Rourkela News: ୨୪ ଘଣ୍ଟା ପର୍ଯ୍ୟନ୍ତ ଦିବ୍ୟାଙ୍ଗ ଝିଅର ଅନ୍ତିମ ସଂସ୍କାର କରିପାରିଲେନି ଅସହାୟ ମା', କାରଣ ଜାଣିଲେ ହେବେ ଚକିତ

Rourkela News: ପୁଣି ଲଜ୍ଜିତ ହେଲା ମାନବିକତା । ଝିଅ ପାଇଁ ମିଳିଲା ନାହିଁ ଅନ୍ତିମ ସଂସ୍କାର କରିବାର ସ୍ଥାନ । ଝିଅର ମୃତଦେହକୁ ନେଇ ଜଣେ ମା' କବରସ୍ଥାନ ଠାରୁ ଆରମ୍ଭ କରି ଶ୍ମଶାନ ପର୍ଯ୍ୟନ୍ତ ଘୁରି ବୁଲିଲେ । କିନ୍ତୁ ୨୪ ଘଣ୍ଟା ଧରି ନିଜ ଝିଅର ଅନ୍ତିମ ସଂସ୍କାର କରିପାରିଲେ ନାହିଁ ଅସହାୟ ମା' । ମା'ର ଦୋଷ ଥିଲା ଯେ ସେ ଜଣେ ହିନ୍ଦୁ ଓ ସେ ଜଣେ ମୁସଲମାନ ଯୁବକଙ୍କୁ ବିବାହ କରିଥିଲେ । କିନ୍ତୁ ବର୍ତ୍ତମାନ ସ୍ୱାମୀ ତାଙ୍କ ସହ ଏକାଠି ରୁହନ୍ତି ନାହିଁ । ଯେଉଁଥିପାଇଁ ତାଙ୍କୁ ଏହି ଯନ୍ତ୍ରଣା ଭୋଗିବାକୁ ପଡିଲା । ଏହା ଏକ କାଳ୍ପନିକ କାହାଣୀ ନୁହେଁ, ଏପରି ଘଟଣା ଦେଖିବାକୁ ମିଳିଛି ଆମ ରାଜ୍ୟର ରାଉରକେଲାରେ ।

ବେଦବ୍ୟାସର IDC ଗେଟ୍ ନିକଟରେ ଏକ ବସ୍ତିରେ ରହୁଥିବା ନୁତନ ଓରାମଙ୍କ ସହ ଏପରି ଘଟିଛି, ତାଙ୍କୁ ଏପରି ଦୁଃଖ ଓ ଯନ୍ତ୍ରଣା ମଧ୍ୟ ଦେଇ ଗତି କରିବାକୁ ପଡିଛି । ମାନବିକତା ପାଇଁ ଲଜ୍ଜାଜନକ ଏହି ଘଟଣା ବିଷୟରେ ଯେତେବେଳେ କିଛି ସାମାଜିକ କର୍ମୀ  ଜାଣିବାକୁ ପାଇଲେ ସେମାନେ ନୁତନ ଓରାମଙ୍କୁ ଭେଟିଥିଲେ । ଏହା ପରେ ସେମାନେ ବ୍ରାହ୍ମଣୀତରଙ୍ଗ ପୋଲିସ ଷ୍ଟେସନର ଅଧିକାରୀଙ୍କୁ ନୁତନ ଓରାମଙ୍କ ଦୁଃଖଦ ଘଟଣା ବିଷୟରେ ଅବଗତ କରାଇଥିଲେ । ବ୍ରାହ୍ମଣୀତରଙ୍ଗ ପୋଲିସ ଷ୍ଟେସନର ହସ୍ତକ୍ଷେପ ପରେ ଗୁରୁବାର ରାତିରେ କାଲୁଙ୍ଗାର ସମାଧିସ୍ଥଳ (ମୁସଲମାନଙ୍କ କବରସ୍ଥାନ) ରେ ନିରୀହ ଦିବ୍ୟାଙ୍ଗ ଝିଅର ଅନ୍ତିମ ସଂସ୍କାର କରାଯାଇଥିଲା । 

ଏଠାରେ କହି ରଖୁଛୁ ଯେ, ନୁତନ ଓରାମ ୧୨ ବର୍ଷ ପୂର୍ବେ ଧାନବାଦର ଗୋବିନ୍ଦପୁରର ବାସିନ୍ଦା କରିମ ଅନସାରୀଙ୍କୁ ବିବାହ କରିଥିଲେ । ପରେ ସେ ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ । ଯିଏ ଜନ୍ମରୁ ଦିବ୍ୟାଙ୍ଗ ଥିଲା । ପେଶା ଅନୁଯାୟୀ ଟ୍ରକ ଡ୍ରାଇଭର କରିମ ଅନସାରୀ ପାଞ୍ଚ ବର୍ଷ ପୂର୍ବେ ରାଉରକେଲାରୁ ଧାନବାଡ ଯାଇ ଆଉ ଫେରି ନଥିଲେ । ଏହି ସମୟରେ ନୁତନ ଓରାମ ଦୈନିକ ମଜୁରୀ କରି ଦିବ୍ୟାଙ୍ଗ ଝିଅର ଲାଲନପାଳନ କରିବାକୁ ଲାଗିଲେ । ତାଙ୍କୁ ଦଶ ବର୍ଷ ବୟସ ହୋଇଥିଲା । ଅନେକ ରୋଗରେ ପୀଡିତ ନିରୀହ ଝିଅ ବୁଧବାର ସନ୍ଧ୍ୟା ୪ଟାରେ ଶେଷ ନିଶ୍ୱାସ ତ୍ୟାଗ କରିଥିଲା । ଝିଅର ବାପା ପାଖରେ ନଥିଲେ, ଯେଉଁ କାରଣରୁ ନୁତନ ଓରାମ ସମାଜର ରୀତିନୀତି ଅନୁଯାୟୀ ନିକଟସ୍ଥ ଶ୍ମଶାନକୁ ଯାଇଥିଲେ । କିନ୍ତୁ ସେଠାକୁ ଯିବା ପରେ ଆଧାର କାର୍ଡରୁ ଜଣାପଡିଥିଲା ଯେ ତାଙ୍କ ପିତା ମୁସଲମାନ ଥିଲେ ।

ଫଳରେ ଶ୍ମଶାନରେ ଦିବ୍ୟାଙ୍ଗ ଝିଅର ଅନ୍ତିମ ସଂସ୍କାର କରାଯାଇ ନଥିଲା । ଏହା ପରେ ମୃତଦେହକୁ କବର ଦେବା ପାଇଁ ରାଉରକେଲାର ମହତାବ ରୋଡରେ ଅବସ୍ଥିତ କବରସ୍ଥାନକୁ ନିଆଯାଇଥିଲା । କିନ୍ତୁ ନୁତନ ଓରାମଙ୍କ ପାଖରେ କରିମ ଅନସାରୀଙ୍କ ସହ ହୋଇଥିବା ନିକାହ (ବିବାହ) ର କୌଣସି ପ୍ରମାଣ ନଥିଲା । ଯେଉଁ କାରଣରୁ ତାଙ୍କୁ ସେଠାରୁ ମଧ୍ୟ ଫେରାଇ ଦିଆଯାଇଥିଲା । ଏହି ମଧ୍ୟ ୨୪ ଘଣ୍ଟାରୁ ଅଧିକ ସମୟ ଅତିବାହିତ ହୋଇସାରିଥିଲା ।