ନୂଆ ସଂସଦ ଭବନ ଉପରେ ବିରାଟ 'ଅଶୋକ ସ୍ତମ୍ଭ', ପୂଜାପାଠ ପରେ ଉନ୍ମୋଚନ କଲେ ପ୍ରଧାନମନ୍ତ୍ରୀ

ନୂଆ ସଂସଦ ଭବନ ଉପରେ ଶୋଭା ପାଉଥିବା ଶୌର୍ଯ୍ୟ ଓ ସାହସିକତାର ପ୍ରତୀକ ଅଶୋକ ସ୍ତମ୍ଭ ସମ୍ପୂର୍ଣ୍ଣ ଭାବେ ବ୍ରୋଞ୍ଜରେ ନିର୍ମିତ ହୋଇଛି । ଆଜି ଏହି ଉନ୍ମୋଚନ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ସମେତ ଲୋକସଭା ବାଚସ୍ପତି ଓମ ବିର୍ଲା, ରାଜ୍ୟସଭା ଉପାଧ୍ୟକ୍ଷ ହରିବଂଶ ନାରାୟଣ ସିଂ, କେନ୍ଦ୍ରମନ୍ତ୍ରୀ ହରଦୀପ ସିଂ ପୁରୀ, କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ ମଧ୍ୟ ଉପସ୍ଥିତ ଥିଲେ । ପ୍ରଧାନମନ୍ତ୍ରୀ ମୋଦି ଉନ୍ମୋଚନ କରିବା ପରେ ସ୍ତମ୍ଭ ଚତୁଃପାର୍ଶ୍ବ ପରିଦର୍ଶନ କରିଥିଲେ।

ଏହାପରେ ପ୍ରଧାନମନ୍ତ୍ରୀ ସେଠାକାର ନିର୍ମାଣ କାର୍ଯ୍ୟରେ ନିୟୋଜିତ ଶ୍ରମିକଙ୍କ ସହ ଆଲୋଚନା ମଧ୍ୟ କରିଥିଲେ । ନୂତନ ସଂସଦ ଭବନର ଛାତ ଉପରେ ଜାତୀୟ ପ୍ରତୀକର ଉନ୍ମୋଚନ ଅବସରରେ ବିଶେଷ ପୂଜାପାଠର ଆୟୋଜନ କରାଯାଇଥିଲା ।

ସେଣ୍ଟ୍ରାଲ ଭିସ୍ତା ପ୍ରକଳ୍ପ ଅଧୀନରେ ପୁରୁଣା ତଥା ବର୍ତ୍ତମାର ସଂସଦ ଭବନର ଠିକ ନିକଟରେ ଏହି ନୂତନ ତଥା ଅତ୍ୟାଧୁନିକ ସଂସଦ ଭବନ ନିର୍ମାଣ କରାଯାଉଛି । ବିଶ୍ବର ସର୍ବବୃହତ ଗଣତନ୍ତ୍ରର ସର୍ବୋଚ୍ଚ ଗୃହ ଭାବେ ଏହା ଭାରତର ଗାରିମା ବଢାଇବ । ଏହି ପ୍ରକଳ୍ପକୁ ପ୍ରଧାନମନ୍ତ୍ରୀଙ୍କ ଡ୍ରିମ ପ୍ରୋଜେକ୍ଟ ମଧ୍ୟ କୁହାଯାଉଛି । ଆଜିର କାର୍ଯ୍ୟକ୍ରମ ପରେ ପ୍ରଧାନମନ୍ତ୍ରୀ, ନୂତନ ସଂସଦ ଭବନ ନିର୍ମାଣ କାର୍ଯ୍ୟର ନୀରିକ୍ଷଣ କରିଥିଲେ ।

ଡିସେମ୍ବର ୨୦୨୦ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ନୂତନ ସଂସଦ ଭବନର ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା । ଯୋଜନା ଅନୁଯାୟୀ, ନୂତନ କୋଠାଟି ଏକ ଚାରି ମହଲା ବିଶିଷ୍ଟ ଢ଼ାଞ୍ଚାରେ ପ୍ରସ୍ତୁତ ହେବ ଯେଉଁଥିରେ ୧୨୨୪ ଜଣ ବସିବାର କ୍ଷମତା ରହିବ । ପ୍ରଥମେ ଏହାର ମୋଟ ଅଟକଳ ମୂଲ୍ୟ ୯୭୦ କୋଟି ଟଙ୍କା ଆକଳନ କରାଯାଇଛି । ଏହା ବର୍ତ୍ତମାନର ଉପନିବେଶ ସଂରଚନାକୁ ବଦଳାଇବ, ଯାହା ୨୦୨୧ରେ ୧୦୦ ବର୍ଷ ପୂରଣ କରିଥିଲା ।

ସରକାରଙ୍କ ତରଫରୁ ଏକ ବିବୃତ୍ତିରେ କୁହାଯାଇଥିଲା ଯେ, ତ୍ରିଭୁଜ ଆକାର (triangular in shape)ର ଏହି ନୂତନ ସଂସଦ ଭବନ ଗଠନ 'ଆତ୍ମନିର୍ଭର ଭାରତ' (Aatmanirbhar Bharat)ର ଦର୍ଶନର ଏକ ଅନ୍ତର୍ନିହିତ ଅଂଶ ହେବ । ସ୍ୱାଧୀନତା ପରେ ପ୍ରଥମ ଥର ପାଇଁ ସଂସଦ (Parliament) ଗଠନ ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ସୁଯୋଗ ହେବ । ୨୦୨୨ ରେ ସ୍ୱାଧୀନତା (Independence) ର ୭୫ତମ ବାର୍ଷିକୀ (75th anniversary)ରେ 'ନ୍ୟୁ ଇଣ୍ଡିଆ'ର ଆବଶ୍ୟକତା ଏବଂ ଆକାଂକ୍ଷାର ଅନୁରୂପ ହେବ ।

୨୦୨୦ରେ ୯୭୧ କୋଟି ଟଙ୍କାରେ ଟାଟା ପେଜକ୍ଟସ୍ ନୂଆ ସଂସଦ ଭାବନ ନିର୍ମାଣର ଟେଣ୍ଡର ପାଇଥିଲା । ୨୦୨୨ ଅକ୍ଟୋବର ସୁଦ୍ଧା ଏହାର ନିର୍ମାଣ କାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଛି।