ରାଜ୍ୟସଭାରେ ପାସ୍ ହୋଇଛି ପୋଷ୍ଟ ଅଫିସ ବିଲ୍ ୨୦୨୩, ଜାଣନ୍ତୁ ଏହା କିପରି ବଦଳାଇବ ଡାକଘରର ରୂପରେଖ

Post Office Bill 2023: ୨୫ ବର୍ଷ ପୁରୁଣା ଭାରତୀୟ ଡାକ କାର୍ଯ୍ୟାଳୟ ଅଧିନିୟମରେ ସଂଶୋଧନ କରିବାକୁ ରାଜ୍ୟସଭାରେ ପୋଷ୍ଟ ଅଫିସ ବିଲ୍ ୨୦୨୩ ପାରିତ କରିଛି । ୧୧ ଅଗଷ୍ଟରେ ରାଜ୍ୟସଭାରେ ଏହି ବିଲ୍ ଆଗତ କରାଯାଇଥିଲା । ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ (Ashwini Vaishnaw) ଦ୍ୱାରା ଆଗତ ଏହି ବିଲ୍ ଡାକଘର ସମ୍ବନ୍ଧୀୟ ଭାରତୀୟ ଆଇନରେ ସଂଶୋଧନ ତଥା ଏକୀଭୂତ କରିବା ତଥା ଏହା ସହ ଜଡିତ ଥିବା ବିଷୟକୁ ବିଚାର କରିବାକୁ ପ୍ରଚେଷ୍ଟା କରିଛି । ପୋଷ୍ଟ ଅଫିସ ବିଲ୍ ୨୦୨୩ ଉପରେ ଆଲୋଚନା ପରେ ରାଜ୍ୟସଭାକୁ ସମ୍ବୋଧିତ କରି ଅଶ୍ୱିନୀ ବୈଷ୍ଣବ କହିଛନ୍ତି ଯେ ଡାକଘରକୁ ଘରୋଇକରଣ କରିବାକୁ ସରକାରଙ୍କର କୌଣସି ଉଦ୍ଦେଶ୍ୟ ନାହିଁ । ସଂସଦରେ ପୋଷ୍ଟ ଅଫିସ ବିଲ୍ ୨୦୨୩ ଉପରେ ଆଲୋଚନା ବେଳେ ଅନେକ ସାଂସଦ ଏହି ପ୍ରସଙ୍ଗରେ ଉଦ୍ବେଗ ପ୍ରକାଶ କରିଥିଲେ ।

୫୦୦୦ ଡାକଘର ଖୋଲାଯାଇଛି
ମନ୍ତ୍ରୀ କହିଛନ୍ତି ଯେ ଏକ ସମୟରେ ଏହା ଲାଗୁଥିଲା ଯେ ଡାକ ସେବା ଅପ୍ରାସଙ୍ଗିକ ହୋଇଯିବ ଓ ବିଶେଷକରି ୟୁପିଏ ଶାସନ କାଳରେ ଏପରି ପରିସ୍ଥିତି ଉପୁଜିଥିଲା,​ଯେତେବେଳେ ଡାକଘରକୁ ପର୍ଯ୍ୟାୟକ୍ରମେ ବନ୍ଦ କରିବାକୁ ପଡିଥିଲା । ବୈଷ୍ଣବ କହିଛନ୍ତି ଯେ ୨୦୦୪ ରୁ ୨୦୧୪ ପର୍ଯ୍ୟନ୍ତ ୬୬୦ ଡାକଘର ବନ୍ଦ ରହିଥିଲା, କିନ୍ତୁ ୨୦୧୪ ରୁ ୨୦୨୩ ପର୍ଯ୍ୟନ୍ତ ପ୍ରାୟ ୫୦୦୦ ଡାକଘର ଖୋଲାଯାଇଛି ଓ ପ୍ରାୟ ୫,୭୪୬ଟି ନୂଆ ଖୋଲିବା ପ୍ରକ୍ରିୟାରେ ଅଛି ।

ସେ କହିଛନ୍ତି, ୧.୬ ଲକ୍ଷ ଡାକଘର କୋର-ବ୍ୟାଙ୍କିଙ୍ଗ ଏବଂ ଡିଜିଟାଲ-ବ୍ୟାଙ୍କିଙ୍ଗ ସୁବିଧା ସହିତ ସଂଯୁକ୍ତ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପରାମର୍ଶ ଅନୁଯାୟୀ ୪୩୪ ଡାକଘରରେ ୧.୨୫ କୋଟିରୁ ଅଧିକ ପାସପୋର୍ଟ ଆବେଦନ ପ୍ରକ୍ରିୟାକରଣ କରିଛି ଓ ୧୩,୫୦୦ ଡାକଘର ଆଧାର ସେବା କେନ୍ଦ୍ର ଖୋଲାଯାଇଛି । ବୈଷ୍ଣବ ଏହା ମଧ୍ୟ କହିଛନ୍ତି ଯେ ଡାକ ବ୍ୟବସ୍ଥାକୁ ରୂପାନ୍ତର କରିବା ପାଇଁ ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କ ଏକ ପ୍ରମୁଖ ମାଧ୍ୟମ ଅଟେ । ମହିଳାମାନଙ୍କ ପାଇଁ ୩.୫ କୋଟି ଆକାଉଣ୍ଟ ଖୋଲିଛି ।

ପୋଷ୍ଟ ଅଫିସ ବିଲ୍ ୨୦୨୩ ଉଦ୍ଦେଶ୍ୟ କ’ଣ?
ପୋଷ୍ଟ ଅଫିସ ବିଲ୍ ୨୦୨୩ର ଉଦ୍ଦେଶ୍ୟ ହେଉଛି ଭାରତୀୟ ଡାକଘର ଅଧିନିୟମ ୧୮୯୮ କୁ ରଦ୍ଦ କରିବା ଓ ଦେଶରେ ଡାକଘର ସମ୍ବନ୍ଧୀୟ ଆଇନକୁ ଏକାଠୀ କରିବା ଓ ସଂଶୋଧନ କରିବା । ଡାକ ସେବାଗୁଡିକର ମହାନିର୍ଦ୍ଦେଶକଙ୍କୁ ସେହି ସେବା ଯୋଗାଇବା ପାଇଁ ଆବଶ୍ୟକ କାର୍ଯ୍ୟକଳାପ ସମ୍ବନ୍ଧରେ ନିୟମ ପ୍ରସ୍ତୁତ କରିବାକୁ ତଥା ଏହି ସେବାଗୁଡିକ ପାଇଁ ଦେୟ ସ୍ଥିର କରିବାକୁ ବିଲ୍ ଶକ୍ତି ପ୍ରଦାନ କରିଥାଏ । ବିଲ୍ ଅନୁଯାୟୀ, ଏହି ଆଇନ ପ୍ରସ୍ତୁତ ହେବା ପରେ ଯଦି କାହାର ପାର୍ସଲ ହଜିଯାଏ କିମ୍ବା ନଷ୍ଟ ହୋଇଯାଏ ତେବେ ଡାକ ଅଧିକାରୀଙ୍କ ବିରୋଧରେ କୌଣସି ମାମଲା ଦାୟର ହୋଇପାରିବ ନାହିଁ । ବିଲ୍ ରେ ଡାକ ଅଧିକାରୀଙ୍କ ସୁରକ୍ଷା ପାଇଁ ବ୍ୟବସ୍ଥା ରହିଛି ।

ଅଶ୍ୱିନୀ ବୈଷ୍ଣବ କହିଛନ୍ତି ଯେ ୧୨୫ ବର୍ଷ ପୁରୁଣା ଡାକଘର ଅଧିନିୟମକୁ ସଂଶୋଧନ କରୁଥିବା ପୋଷ୍ଟ ଅଫିସ ବିଲ୍ ୨୦୨୩, ଏନଡିଏ ଶାସନ ଅନୁଯାୟୀ ଗତ ନଅ ବର୍ଷ ମଧ୍ୟରେ ଡାକଘର ଓ ଡାକ ସଂସ୍ଥା କିପରି ପୁନର୍ଜୀବିତ ହୋଇଛି ତାହାର ପ୍ରତିଫଳନ ।