પહેલીવાર યુરોપમાં નહીં પણ વડોદરામાં બનશે મિલિટ્રીના વિમાન, 1 લાખ લોકોને મળશે રોજગારી

ગાંધીનગર: ગુજરાતને વેદાંત-ફોક્સકોન ગ્રુપનું જંગી રોકાણ બાદ ફરી એક મોટો પ્રોજેક્ટ મળ્યો છે. ટાટા અને એરબસ એ વડાપ્રધાન મોદીના ગૃહ રાજ્યમાં રૂ. 22,000 કરોડનું રોકાણ કરવાની જાહેરાત કરી છે. ટાટા અને એરબસ અહીં મિલિટ્રી માટે ટ્રાન્સપોર્ટ એરક્રાફ્ટ બનાવશે. રક્ષા સચિવ ડૉ. અજય કુમારે જણાવ્યું કે દેશમાં આ પ્રકારનો આ પહેલો પ્રોજેક્ટ છે જેના હેઠળ એક પ્રાઈવેટ કંપની સેનામાં ઉપયોગમાં લેવાતા એરક્રાફ્ટ બનાવશે.

આ પ્રોજેક્ટનો કુલ ખર્ચ 21,935 કરોડ રૂપિયા થશે. વડાપ્રધાન નરેન્દ્ર મોદી રવિવારે વડોદરામાં આ પ્લાન્ટનું ઉદ્ઘાટન કરશે. ગુજરાતમાં ટૂંક સમયમાં ચૂંટણી યોજાવા જઈ રહી છે. સરકાર આ પ્રોજેક્ટ માટે હજારો નોકરીઓનું વચન પણ આપી રહી છે. આ વર્ષે સપ્ટેમ્બરમાં ગુજરાત સરકારે વેદાંતા-ફોક્સકોન ગ્રૂપ સાથે રૂ. 1 લાખ 54 હજાર કરોડના પ્રોજેક્ટ માટે કરાર કર્યા હતા.

વેદાંત લિમિટેડ અને તાઈવાનની ફોક્સકોન સંયુક્ત રીતે ગુજરાતમાં સેમિકન્ડક્ટરનું ઉત્પાદન કરશે. તેનો પ્લાન્ટ અમદાવાદ નજીક સ્થાપવામાં આવશે. સરકારની વીજળી અંગે પણ સમજૂતી કરવામાં આવી છે. ગુજરાત સરકાર આ પ્રોજેક્ટ માટે વીજળીની સાથે અન્ય સુવિધાઓ પણ આપશે. દાવો કરવામાં આવ્યો છે કે આનાથી 1 લાખ લોકોને રોજગાર મળશે.

ટાટા-એરબસ અન્ય દેશોની સૈન્ય દ્વારા જરૂરી સાધનો અને ટેક્નોલોજી પર નિર્ભરતા ઘટાડવામાં મદદ કરી રહી છે. તેનાથી વડાપ્રધાનના મહત્વાકાંક્ષી અભિયાન 'મેક ઈન ઈન્ડિયા'ને પણ પ્રોત્સાહન મળી રહ્યું છે. ગયા મહિને કેન્દ્ર સરકારે એરબસ પાસેથી 56 ટ્રાન્સપોર્ટ એરક્રાફ્ટ ખરીદવાની જાહેરાત કરી હતી. કરાર મુજબ 16 એરક્રાફ્ટની ડિલિવરી ટૂંક સમયમાં કરવામાં આવશે અને બાકીનું ભારતમાં ઉત્પાદન કરવામાં આવશે.

એક સત્તાવાર નિવેદન અનુસાર, સપ્ટેમ્બર 2023 થી ઓગસ્ટ 2025 વચ્ચે 16 એરક્રાફ્ટ તૈયાર સ્થિતિમાં સોંપવામાં આવશે. જ્યારે, ગુજરાતમાં બનેલું પ્રથમ એરક્રાફ્ટ સપ્ટેમ્બર 2026 સુધીમાં ઉપલબ્ધ થશે. નવીનતમ C 295 એરક્રાફ્ટ એવરો એરક્રાફ્ટનું સ્થાન લેશે જે ખૂબ જૂના છે.

લેટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube