ଶ୍ୱଶୁରର ମତ୍ୟୁ ଖବର କହିବାକୁ ଯାଉଥିଲେ ଜ୍ୱାଇଁ; ବାଟରେ ଚାଲିଗଲା ଜୀବନ

ବାରିପଦା: ବାରିପଦା କୁଚେଇ ଛକରେ ଅଭାବନୀୟ ଘଟଣା ଦେଖିବାକୁ ମିଳିଛି। ଶ୍ଵଶୁର ମୃତ୍ୟୁ ଖବର ଦେବାକୁ ଯିବା ବେଳେ ଜ୍ବାଇଁର ମୃତ୍ୟୁ ଘଟିଛି। ମୃତକଙ୍କ ଘର ‌ମାରନତାଣ୍ଡି ଅଞ୍ଚଳରେ ବୋଲି ଜଣାପଡିଛି। ବାଇକରେ ଯିବାବେଳେ ଏକ ପିକଅପ୍ ତାଙ୍କୁ ଧକ୍କା ଦେଇଛି। 

ଦୁର୍ଘଟଣା ପରେ ସ୍ଥାନୀୟ ଲୋକ ମୟୁରଭଞ୍ଜ ବାରିପଦା ଦେଇ ଯାଇଥିବା ୧୮ନଂ ଜାତୀୟ ରାଜପଥ କୁଚେଇ ଛକରେ ରାସ୍ତା ଅବରୋଧ କରିଛନ୍ତି। ବାଇକ ଆରୋହୀଙ୍କୁ ଧକ୍କା ଦେଇ ପିକଅପ ଘଟଣାସ୍ଥଳରୁ ଫେରାର ହୋଇଯାଇଛି। ରାସ୍ତା ଉପରେ ବାଇକ୍ ଆରୋହୀଙ୍କ ମୃତଦେହ ପଡିରହିଛି। ତେବେ ଦୀର୍ଘ ଦିନରୁ କୁଚେଇ ଛକରେ ପୋଲ ନିର୍ମାଣ ଲାଗି ଦାବି ହୋଇଆସୁଛି। ଅଣ୍ଡରପାସ ନଥିବାରୁ ବାରମ୍ବାର ଏଠାରେ ଏଭଳି ଦୁର୍ଘଟଣାମାନ ଘଟୁଛି। ସେପଟେ ଖବର ପାଇ ପୁଲିସ ଏବଂ ଏସଡିପିଓ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା ଜାରି ରଖିଛନ୍ତି।

ଅନ୍ୟପଟେ ସେହିପରି ଗତରାତିରେ ଶୁଳିଆପଦା ଥାନା ଦେଉଳି ନିକଟ କ୍ଷେତ୍ରପାଟଣା ନିକଟରେ ଜଣେ ବାଇକ ଆରୋହୀଙ୍କ ମୃତଦେହକୁ ବିଲ ଭିତରୁ ଉଦ୍ଧାର କରାଯାଇଛି। ମୃତକ ଜଣଙ୍କ ହେଲେ ବଡ଼ସାହି ଥାନା ଅଧୀନ ବୀରେଶ୍ବରପୁର ପଞ୍ଚାୟତ ଦାନ୍ତୁଣି ଗ୍ରାମର ବାଇଧର ସିଂଙ୍କ ପୁଅ ଶମ୍ଭୁନାଥ। ପୋଲିସ ମୃତଦେହ ଓ ବାଇକ ଉଦ୍ଧାର କରି ତଦନ୍ତ ଚଳାଇଛି।