାଦ ଜିଲ୍ଲା ଅନ୍ତର୍ଗତ ଏକ ଘରୋଇ କଲେଜ ଆବୋଟାବାଦ ଅନ୍ତର୍ଜାତୀୟ ମେଡିକାଲ କଲେଜରୁ ଏମବିବିଏସ ଡିଗ୍ରୀ ସମାପ୍ତ କରିଥିଲେ। ସେ ଡନକୁ ଦେଇଥିବା ସାକ୍ଷାତକାରରେ କହିଛନ୍ତି ଯେ,ଡାକ୍ତରୀ କ୍ଷେତ୍ରରେ ତାଙ୍କର ପୃଷ୍ଠଭୂମି ନିଶ୍ଚିତ କରେ ଯେ ମାନବିକତାର ସେବା ତାଙ୍କ ରକ୍ତରେ ଅଛି। ସେ ପାକିସ୍ତାନରେ ମହିଳା ସଶକ୍ତିକରଣ କ୍ଷେତ୍ରରେ କାର୍ଯ୍ୟ କରିବାକୁ ଇଚ୍ଛା ପ୍ରକାଶ କରିଛନ୍ତି।

ନିର୍ବାଚନରେ କାହିଁକି ପ୍ରତିଦ୍ୱନ୍ଦ୍ୱିତା କଲେ?

ସେ କହିଛନ୍ତି ଯେ ମୁଁ ବ୍ୟକ୍ତିଗତ ଭାବେ ପାକିସ୍ତାନର ସରକାରୀ ଡାକ୍ତରଖାନାଗୁଡ଼ିକରେ ଖରାପ ବ୍ୟବସ୍ଥା ଅନୁଭବ କରିଛି। ଏହା ହିଁ ତାଙ୍କୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ପ୍ରେରଣା ଦେଇଛି । ଫେବୃଆରୀ 8, 2024 ରେ ପାକିସ୍ତାନରେ ନିର୍ବାଚନ ଅନୁଷ୍ଠିତ ହେବ । ଜାତୀୟ ସଭାର 266 ସାଧାରଣ ଆସନ ପାଇଁ ବିଭିନ୍ନ ଦଳର ପ୍ରାର୍ଥୀ ମୈଦାନରେ ଅଛନ୍ତି । ସୋମବାର ସୁଦ୍ଧା ଅତି କମରେ 28,626 ପ୍ରାର୍ଥୀ ନିର୍ବାଚନ ପାଇଁ ନାମାଙ୍କନପତ୍ର ଦାଖଲ କରିଛନ୍ତି। ପାକିସ୍ତାନରେ 60 ଟି ସିଟ୍ ମହିଳାଙ୍କ ପାଇଁ ସଂରକ୍ଷିତ ଥିବାବେଳେ ଅଣ ମୁସଲମାନମାନଙ୍କ ପାଇଁ ସିଟ୍ ସଂଖ୍ୟା 10 ଅଟେ। ଏହା ବ୍ୟତୀତ ସେମାନେ ସମସ୍ତ 266 ଟି ଆସନରେ ପ୍ରତିଦ୍ୱନ୍ଦ୍ୱିତା କରିପାରିବେ।

ଫେବୃଆରୀ 8 ରେ ପାକିସ୍ତାନରେ ନିର୍ବାଚନ ଅନୁଷ୍ଠିତ ହେବ

ପାକିସ୍ତାନର ନିର୍ବାଚନ ଆୟୋଗ (ଇସିପି) କହିଛି ଯେ ମୋଟ 28,626 ପ୍ରାର୍ଥୀଙ୍କ ମଧ୍ୟରୁ 3,139 ମହିଳା (11 ପ୍ରତିଶତରୁ ଅଧିକ) ସାଧାରଣ ନିର୍ବାଚନ ପାଇଁ ନାମାଙ୍କନପତ୍ର ଦାଖଲ କରିଛନ୍ତି। 2018 ଏବଂ 2013 ସାଧାରଣ ନିର୍ବାଚନ ପାଇଁ ନାମାଙ୍କନ ଦାଖଲ କରିଥିବା ମହିଳାଙ୍କ ସଂଖ୍ୟାଠାରୁ ଏହା ବହୁତ ଅଧିକ ।  2018 ସାଧାରଣ ନିର୍ବାଚନ ସମୟରେ 1,687 ମହିଳା ନାମାଙ୍କନପତ୍ର ଦାଖଲ କରିଥିଲେ, ଯାହା 2013 ନିର୍ବାଚନରେ ନାମାଙ୍କନପତ୍ର ଦାଖଲ କରିଥିବା 1,171 ମହିଳାଙ୍କ ତୁଳନାରେ ସାମାନ୍ୟ ଅଧିକ। ଇସିପି ଅଧିକାରୀମାନେ ଦସ୍ତାବିଜଗୁଡିକ ଯାଞ୍ଚ କରୁଛନ୍ତି ଏବଂ ନାମାଙ୍କନ ବିରୋଧରେ ଆପତ୍ତି ମଧ୍ୟ ଗ୍ରହଣ କରୁଛନ୍ତି। ଏହି ପ୍ରକ୍ରିୟା ଡିସେମ୍ବର 30 ପର୍ଯ୍ୟନ୍ତ ଚାଲିବ ।