UPSSF ହାତରେ ରାମ ମନ୍ଦିର ସୁରକ୍ଷା ଦାୟିତ୍ୱ, NSG କମାଣ୍ଡୋଙ୍କ ପରି ରହିଛି ଦକ୍ଷତା

Ram Mandir Security: ଚଳିତ ମାସ ଅର୍ଥାତ ଜାନୁଆରୀ ୨୨ ତାରିଖରେ ଅଯୋଧ୍ୟାରେ ଅନୁଷ୍ଠିତ ହେବ ପ୍ରଭୁ ଶ୍ରୀରାମ ମନ୍ଦିରର ପ୍ରାଣ ପ୍ରତିଷ୍ଠା ଉତ୍ସବ । ତେବେ ଏହା ପୂର୍ବରୁ ସମସ୍ତ କାର୍ଯ୍ୟ ସୁରୁଖୁରୁରେ ସମାପ୍ତ କରାଯାଉଛି । ଅଯୋଧ୍ୟାର ପ୍ରଭୁ ଶ୍ରୀରାମଙ୍କ ଭବ୍ୟ ମନ୍ଦିର ଏବଂ ଅନ୍ତର୍ଜାତୀୟ ବିମାନବନ୍ଦର ସୁରକ୍ଷା ଦାୟିତ୍ୱରେ ରହିବେ UPSSF ଯବାନ । କ୍ୟାବିନେଟରେ ଏହି ପ୍ରସ୍ତାବ ପାରିତ ହେବା ପରେ ୨୦୨୦ ମସିହାରେ ଉତ୍ତରପ୍ରଦେଶ ସ୍ୱତନ୍ତ୍ର ସୁରକ୍ଷା ବଳ ଗଠନ କରାଯାଇଥିଲା । ଗତ ୨ ବର୍ଷ ହେବ UPSSFକୁ ବିଭିନ୍ନ ସ୍ଥାନରେ ସୁରକ୍ଷା ଦାୟିତ୍ୱ ସୂଚାରୁ ରୂପେ ପାଳନ କରିବା ପାଇଁ ନିୟୋଜିତ କରାଯାଉଥିଲା । ଦେଶର ଅନ୍ୟ ବିମାନ ବନ୍ଦର ଗୁଡିକରେ CISF ପକ୍ଷରୁ ସୁରକ୍ଷା ବ୍ୟବସ୍ଥା କରାଯାଇଥିବା ସମୟରେ ଅଯୋଧ୍ୟା ବିମାନବନ୍ଦର ହେଉଛି ପ୍ରଥମ ବିମାନବନ୍ଦର ଯେଉଁଠାରେ କେବଳ UPSSF ଯବାନ ସୁରକ୍ଷା ଯୋଗାଉଛନ୍ତି । ଏଥିସହିତ ପ୍ରଭୁ ଶ୍ରୀ ରାମ ମନ୍ଦିରର ସୁରକ୍ଷା ମଧ୍ୟ UPSSF ହାତରେ ରହିଛି ।

ଉତ୍ତରପ୍ରଦେଶରେ ଅନେକ ସମ୍ବେଦନଶୀଳ ଏବଂ ଧାର୍ମିକ ସ୍ଥାନ ରହିଥିବା କାରଣରୁ ଏହାକୁ ଧ୍ୟାନରେ ରଖି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ୨୦୨୦ ମସିହାରେ UPSSF ଗଠନ କରିଥିଲେ। ଉତ୍ତରପ୍ରଦେଶର ସ୍ୱତନ୍ତ୍ର ସୁରକ୍ଷା ବଳ ଉତ୍ତରପ୍ରଦେଶର ସମସ୍ତ ଧାର୍ମିକ ସ୍ଥାନ ତଥା ସମ୍ବେଦନଶୀଳ ଅଞ୍ଚଳର ସୁରକ୍ଷା ଦାୟିତ୍ୱ ସୂଚାରୁ ରୂପେ ତୁଲାଉଛି। ଉତ୍ତରପ୍ରଦେଶର ସମସ୍ତ ମେଟ୍ରୋ ଷ୍ଟେସନରେ UPSSF ମଧ୍ୟ ନିୟୋଜିତ ହୋଇଥିଲା । ବର୍ତ୍ତମାନ ଉତ୍ତରପ୍ରଦେଶର ବିମାନବନ୍ଦରରେ ମଧ୍ୟ UPSSF ଯବାନଙ୍କୁ ସୁରକ୍ଷା ଦାୟିତ୍ୱ ହସ୍ତାନ୍ତର କରାଯାଇଛି ।

UPSSF ADG LV ଆଣ୍ଟୋନି ସୂଚନା ଦେଇ କହିଛନ୍ତି ଯେ, UPSSF ଯବାନଙ୍କୁ ସେମାନଙ୍କର ଦାୟିତ୍ୱ ଅନୁଯାୟୀ ସ୍ୱତନ୍ତ୍ର ତାଲିମ ଦିଆଯାଉଛି । ବିମାନ ବନ୍ଦରରେ ସୁରକ୍ଷା ଯୋଗାଉଥିବା ଯବାନଙ୍କୁ ସ୍ୱତନ୍ତ୍ର ତାଲିମ ଦିଆଯାଇଥାଏ । ଅଯୋଧ୍ୟା ରାମ ମନ୍ଦିରର ସୁରକ୍ଷା ବ୍ୟବସ୍ଥାକୁ ଦୃଷ୍ଟିରେ ରଖି ଫୋର୍ସକୁ ବଢାଯାଉଛି । ଅଯୋଧ୍ୟାର ସୁରକ୍ଷା ପାଇଁ UPSSAF ପକ୍ଷରୁ ଏକ ନୂଆ ବାଟାଲିୟନ ତିଆରି କରିବା ପାଇଁ ଯୋଜନା ଚାଲିଛି । ଏଡିଜି କହିଛନ୍ତି ଯେ, UPSSF ଯବାନଙ୍କୁ NSG କମାଣ୍ଡୋଙ୍କ ପରି ତାଲିମ ଦିଆଯାଇଛି। ତାଙ୍କୁ ଏନଏସଜି ତାଲିମ କେନ୍ଦ୍ର ମନେସରରୁ ତାଲିମ ଦିଆଯାଇଛି। ପ୍ରତିକୂଳ ପରିସ୍ଥିତି ପାଇଁ ଏହି ଯବାନମାନେ ସର୍ବଦା ପ୍ରସ୍ତୁତ ଅଛନ୍ତି ।

Also Read- Delhi Weather: ଦିଲ୍ଲୀବାସୀଙ୍କ ଦେହରେ ପଡିଲା ୨୦୨୪ବର୍ଷର ପ୍ରଥମ ସୂର୍ଯ୍ୟ କିରଣ

Also Read- ପ୍ରଭୁ ଶ୍ରୀରାମଙ୍କ ଅନନ୍ୟ ଭକ୍ତ ଶ୍ରୀନିବାସ, ୬୪ ବର୍ଷ ବୟସରେ ୮ହଜାର କିମି ପଦଯାତ୍ରା