વિધાનસભાની વાતઃ દોઢ દાયકાથી ભાજપને વફાદાર અંજાર બેઠક આ વર્ષે કેવો બતાવશે મિજાજ? શું છે સ્થિતિ?

ઝી બ્યૂરો, અમદાવાદઃ ગુજરાત વિધાનસભાની ચૂંટણીની તારીખો જાહેર થઈ ચૂકી છે. પરંપરાગત ગણાતા ભાજપ-કોંગ્રેસ પક્ષ સહિત આ વખતે દિલ્લીથી આવેલી આમ આદમી પાર્ટી પણ ચૂંટણી મેદાનમાં છે. ત્યારે આ વખતે ગુજરાતમાં સામ-સામે જંગને બદલે ત્રિ-પાંખિયો ચૂંટણી જંગ ખેલાશે. રાજ્યની ચોથા નંબરની અને કચ્છની મહત્વની બેઠક એટલે અંજાર વિધાનસભા બેઠક. ઐતિહાસિકની સાથે રાજકીય મહત્વ ધરાવતા આ બેઠકમાં અંજાર તાલુકો અને ભુજ તાલુકાના કેટલાક ગામોનો સમાવેશ થાય છે. મંદિરોનું નગર કહેવાતું અંજાર કચ્છનું સૌનું જૂનું શહેર કહેવામાં આવે છે. આ વિધાનસભા મતવિસ્તારમાં 66 જેટલા ગામોનો સમાવેશ થાય છે.

શું છે અંજાર બેઠકનું સમીકરણ?
અંજાર વિધાનસભા બેઠક પર 2 લાખ 68 હજાર 185 મતદારો છે. જેમાંથી 1 લાખ 36 હજાર 952 પુરુષ મતદારો છે. જ્યારે  1 લાખ 31 હજાર 233 મહિલા મતદારો છે. અંજારમાં આહિર, દલિત અને મુસ્લિમ મતદારો વધારે છે. સાથે જ કડવા પટેલ અને ક્ષત્રિય જ્ઞાતિના લોકોનું પણ પ્રભુત્વ જોવા મળે છે. તો બ્રાહ્મણ અને લોહાણા સમાજના મત પણ અંજાર બેઠક માટે નિર્ણાયક બને છે.

શું છે અંજાર બેઠકનો ઈતિહાસ?
વર્ષ         વિજેતા ઉમેદવાર             પક્ષ
2017    વાસણભાઈ આહિર            ભાજપ
2017    વાસણભાઈ આહિર            ભાજપ
2007    ડૉ. નીમાબેન આચાર્ય         ભાજપ
2002    ડૉ. નીમાબેન આચાર્ય         કોંગ્રેસ
1998    વાસણભાઈ આહિર           ભાજપ
1995    વાસણભાઈ આહિર           ભાજપ
1990    નવીનભાઈ શાસ્ત્રી              કોંગ્રેસ
1985    નવીનભાઈ શાસ્ત્રી              કોંગ્રેસ
1980    ખીમજી જેસંગ                   કોંગ્રેસ
1975    ઠક્કર પ્રેમજીભાઈ               કોંગ્રેસ
1972    ખીમજી જેસંગ                   કોંગ્રેસ
1967    એન એચ ગઝવાની            કોંગ્રેસ
1962    મુળજી પરસોત્તમ               SWA

વર્ષ 2022માં શું થશે?
અત્યાર સુધીમાં અંજાર બેઠક પર 13 વાર વિધાનસભાની ચૂંટણી થઈ છે. જેમાંથી પાંચ વાર ભાજપ જીત્યું છે જ્યારે સાત વાર કોંગ્રેસ જીત્યું છે. ભૂતકાળમાં આ બેઠકને કોંગ્રેસનો ગઢ ગણવામાં આવતી હતી. જો કે, છેલ્લી 3 ટર્મથી અહીંથી ભાજપના ઉમેદવાર વિજેતા બન્યા છે. અહીંથી કોંગ્રેસ અને આમ આદમી પાર્ટીએ પોતાના ઉમેદવારો જાહેર કરી દીધા છે. અંજારથી કોંગ્રેસે રમેશ ડાંગર અને આમ આદમી પાર્ટીએ અરજણ રબારી છે.

ટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube