Photos : જ્યાં સુધી આકરા તાપમાં પરસેવો ન પાડે, ત્યાં સુધી આ ગામની મહિલાઓને પાણી મળતુ નથી

પંચમહાલ જિલ્લાના અંતરિયાળ વિસ્તારોમાં ઉનાળાની શરૂઆત સાથે જ પાણીની તંગી દેખાઈ રહી છે. જિલ્લાના ઘોઘંબાના ધનેશ્વર ગામની મહિલાઓ અને બાળકો પાણીના બેડાં અને ખાલી વાસણો સાથે પાણીની રાહ જોતા દેખાય છે. પાણી માટે ગામ લોકોએ લગાવેલી લાઈન પરથી જ અંદાજ લગાવી શકાય છે કે, પાણીને લઈને ગામની સ્થિતિ કેવી હશે. ગામની મહિલાઓ એટલી મજબૂર બની છે કે, પાણી માટે બાળકોને પણ પાણીની લાઈનમાં રાખે છે. બાળકોના હાથમાં પાણીના બેડા જોઈએ તો મનમાં એક જ સવાલ ઉભો થાય છે કે, શુ આ છે ગુજરાતના બાળકોનું ભવિષ્ય.   

ધનેશ્વર ગામમાં છેલ્લા ચાર વર્ષથી પીવાના પાણીની સમસ્યા છે. તેમાં પણ ઉનાળો કાઢવો એટલે તેમને બે મહિના નર્કમાં કાઢવા જેવુ લાગે છે. ગામની મહિલાઓનો આખો દિવસ પાણીની પળોજણમાં જ નીકળી જાય છે. પાણીની સમસ્યાનું નિવારણ લાવવા માટે પંચાયત દ્વારા નર્મદાની પાણીની યોજના અંતર્ગત આખા ગામમાં પાણીના નળ બેસાડી દેવામાં આવ્યા છે, સાથે જ સંપ પણ બનાવી દેવામાં આવ્યો છે. પણ માત્ર કાગળ પર દેખાતી યોજનાના આ સંપમાં આજ દિન સુધી એક ટીપું પણ પાણી આવ્યુ નથી તેવુ ગામના અગ્રણી અરવિંદસિંહ પરમારે જણાવ્યું હતું.    

આમ ધનેશ્વર ગામમાં ઘરે ઘરે નળ બેસાડ્યા હોવા છતા, પણ લોકોને પાણી માટે બીજે વલખા મારવા પડે છે. ગામની મહિલાઓ જ્યાં સુધી પરસેવો ન પાડે, ત્યાં સુધી તેમને પાણી મળતુ નથી. અનેક રજૂઆતો છતા પણ નિંભર તંત્રના કાને કંઈ જ અથડાતુ નથી.