Revolt in Shiv Sena: ବିଧାନସଭା ପରେ ଲୋକସଭା ଲାଗି ଆରମ୍ଭ ହେଲା ଯୁଦ୍ଧ

Revolt in Shiv Sena: ପ୍ରଥମେ ବିଧାୟକ ଦଳ ଏବଂ ଶିବସେନା ସଂସଦୀୟ ଦଳରେ ମଧ୍ୟ ବିଭାଜନ ହେବାର ସମ୍ଭାବନା ସୃଷ୍ଟି ହେଲାଣି। ଅନେକ ଶିବସେନା ସାଂସଦ ଲୋକସଭାରେ ଏକ ପୃଥକ ଗୋଷ୍ଠୀ ଭାବରେ ମାନ୍ୟତା ପାଇଁ ଅନୁରୋଧ ସହିତ ଲୋକସଭା ବାଚସ୍ପତି ଓମ ବିର୍ଲାଙ୍କ ପାଖରେ ଏକ ପତ୍ର ଦାଖଲ କରିବାକୁ ପ୍ରସ୍ତୁତ ହେଉଛନ୍ତି। ଗୋଟିଏ ପଟେ ଉଦ୍ଧବ ଠାକରେ ବର୍ତ୍ତମାନ ଦଳକୁ ବଞ୍ଚାଇବା ପାଇଁ ନିର୍ବାଚନ ଆୟୋଗ ନିକଟରେ ନିବେଦନ କରୁଛନ୍ତି।

ଦଳରେ ଏବେ ସିନ୍ଦେ ଗୋଷ୍ଠୀ-ଠାକରେ ଗୋଷ୍ଠୀ ମଧ୍ୟରେ ସଂଘର୍ଷ ଜାରି ରହିଛି। ହେଲେ ଏହା ମଧ୍ୟରେ ଶିବସେନା ଠାକରେ ଗୋଷ୍ଠୀର ସାଂସଦ ବିନାୟକ ରାଉତ ଲୋକସଭା ବାଚସ୍ପତି ଓମ ବିର୍ଲାଙ୍କୁ ଏକ ପତ୍ର ଲେଖି କହିଛନ୍ତି ଯେ ମୁଁ ଲୋକସଭାରେ ସଂସଦୀୟ ଦଳ ନେତା ଏବଂ ରାଜନ ବିଚାରେ ହେଉଛନ୍ତି ସଂସଦୀୟ ଦଳ ମୁଖ୍ୟ ସଚେତକ। ଏହି ପତ୍ରରେ ଲୋକସଭା ବାଚସ୍ପତିଙ୍କୁ ସେମାନଙ୍କ ନାମ ବ୍ୟତୀତ ଅନ୍ୟ କାହାର ନାଁ ଗ୍ରହଣ ନ କରିବାକୁ ଅନୁରୋଧ କରାଯାଇଛି। ଯଦି ଏପରି ହୁଏ ତାହେଲେ ମୋତେ ଏହି ଘଟଣା ବାବଦରେ ଜଣାନ୍ତୁ। ଯାହା ଦ୍ୱାରା ମୁଁ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବି ବୋଲି କହିଛନ୍ତି ଠାକରେ ଗୋଷ୍ଠୀର ସାଂସଦ ବିନାୟକ ରାଉତ। 

ଗତ ସୋମବାର ଖବର ଆସିଥିଲା ଯେ ଶିବସେନାର ମୋଟ ୧୯ ଜଣ ଲୋକସଭା ସାଂସଦଙ୍କ ମଧ୍ୟରୁ ଦଳର ୧୨ ଜଣ ସାଂସଦ ଲୋକସଭାରେ ଏକ ପୃଥକ ଗୋଷ୍ଠୀ ଗଠନ କରିବେ। ଏନେଇ ସେମାନେ ଔପଚାରିକ ଭାବେ ବାଚସ୍ପତି ଓମ ବିର୍ଲାଙ୍କୁ ଏକ ପତ୍ର ଲେଖିବେ। ଶିବସେନା ସାଂସଦ କହିଛନ୍ତି ଯେ ସୋମବାର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଦ୍ୱାରା ଆୟୋଜିତ ହୋଇଥିବା ଏକ ଅନଲାଇନ୍ ବୈଠକରେ ଆମେ ଭାଗ ନେଇଛୁ। ଦକ୍ଷିଣ-କେନ୍ଦ୍ର ମୁମ୍ବାଇ ଲୋକସଭା ଆସନର ସାଂସଦ ରାହୁଲ ଶେୱାଲେଙ୍କ ନେତୃତ୍ୱରେ ଆମେ ଏକ ପୃଥକ ଗୋଷ୍ଠୀ ଗଠନ କରିବାକୁ ନିଷ୍ପତ୍ତି ନେଇଛୁ। ସେ ଆମ ଦଳର ନେତା ହେବେ। ଅର୍ଥାତ କହିବାକୁ ଗଲେ ସିନ୍ଦେ ଗୋଷ୍ଠୀର ସଂସଦୀୟ ଦଳ ନେତା ହେବେ ରାହୁଲ ଶେୱାଲେ।

ସୋମବାର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଦ୍ୱାରା ଆୟୋଜିତ ହୋଇଥିବା ବୈଠକରେ ଯୋଗ ଦେଇନାହାଁନ୍ତି ଶିବସେନା ସାଂସଦ ବିନୟକ ରାଉତ, ଅରବିନ୍ଦ ସାୱନ୍ତ, ଗଜାନନ କିରୀଟକର, ସଞ୍ଜୟ ଜାଧବ, ଓମ୍ ରାଜେ ନିମ୍ବଲକର ଏବଂ ରାଜନ ବିଚାରେ। ଏହି ୬ ଜଣ ସାଂସଦଙ୍କୁ ଛାଡ଼ି ଏହି ବୈଠକରେ ମହାରାଷ୍ଟ୍ରର ୧୨ ସାଂସଦ ଅଂଶଗ୍ରହଣ କରିଥିଲେ। ଶିବସେନାରେ ଲୋକସଭାରେ ୧୯ ଜଣ ସାଂସଦ ଅଛନ୍ତି। ସେମାନଙ୍କ ମଧ୍ୟରୁ ୧୮ ଜଣ ମହାରାଷ୍ଟ୍ରର ହୋଇଥିବା ବେଳେ ଜଣେ ସାଂସଦ କେନ୍ଦ୍ରଶାସିତ ଅଞ୍ଚଳ ଦାଦ୍ରା ନଗର ହାଭେଳୀ ଲୋକସଭା ଆସନରୁ ପ୍ରତିନିଧିତ୍ୱ କରୁଛନ୍ତି।

ବିଧାୟକ ଦଳରେ ବିଭାଜନ ପରେ ଶିବସେନା ଠାକରେ ଗୋଷ୍ଠୀକୁ ଝଟକା ଦେଇଛନ୍ତି ଦଳର ସାଂସଦ। ରାଜ୍ୟରେ କ୍ଷମତା ପରିବର୍ତ୍ତନ ପରେ ମଧ୍ୟ ଠାକେର ଗୋଷ୍ଠୀର ଅନେକ ନେତା ସିନ୍ଦେ ଗୋଷ୍ଠୀରେ ଯୋଗ ଦେଉଛନ୍ତି। ସିନ୍ଦେ ଗୋଷ୍ଠୀ ଅନ୍ୟ ନେତାଙ୍କ ଠାରୁ ବହୁ ସମର୍ଥନ ପାଉଛି। ପ୍ରଥମେ ବିଧାୟକ ଆଉ ସାଂସଦ ସିନ୍ଦେ ଗୋଷ୍ଠୀରେ ଯୋଗ ଦେଉଛନ୍ତି। 

ସୋମବାର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଉପସ୍ଥିତିରେ ହୋଟେଲ ଟ୍ରାଇଡେଣ୍ଟ ଠାରେ ଚାଲିଥିବା ବିଧାୟକ ଦଳ ବୈଠକରେ ୧୪ ସାଂସଦ ଅନଲାଇନ ଯୋଗେ ଅଂଶଗ୍ରହଣ କରିଥିଲେ। ରାଷ୍ଟ୍ରପତି ନିର୍ବାଚନ ପରେ ୧୪ ସାଂସଦ ସିନ୍ଦେ ଗୋଷ୍ଠୀକୁ ସମର୍ଥନ କରିଛନ୍ତି। ଏହି ବୈଠକ ପରେ ମୁଖ୍ୟମନ୍ତ୍ରୀ ସିନ୍ଦେ ତାଙ୍କ ଗୋଷ୍ଠୀ ପକ୍ଷରୁ ଏକ ପ୍ରସ୍ତାବ ଉପସ୍ଥାପନ କରି କାର୍ଯ୍ୟନିର୍ବାହୀ କମିଟି ଘୋଷଣା କରିବେ। ଶିବସେନାରୁ ବହିଷ୍କାର ଏବଂ ଇସ୍ତଫା ଅଧିବେଶନ ଆରମ୍ଭ ହେବା ମାତ୍ରେ ସିନ୍ଦେ ଦଳ ପ୍ରମୁଖ ନେତାଙ୍କୁ ନିଯୁକ୍ତ କରିବେ।

ପୂର୍ବରୁ ଶିବସେନା ବିଧାୟକ ଦଳ ୨ ଗୋଷ୍ଠୀରେ ବାଣ୍ଟି ହୋଇସାରିଛି। ସିନ୍ଦେ ଗୋଷ୍ଠୀରେ ୪୦ ଜଣ ବିଧାୟକ ସାମିଲ ହୋଇଥିବା ବେଳେ ବାକି ୧୪ ଜଣ ବିଧାୟକ ଠାକରେ ଗୋଷ୍ଠୀ ସହ ଅଛନ୍ତି। ବର୍ତ୍ତମାନ ସିନ୍ଦେ ଗୋଷ୍ଠୀ ଦାବି କରିଛି ଯେ ଦଳର ୧୨-୧୪ ଜଣ ସାଂସଦ ସେମାନଙ୍କ ସହ ଅଛନ୍ତି।

ଗତ ସପ୍ତାହରେ ଶିବସେନା ଅଧ୍ୟକ୍ଷ ଉଦ୍ଧବ ଠାକରେ ଦଳର ସମସ୍ତ ସାଂସଦଙ୍କ ସହ ଆଲୋଚନା କରିଥିଲେ। ଏହି ବୈଠକରେ ରାଷ୍ଟ୍ରପତି ନିର୍ବାଚନରେ ​​କାହାକୁ ସମର୍ଥନ କରାଯିବ ସେନେଇ ଆଲୋଚନା କରାଯାଇଥିଲା। ସେତେବେଳେ ଅଧିକାଂଶ ସାଂସଦ ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବା କଥା କହିଥିଲେ। ଏହି ବୈଠକରେ ଦଳ ୧୮ ଜଣ ଲୋକସଭା ସଦସ୍ୟଙ୍କ ମଧ୍ୟରୁ ୧୩ ଜଣ ସାଂସଦ ଯୋଗ ଦେଇଥିଲେ। ହେଲେ ଶିବସେନା ରାଜ୍ୟସଭା ସାଂସଦ ସଞ୍ଜୟ ରାଉତ ଦାବି କରିଛନ୍ତି ଯେ ଉଦ୍ଧବ ଠାକରେଙ୍କ ବ୍ୟକ୍ତିଗତ ବାସଭବନରେ ଅନୁଷ୍ଠିତ ବୈଠକରେ ଦଳର ୧୫ ଜଣ ସାଂସଦ ଯୋଗ ଦେଇଛନ୍ତି।

Also Read: Maharashtra Politics: ଯଦି ଜଣେ ବିଧାୟକ ନିର୍ବାଚନ ହାରନ୍ତି ତାହେଲ ମୁଁ ଛାଡିଦେବି ରାଜନୀତି

Also Read: Maharashtra Politics: ବିଦ୍ରୋହୀ ବିଧାୟକଙ୍କୁ ନେଇ ବଡ଼ ଦାବି କଲେ ଶିବସେନା ସାଂସଦ ବିନାୟକ ରାଉତ

Also Read: Maharashtra Politics: ସାଂସଦ-ବିଧାୟକ ପରେ ଏବେ ସଙ୍ଗଠନ ଉପରେ ସିନ୍ଦେ ଗୋଷ୍ଠୀ ନଜର