Lok Sabha Election 2024: କଂଗ୍ରେସ ମୁସଲମାନ ଭୋଟ ଚାହୁଁଛି ହେଲେ ନିର୍ବାଚନରେ...

Mohammed Arif Naseem Khan: ୨୦୨୪ ଲୋକସଭା ନିର୍ବାଚନ ମଧ୍ୟରେ କଂଗ୍ରେସ ଦଳକୁ ଲାଗିଛି ଏକ ବଡ଼ ଝଟକା। ଦଳର ଜଣେ ବରିଷ୍ଠ ମୁସଲମାନ ନେତା ତଥା ତାରକା ପ୍ରଚାରକ ଶୁକ୍ରବାର (ଅପ୍ରେଲ ୨୬) ଦଳୀୟ ପ୍ରଚାର ଅଭିଯାନରୁ ବାହାରି ଯାଇଛନ୍ତି। ଏପରିକି କଂଗ୍ରେସ ନେତା ଜଣଙ୍କ ଦଳର ନିର୍ବାଚନ ପ୍ରଚାର ସମିତିରୁ ବାହାରି ଯାଇଛନ୍ତି। ନିର୍ବାଚନ ବେଳେ ଦଳୀୟ ପ୍ରଚାରରୁ ବାହାରି ଯାଇଥିବା ନେତା ଜଣଙ୍କ ହେଉଛନ୍ତି ମହାରାଷ୍ଟ୍ର କଂଗ୍ରେସ କମିଟି କାର୍ଯ୍ୟକାରୀ ସଭାପତି ମହମ୍ମଦ ଆରିଫ ନସୀମ ଖାନ। ସେ ଦଳର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କୁ ଏକ ଚିଠି ଲେଖିଛନ୍ତି। ଯେଉଁଥିରେ ସେ ତାଙ୍କ ରାଜ୍ୟରେ ୨୦୨୪ ଲୋକସଭା ନିର୍ବାଚନରେ କୌଣସି ମୁସଲମାନଙ୍କୁ ପ୍ରାର୍ଥୀ କରାଯାଇ ନଥିବାରୁ ଦୁଃଖ ପ୍ରକାଶ କରିଛନ୍ତି। ଏପରିକି କଂଗ୍ରେସ, ଏନସିପି (ପାୱାର ଗୋଷ୍ଠୀ), ଶିବସେନା (ଠାକରେ ଗୋଷ୍ଠୀ) ଆଦି ଦଳକୁ ନେଇ ଗଠିତ ମହାବିକାଶ ଅଘାଡ଼ି ମେଣ୍ଟ କୌଣସି  ମୁସଲମାନଙ୍କୁ ପ୍ରାର୍ଥୀ କରାଯାଇ ନଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି।

ମହାରାଷ୍ଟ୍ର କଂଗ୍ରେସ କମିଟି କାର୍ଯ୍ୟକାରୀ ସଭାପତି ମହମ୍ମଦ ଆରିଫ ନସୀମ ଖାନ କହିଛନ୍ତି ଯେ ତାଙ୍କ ରାଜ୍ୟରେ ମୋଟ ୪୮ ଲୋକସଭା ସିଟ୍। ହେଲେ ଏହା ମଧ୍ୟରୁ ମହାବିକାଶ ଅଘାଡ଼ି ମେଣ୍ଟ କୌଣସି ଗୋଟିଏ ହେଲେ ଆସନରେ ମୁସଲମାନ ପ୍ରାର୍ଥୀଙ୍କୁ ଟିକେଟ ଦେଇନାହିଁ। ବହୁ ମୁସଲମାନ ସଙ୍ଗଠନ, ଦଳର ନେତା ତଥା କର୍ମକର୍ତ୍ତା ଆଶା କରିଥିଲେ ଯେ ଅନ୍ତତଃ ପକ୍ଷେ ଜଣେ ପ୍ରମୁଖ ମୁସଲମାନ ନେତାଙ୍କୁ ୨୦୨୪ ଲୋକସଭା ନିର୍ବାଚନରେ ପ୍ରାର୍ଥୀ କରାଯିବ। ହେଲେ ଏହା ହୋଇପାରିଲା ନାହିଁ।

କଂଗ୍ରେସ ମୁସଲମାନ ଭୋଟ ଚାହୁଁଛି ହେଲେ... 
ମହାରାଷ୍ଟ୍ର କଂଗ୍ରେସ ନେତା ଜଣଙ୍କ ଆହୁରି କହିଛନ୍ତି ଯେ ବର୍ତ୍ତମାନ ସଂଖ୍ୟାଲଘୁ ସମ୍ପ୍ରଦାୟ ଲଜ୍ଜାଜନକ ବୟାନବାଜି କରୁଛି। କଂଗ୍ରେସ ମୁସଲମାନ ଭୋଟ୍ ଚାହୁଁଛି ହେଲେ ନିର୍ବାଚନରେ ​​କୌଣସି ମୁସଲମାନଙ୍କୁ ଦଳୀୟ ପ୍ରାର୍ଥୀ କରିବାକୁ ଚାହୁଁ ନାହିଁ।  ଦୁଃଖର ବିଷୟ ଯେ ବର୍ତ୍ତମାନ ମୁଁ ସେମାନଙ୍କ ସାମ୍ନା କରିପାରିବି ନାହିଁ। କାରଣ ମୋ ପାଖରେ ଏହାର କୌଣସି ଜବାବ ନାହିଁ। ମୁସଲମାନ କଂଗ୍ରେସ ଦଳକୁ ସର୍ବଦା ସମର୍ଥନ କରି ଆସୁଛନ୍ତି। 

ମହମ୍ମଦ ଆରିଫ ନସୀମ ଖାନ ମୁମ୍ବାଇ ମହାନଗରୀରେ ତାଙ୍କ ଦଳ ଭାଗରେ ପଡ଼ିଥିବା ୨ ଲୋକସଭା ସିଟ୍ ମଧ୍ୟରୁ ଅତି କମରେ ଗୋଟିଏ ଆସନ ଦାବି କରୁଥିଲେ। ଗତ ଗୁରୁବାର (ଅପ୍ରେଲ ୨୫) ବିଳମ୍ବିତ ରାତିରେ କେନ୍ଦ୍ରୀୟ ମୁମ୍ବାଇ ଲୋକସଭା ଆସନରୁ ମୁମ୍ବାଇ ସହର କଂଗ୍ରେସ ସଭାପତି ବର୍ଷା ଇ. ଗାଇକୱାଡଙ୍କୁ ପ୍ରାର୍ଥୀ କରିଥିଲା। ଯାହା ଦଳର ବରିଷ୍ଠ ମୁସଲମାନ ନେତାଙ୍କ ମଧ୍ୟରେ ଅନେକ ଅସନ୍ତୋଷ ସୃଷ୍ଟି କରିଛି।

କଂଗ୍ରେସ ନେତା ଜଣଙ୍କ କହିଛନ୍ତି ଯେ ଦଳର ଏହି ଅନ୍ୟାୟ ନିଷ୍ପତ୍ତି ମୋତେ ଗଭୀର ଭାବରେ ବ୍ୟଥିତ କରୁଛି। ଅତୀତରେ ଯେତେବେଳେ ଦଳ ମୋତେ ଗୁଜୁରାଟ, ଗୋଆ, କର୍ଣ୍ଣାଟକ, ତେଲେଙ୍ଗାନା, ପଶ୍ଚିମବଙ୍ଗ ଏବଂ ମହାରାଷ୍ଟ୍ର ସମେତ ଅନ୍ୟାନ୍ୟ ରାଜ୍ୟରେ ନିର୍ବାଚନ ଦାୟିତ୍ୱ ଦେଇଛି ସେତବେଳେ ମୁଁ ଅତି ସଚ୍ଚୋଟତାର ସହ ଦଳୀୟ କାର୍ଯ୍ୟ କରିଛି। ବର୍ତ୍ତମାନ ମୁଁ ୨୦୨୪ ଲୋକସଭା ନିର୍ବାଚନରେ ଦଳ ପାଇଁ ତୃତୀୟ, ଚତୁର୍ଥ ଏବଂ ପଞ୍ଚମ ପର୍ଯ୍ୟାୟ ଲାଗି ପ୍ରଚାର କରିବି ନାହିଁ।

ମହମ୍ମଦ ଆରିଫ ନସୀମ ଖାନଙ୍କ ବୟାନ ଉପରେ ମହାରାଷ୍ଟ୍ର କଂଗ୍ରେସ କମିଟି କିମ୍ବା ଦଳର କେନ୍ଦ୍ରୀୟ ନେତୃତ୍ୱ କୌଣସି ବୟାନ ଦେଇନାହାଁନ୍ତି। ହେଲେ ମହାରାଷ୍ଟ୍ର କଂଗ୍ରେସ କମିଟି କାର୍ଯ୍ୟକାରୀ ସଭାପତି ୨୦୨୪ ନିର୍ବାଚନ ବେଳେ ଯେଉଁ ଅଭିଯୋଗ କରିଛନ୍ତି ତାହା ଦ୍ୱାରା ରାଜ୍ୟର ବାକି ୩୫ ଲୋକସଭା ଆସନରେ କଂଗ୍ରେସ କିମ୍ବା ମହାବିକାଶ ଅଘାଡ଼ି ମେଣ୍ଟକୁ ସଂଖ୍ୟାଲଘୁ ସମ୍ପ୍ରଦାୟର ସମର୍ଥନ ମିଳିବା ଉପରେ ପ୍ରଶ୍ନ ଉଠାଇଛି। ଗତ ମାସରେ, ବଞ୍ଚିତ ବହୁଜନ ଅଘାଡ଼ି ସଭାପତି ପ୍ରକାଶ ଆମ୍ବେଦକର ମଧ୍ୟ ଲୋକସଭା ନିର୍ବାଚନରେ ​​ରାଜ୍ୟରେ କୌଣସି ମୁସଲମାନଙ୍କୁ ପ୍ରାର୍ଥୀ କରାଯାଇ ନଥିବାରୁ ମହାବିକାଶ ଅଘାଡ଼ି ମେଣ୍ଟକୁ ସମାଲୋଚନା କରିଥିଲେ।