ତେଲେଙ୍ଗାନାର ସିଏମ୍ ବାସଭବନ ବାହାରେ ଚାଲିଲା ବୁଲଡୋଜର, ରେବନ୍ତ ରଖିଲେ ନିଜ ପ୍ରତିଶ୍ରୁତି

Pragathi Bhavan: ଗୁରୁବାର ଦିନ ତେଲେଙ୍ଗାନା ଏକ ନୂଆ ମୁଖ୍ୟମନ୍ତ୍ରୀ ପାଇଛନ୍ତି । କଂଗ୍ରେସର ରେବନ୍ତ ରେଡ୍ଡୀ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ରେବନ୍ତ ରେଡ୍ଡୀଙ୍କ ଏହି ଶପଥ ସହିତ ଦକ୍ଷିଣ ଭାରତର ଅନ୍ୟ ଏକ ରାଜ୍ୟରେ କଂଗ୍ରେସ ସରକାର ଗଠନ କରିଛି । ରେବନ୍ତ ରେଡ୍ଡୀ ମୁଖ୍ୟମନ୍ତ୍ରୀ ହେବା ପୂର୍ବରୁ ଦେଇଥିବା ପ୍ରତିଶ୍ରୁତି ପାଳନ କରିଛନ୍ତି । ଶପଥ ଗ୍ରହଣ କରିବା ପୂର୍ବରୁ ପ୍ରଗତି ଭବନ (ସିଏମ ବାସଭବନ) ନିକଟରେ ଥିବା ପାଚେରୀକୁ ବୁଲଡୋଜର ସାହାଯ୍ୟରେ ହଟାଇ ଦିଆଯାଇଛି ।

ଜନସାଧାରଣଙ୍କ ପ୍ରବେଶ ଓ ଟ୍ରାଫିକ ଗତିବିଧିକୁ ସହଜ କରିବା ପାଇଁ ପ୍ରଗତି ଭବନ ସମ୍ମୁଖରେ ସ୍ଥାପିତ ଲୁହା ବ୍ୟାରିକେଡଗୁଡ଼ିକୁ ହଟାଇ ଦିଆଯାଇଛି । ବିଧାୟକ ଦାନାସରୀ ସେଟକ୍କା ଟ୍ୱିଟରରେ ଏକ ପୋଷ୍ଟରେ କହିଛନ୍ତି ଯେ ପ୍ରଗତି ଭବନରେ ଥିବା ଶେଡ୍ ଏବଂ ଗ୍ରିଲକୁ ହଟାଇ ଦିଆଯାଇଛି ।

ରେବନ୍ତ ରେଡ୍ଡୀ ରଖିଲେ ନିଜ ପ୍ରତିଶ୍ରୁତି
କହିରଖୁଛୁ ଯେ ରେବନ୍ତ ରେଡ୍ଡୀ କହିଥିଲେ ଯେ ପ୍ରଗତି ଭବନ (ମୁଖ୍ୟମନ୍ତ୍ରୀଙ୍କ ବାସଭବନ) ର ଦ୍ୱାର ସର୍ବସାଧାରଣଙ୍କ ପାଇଁ ଖୋଲା ରହିବ । ଏହାର ନାମ ଡକ୍ଟର ବିଆର ଆମ୍ବେଦକର ପ୍ରଜା ଭବନରେ ପରିବର୍ତ୍ତନ କରାଯିବ । ପ୍ରଗତି ଭବନ ନିର୍ମାଣ ପାଇଁ ପ୍ରାୟ ୫୦ କୋଟି ଟଙ୍କା ଖର୍ଚ୍ଚ ହୋଇଛିି । ୨୦୨୨ ରେ ଏକ RTI ମାଧ୍ୟମରେ ଏହା ପ୍ରକାଶ ପାଇଥିଲା । ପ୍ରଗତି ଭବନ ହେଉଛି ତେଲେଙ୍ଗାନା ରାଜ୍ୟ ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନ ।

କେ ଚନ୍ଦ୍ରଶେଖର ରାଓ ମୁଖ୍ୟମନ୍ତ୍ରୀ ଥିବାବେଳେ ୨୦୧୬ ମସିହାରେ ସହରର ମଧ୍ୟଭାଗରେ ଏହି କୋଠା ନିର୍ମାଣ କରିଥିଲେ । ଅଫିସର୍ କଲୋନୀରେ ୧୦ଟି ଆଇଏସ୍ ଅଧିକାରୀଙ୍କ କ୍ୱାର୍ଟର୍ସ ଏବଂ ୨୪ଟି ପେନ୍ କ୍ୱାର୍ଟର୍ ଭାଙ୍ଗିବା ପରେ ଏହା ନିର୍ମାଣ କରାଯାଇଥିଲା । ନଅ ଏକର ଜମିରେ ନିର୍ମିତ ଏହି କମ୍ପ୍ଲେକ୍ସର ମୂଲ୍ୟ ୨୦୧୬-୧୭ ଆର୍ଥିକ ବର୍ଷରେ ୪୫,୯୧,୦୦,୦୦୦ ଟଙ୍କା ଥିଲା । ପ୍ରଗତି ଭବନରେ ପାଞ୍ଚଟି କୋଠା ଅଛି । ଏଥିରେ ବାସଭବନ, ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ, ଜନହିତା (ବୈଠକ କକ୍ଷ), ପୁରୁଣା ମୁଖ୍ୟମନ୍ତ୍ରୀଙ୍କ ବାସସ୍ଥାନ ଓ କ୍ୟାମ୍ପ କାର୍ଯ୍ୟାଳୟ ରହିଛି ।

ଶପଥ ଗ୍ରହଣରେ ଏହି ନେତାମାନେ ହୋଇଥିଲା ସାମିଲ୍?
ଶପଥ ଗ୍ରହଣ ସମାରୋହରେ ସୋନିଆ, ରାହୁଲ ଓ ପ୍ରିୟଙ୍କା ଗାନ୍ଧୀ ଯୋଗ ଦେଇଥିଲେ । ସୋନିଆ, ରାହୁଲ ଓ ପ୍ରିୟଙ୍କାଙ୍କ ରିସିଭ୍ କରିବା ପାଇଁ ରେବନ୍ତ ରେଡ୍ଡୀ ନିଜେ ହାଇଦ୍ରାବାଦ ବିମାନବନ୍ଦରରେ ପହଞ୍ଚିଥିଲେ । ତେଲେଙ୍ଗାନାରେ ପ୍ରଥମ କଂଗ୍ରେସ ସରକାରଙ୍କ ଶପଥ ଗ୍ରହଣ ସମାରୋହରେ ଦଳର ସଭାପତି ମଲ୍ଲିକାର୍ଜୁନ ଖଡ୍ଗେ ଓ କର୍ଣ୍ଣାଟକ ସିଏମ ସିଦ୍ଧରମୟା ଓ ଡେପୁଟି ସିଏମ ଡି.କେ ଶିବକୁମାରଙ୍କ ସମେତ ବହୁ ନେତା ଯୋଗ ଦେଇଥିଲେ ।

ମହବୁବନଗର ଜିଲ୍ଲାର କୋଣ୍ଡାରେଡି ପାଲୀରୁ ଆସିଥିବା ୫୪ ବର୍ଷିୀୟ ରେବନ୍ତଙ୍କ ସମ୍ପୂର୍ଣ୍ଣ ନାମ ହେଉଛି ଅନୁମୁଲା ରେବନ୍ତ ରେଡ୍ଡୀ । ଓସମାନିଆ ବିଶ୍ୱବିଦ୍ୟାଳୟର ସ୍ନାତକ କରିଥିବା ରେବନ୍ତ ବିଜେପିର ଛାତ୍ର ସଂଘ ଏବିଭିପି ସହିତ ନିଜ ରାଜନୀତି ଆରମ୍ଭ କରିଥିଲେ । ୨୦୦୭ ରେ, ସେ ସ୍ୱାଧୀନ ପ୍ରାର୍ଥୀ ଭାବରେ ଆନ୍ଧ୍ରପ୍ରଦେଶ ବିଧାନ ପରିଷଦର ସଦସ୍ୟ ଭାବରେ ନିର୍ବାଚିତ ହୋଇଥିଲେ । ୨୦୦୯ ରେ, ସେ ଚନ୍ଦ୍ରବାବୁ ନାଇଡୁଙ୍କ ନିର୍ଦ୍ଦେଶରେ ତେଲୁଗୁ ଦେଶମ ପାର୍ଟିରେ ଯୋଗ ଦେଇଥିଲେ ।

୨୦୧୭ ରେ ରେବନ୍ତ ରେଡ୍ଡୀ ଟିଡିପି ଛାଡି କଂଗ୍ରେସରେ ଯୋଗ ଦେଇଥିଲେ । ୨୦୧୯ ରେ ମାଲକାଜଗିରି ଆସନରୁ ପ୍ରଥମ ଥର ପାଇଁ ସାଂସଦ ହୋଇଥିଲେ । ଜୁନ୍ ୨୦୨୧ ରେ କଂଗ୍ରେସ ହାଇକମାଣ୍ଡ ତାଙ୍କୁ ବରିଷ୍ଠ ନେତା ଏନ ଉତ୍ତମ ରେଡ୍ଡୀଙ୍କ ସ୍ଥାନରେ ତେଲେଙ୍ଗାନାର ନେତୃତ୍ୱ ହସ୍ତାନ୍ତର କରିଥିଲେ । କଂଗ୍ରେସ ସଭାପତି ଭାବରେ ରେବନ୍ତ ରେଡ୍ଡୀ ବିଧାନସଭା ନିର୍ବାଚନରେ ​​ବିଆରଏସକୁ ପରାସ୍ତ କରି ତେଲେଙ୍ଗାନାରେ ଦଳକୁ କ୍ଷମତାକୁ ଆଣିବାରେ ସଫଳ ହୋଇଥିଲେ ।