World Cup : વર્લ્ડ ચેમ્પિયનની હાર પર હાહાકાર, આખા ક્રિકેટ બોર્ડની હકાલપટ્ટી, આ કેપ્ટનને આપી મોટી જવાબદારી

નવી દિલ્હીઃ વર્લ્ડ કપ 2023માં શ્રીલંકાના ખરાબ પ્રદર્શનની અસર દેખાવા લાગી છે. શ્રીલંકાની સરકારે સમગ્ર ક્રિકેટ બોર્ડને બરતરફ કરી દીધું છે. શ્રીલંકાના ખેલ મંત્રાલયે સોમવારે આ માહિતી આપી છે. તમને જણાવી દઈએ કે શ્રીલંકાએ વર્લ્ડ કપમાં અત્યાર સુધી રમાયેલી 7 મેચમાંથી માત્ર 2 જ જીતી છે અને ટીમ સેમીફાઈનલની રેસમાંથી લગભગ બહાર થઈ ગઈ છે. ભારતે છેલ્લી મેચમાં શ્રીલંકાને 302 રનના વિશાળ અંતરથી હરાવતાં દેશમાં હોબાળો મચી ગયો હતો અને રમત મંત્રાલયે આ અંગે પસંદગીકારોને સવાલ-જવાબ પણ પૂછ્યા હતા.

આ પહેલા ખેલ મંત્રી રોશન રણસિંઘેએ શુક્રવારે એક નિવેદનમાં શ્રીલંકન ક્રિકેટ બોર્ડને “દેશદ્રોહી અને ભ્રષ્ટ” ગણાવ્યું હતું. તેમણે બોર્ડના સભ્યોના રાજીનામાની માંગણી કરી હતી. ત્યારબાદ, શ્રીલંકા ક્રિકેટ સચિવ મોહન ડી સિલ્વા, બોર્ડના બીજા ક્રમના સર્વોચ્ચ અધિકારીએ શનિવારે તેમના પદ પરથી રાજીનામું આપ્યું કારણ કે ક્રિકેટ ચાહકોએ ટીમની હાર પર તેમની ઓફિસની બહાર પ્રદર્શન કર્યું હતું.

આ પણ વાંચોઃ સતત 8 મેચ જીતનારી ટીમ ઈન્ડિયાને PAKના પૂર્વ કેપ્ટને આપી ચેતવણી, કહ્યું-અસલ ખતરો તો..

રમતગમત મંત્રીના કાર્યાલયમાંથી જારી કરાયેલા એક નિવેદનમાં કહેવામાં આવ્યું છે કે મંત્રીએ સોમવારે શ્રીલંકા ક્રિકેટ બોર્ડના બાકીના સભ્યોને બરતરફ કરી દીધા હતા અને તેમની જગ્યાએ વર્લ્ડ કપ વિજેતા ભૂતપૂર્વ કેપ્ટન અર્જુન રણતુંગાની અધ્યક્ષતાવાળી વચગાળાની સમિતિની રચના કરી હતી. રણતુંગાની સાથે સુપ્રીમ કોર્ટના બે નિવૃત્ત જસ્ટિસનો પણ 7 સભ્યોની સમિતિમાં સમાવેશ કરવામાં આવશે.

તમને જણાવી દઈએ કે હાલમાં શ્રીલંકા વર્લ્ડ કપ 2023ના પોઈન્ટ ટેબલમાં 7મા સ્થાને છે અને સોમવારે દિલ્હીમાં તેનો મુકાબલો બાંગ્લાદેશ સામે થશે. આ મેચ જીતીને શ્રીલંકા 2025ની ચેમ્પિયન્સ ટ્રોફી માટે ક્વોલિફાય થવા માંગશે.

લેટેસ્ટ ન્યૂઝથી અપડેટ રહેવા માટે અમારી Zee 24 Kalak App ડાઉનલોડ કરો, અમારી સાથે જોડાઓ : facebook | twitter | youtube