INDvsAUS: વિરાટના હોમગ્રાઉન્ડમાં ભારત 35 રને હાર્યું, ઓસ્ટ્રેલિયાનો 3-2થી શ્રેણી વિજય

નવી દિલ્હીઃ ઓસ્ટ્રેલિયાની યુવા ટીમે ફિરોઝશાહ કોટલા મેદાન પર સિરીઝના અંતિમ અને નિર્ણાયક વનડેમાં ભારતને 35 રને પરાજય આપીને પાંચ મેચોની સિરીઝ 3-2થી પોતાના નામે કરી લીધી છે. પ્રથમ બે વનડે ગુમાવ્યા બાદ ઓસ્ટ્રેલિયાની ટીમે શાનદાર પ્રદર્શન કરીને ભારતીય ટીમને સતત ત્રણ વનડે મેચોમાં હરાવીને આ સિરીઝ પોતાના નામે કરી છે. પ્રથમ બેટિંગ કરતા ઓસ્ટ્રેલિયાએ ઉસ્માન ખ્વાજા (100) અને પીટર હૈંડ્સકોમ્બ (52) તથા ઝાય રિચર્ડસનના ઉપયોગી (29) રનની મદદથી ઓસ્ટ્રેલિયાએ 9 વિકેટે 272 રન બનાવ્યા હતા. જેના જવાબમાં ભારતીય ટીમ 50 ઓવરમાં 237 રન બનાવી ઓલઆઉટ થઈ ગયું હતું. ભારત તરફથી એકમાત્ર રોહિત શર્માએ અડધી સદી ફટકારી હતી.  મેચમાં અને સિરીઝમાં શાનદાર પ્રદર્શન કરનાર ઉસ્માન ખ્વાજાને મેન ઓફ ધ મેચ અને મેન ઓફ ધ સિરીઝ જાહેર કરવામાં આવ્યો હતો. 

ઓસ્ટ્રેલિયાએ પ્રથમ બે વનડે ગુમાવ્યા બાદ સિરીઝ જીતી
ભારતના પ્રવાસે આવેલી ઓસ્ટ્રેલિયન ટીમ પાસે કોઈને સિરીઝ જીતવાની આશા નહતી. ભારતને ટી20 સિરીઝમાં 2-0થી હરાવ્યા બાદ ઓસ્ટ્રેલિયાની ટીમે પ્રથમ બે વનડે મેચ ગુમાવી હતી. પ્રથમ બંન્ને વનડે રોમાંચક તબક્કામાં પહોંચીને ઓસ્ટ્રેલિયાએ મેચ ગુમાવી હતી. ત્યારે કોઈને પણ આશા નહતી કે ભારતીય ટીમ આ સિરીઝ ગુમાવી દેશે. પરંતુ ઓસ્ટ્રેલિયાની યુવા ટીમે શાનદાર વાપસી કરતા રાંચી વનડેમાં ભારતને 32 રનથી પરાજય આપ્યો હતો. ત્યારબાદ મોહાલીમાં રેકોર્ડબ્રેક 358 રનચેઝ કરીને ભારતને 4 વિકેટે પરાજય આપ્યો હતો. આ સાથે ભારતે વર્ષ 2015-16 બાદ ઘરઆંગણે વનડે સિરીઝ ગુમાવી છે. ત્યારે ભારતને સાઉથ આફ્રિકાએ પાંચ મેચોની વનડે સિરીઝમાં 3-2થી પરાજય આપ્યો હતો. 

ઓસ્ટ્રેલિયાએ લીધો બદલો
ઉલ્લેખનીય છે કે, ભારતીય ટીમે હાલમાં ઓસ્ટ્રેલિયાના પ્રવાસ દરમિયાન વનડે સિરીઝ 2-1થી પોતાના નામે કરી હતી. ઓસ્ટ્રેલિયાએ આ સિરીઝ હારનો બદલો લેતા ભારતને ઘરઆંગણે પરાજય આપ્યો છે. 

ભારતની ખરાબ શરૂઆત
મોહાલીમાં શાનદાર સદી ફટકારનાર શિખર ધવન (12) પેટ કમિન્સનો શિકાર બન્યો હતો. તેણે 15 બોલનો સામનો કરતા બે બાઉન્ડ્રી ફટકારી હતી. ભારતે 15 રન પર પોતાની પ્રથમ વિકેટ ગુમાવી હતી. ત્યારબાદ કેપ્ટન કોહલી અને રોહિત શર્માએ બીજી વિકેટ માટે 53 રનની ભાગીદારી કરી હતી. પરંતુ ભારતીય કેપ્ટન વિરાટ કોહલી (20)ને સ્ટોઇનિસે વિકેટકીપરના હાથે કેચઆઉટ કરાવીને ભારતને બીજો ઝટકો આપ્યો હતો. ભારતે 68 રનના સ્કોરે બે વિકેટ ગુમાવી દીધી હતી. 

રોહિત શર્માએ ફટકારી અડધી સદી
ભારતીય ટીમ એકતરફ વિકેટ ગુમાવી રહી હતી, બીજીતરફ ઓપનર રોહિત શર્મા એક છેડો સાચવીને બેટિંગ કરી રહ્યો હતો. તેણે પોતાના વનડે કરિયરની 41મી અડધી સદી પૂરી કરી હતી. આ સાથે રોહિત શર્માએ વનડેમાં 8000 રન પૂરા કરવાની સિદ્ધિ મેળવી હતી. તે વનડેમાં સૌથી ઝડપી 8000 રન પૂરા કરનારો વિશ્વનો ત્રીજો ખેલાડી બની ગયો છે. રોહિત શર્મા (56)ને એડમ ઝમ્પાએ આઉટ કર્યો હતો. તેણે 89 બોલમાં ચાર બાઉન્ડ્રી ફટકારી હતી. 

રિષભ પંતે તક ગુમાવી
ભારતીય ટીમે યુવા વિકેટકીપર રિષભ પંતને આજે ચોથા ક્રમે બેટિંગમાં તક આપી હતી. પંત કેપ્ટન કોહલી આઉટ થયા બાદ ક્રિઝ પર આવ્યો હતો. આ સમયે ભારતને એક મોટી ભાગીદારીની જરૂર હતી. જેથી પંતે લાંબા સમય સુધી બેટિંગ કરવાની જરૂર હતી. તેણે શરૂઆતમાં જ એક ફોર અને એક સિક્સ ફટકારી હતી. પરંતુ 16 બોલમાં 16 રન બનાવીને તે નાથન લાયનનો શિકાર બન્યો હતો. આમ તેણે ચોથા ક્રમે મળેલી તક ગુમાવી દીધી હતી. 

તો વિજય શંકર (16) રન બનાવી એડમ ઝમ્પાનો શિકાર બન્યો હતો. સિક્સ મારવાના પ્રયાસમાં બાઉન્ડ્રી પર ખ્વાજાને કેચ આપી બેઠો હતો. રવિન્દ્ર જાડેજા (0)ને પણ એડમ ઝમ્પાએ આઉટ કરીને ભારતને છઠ્ઠો ઝટકો આપ્યો હતો. 

ભુવનેશ્વર-કેદાર જાધવ વચ્ચે 91 રનની ભાગીદારી
ભારતીય ટીમે એક સમયે 132 રન પર છ વિકેટ ગુમાવી દીધી હતી. ત્યારે લાગી રહ્યું હતું કે, ભારતીય ટીમ 200 રન પહેલા ઓલઆઉટ થઈ જશે. પરંતુ ભુવનેશ્વર કુમાર (46) અને કેદાર જાધવ (44)એ સાતમી વિકેટ માટે 91 રનની ભાગીદારી કરીને ભારતીય ટીમનો સ્કોર 200ને પાર પહોંચાડ્યો હતો. કેદાર જાધવે 57 બોલનો સામનો કરતા 4 ફોર અને 1 સિક્સ ફટકારી હતી. તેને ઝાય રિચર્ડસને આઉટ કર્યો હતો. તો ભુવનેશ્વર કુમારે 54 બોલમાં 3 ફોર અને 2 સિક્સ ફટકારી હતી. તેને પેટ કમિન્સે આઉટ કર્યો હતો. 

ઓસિ સ્પિનરોની શાનદાર બોલિંગ
ઓસ્ટ્રેલિયાના સ્પિનર નાથન લાયન અને એડમ ઝમ્પાએ શાનદાર બોલિંગ કરી હતી. બંન્નેએ ભારતના ટોપ ઓર્ડરને પેવેલિયન પરત મોકલી આપ્યા હતા. નાથન લાયને 10 ઓવરમાં એક મેડન સાથે 34 રન આપ્યા હતા અને એક વિકેટ ઝડપી હતી. તો એડમ ઝમ્પાએ 10 ઓવરમાં 46 રન આપીને ત્રણ વિકેટ ઝડપી હતી. 

પેટ કમિન્સે 10 ઓવરમાં 1 મેડન સાથે 38 રન આપીને 2 વિકેટ લીધી હતી. તો ઝાય રિચર્ડસન અને સ્ટોઇનિસને બે-બે સફળતા મળી હતી. 

ઓસ્ટ્રેલિયાની ઈનિંગ
ફરી એકવાર ઓસ્ટ્રેલિયન ઓપનર ટીમને સારી શરૂઆત અપાવવામાં સફળ રહ્યાં હતા. ખાસ કરીને ઉસ્માન ખ્વાજાએ આ સિરીઝમાં શાનદાર બેટિંગ કરી છે. તેણે એરોન ફિન્ચ સાથે મળીને પ્રથમ વિકેટ માટે 76 રનની ભાગીદારી કરી હતી. ભારતને પ્રથમ સફળતા ઈનિંગની 15મી ઓવરમાં મળી હતી. એરોન ફિન્ચ (27)ને રવિન્દ્ર જાડેજાએ બોલ્ડ કર્યો હતો. તેણે 43 બોલનો સામનો કરતા 4 બાઉન્ડ્રી ફટકારી હતી. તેના આઉટ થયા બાદ ખ્વાજાએ એક છેડો સાચવી રાખતા 48 બોલમાં પોતાની અડધી સદી પૂરી કરી હતી. આ સિરીઝમાં ખ્વાજાનો ચોથો 50+નો સ્કોર છે. આ તેના વનડે કરિયરની 8મી અડધી સદી છે. 

ઉસ્માન ખ્વાજાની બીજી સદી
ઓસ્ટ્રેલિયન ઓપનર ઉસ્માન ખ્વાજાએ આ સિરીઝમાં શાનદાર પ્રદર્શન જાળવી રાખતા ફિરોઝશાહ કોટલામાં સદી ફટકારી હતી. આ સિરીઝમાં તેની બીજી સદી છે. તેણે આ સિરીઝમાં બે અડધી સદી પણ ફટકારી છે. ખ્વાજાએ ભારતીય બોલરોનો શાનદાર સામનો કરતા પહેલા ફિસ્ચ સાથે 76 રનની અને પછી પીટર હૈંડ્સકોમ્બ સાથે બીજી વિકેટ માટે 99 રનની ભાગીદારી કરી હતી. 

હૈંડ્સકોમ્બની અડધી સદી મેક્સવેલ ફેલ
ઓસ્ટ્રેલિયાએ 175 રનના સ્કોર પર બીજી વિકેટ ગુમાવ્યા બાદ 182 રન પર ચોથી વિકેટ ગુમાવી દીધી હતી. પીટર હૈંડ્સકોમ્બે કોટલામાં અડધી સદી ફટકારી હતી. તે (52) શમીનો શિકાર બન્યો હતો. વિકેટની પાછળ રિષભ પંતે તેનો કેચ ઝડપ્યો હતો. તેણે 60 બોલનો સામનો કરતા 4 બાઉન્ડ્રી ફટકારી હતી. ઓસ્ટ્રેલિયાનો આક્રમક બેટ્સમેન ગ્લેન મેક્સવેલ (1)ને જાડેજાએ પેવેલિયન પરત મોકલીને ભારતને મોટી સફળતા અપાવી હતી. 

સારી શરૂઆત બાદ ઓસ્ટ્રેલિયાનો ધબડકો
ઓસ્ટ્રેલિયાએ એક સમયે 33 ઓવરમાં બે વિકેટે 175 રન બનાવી લીધા હતા. ત્યારે લાગતુ હતું કે, ટીમ મોટો સ્કોર 300ને પાર પહોંચી શકે છે. પરંતુ ભારતીય બોલરોએ શાનદાર વાપસી કરતા ઓસ્ટ્રેલિયાને મોટા સ્કોર સુધી પહોંચતા રોક્યું હતું. ઓસ્ટ્રેલિયાએ 175 રનના સ્કોર પર ઉસ્માન ખ્વાજા (100)ની વિકેટ ગુમાવી હતી. ત્યારબાદ ગ્લેન મેક્સવેલ (1), માર્કસ સ્ટોઇનિસ (20), એસ્ટોન ટર્નર (20) અને એલેક્સ કેરી (3) રન બનાવી આઉટ થઈ ગયા હતા. અંતમાં રિચર્ડસન (29) અને કમિન્સ (15) રન બનાવીને ઓસ્ટ્રેલિયાનો સ્કોર 270ને પાર કરાવ્યો હતો. 

કુલદીપે આપ્યા 74 રન, ભુવીની ત્રણ વિકેટ
ભારતના સ્ટાર સ્પિનર કુલદીપ યાદવ ફરી આ મેચમાં મોંઘો સાબિત થયો હતો. તેણે 10 ઓવરમાં 74 રન આપ્યા હતા. તેને એકમાત્ર સફળતા મળી હતી. આ સિવાય જાડેજાએ 10 ઓવરમાં 45 રન આપીને બે વિકેટ ઝડપી હતી. ભુવનેશ્વર કુમારે 10 ઓવરમાં 48 રન આપીને ત્રણ વિકેટ લીધી હતી. શમીને બે સફળતા મળી હતી. 

ભારત તરફથી ભુવનેશ્વરને 3, શમી અને જાડેજાને 2-2 સફળતા મળી હતી.