પાલનપુર પંથકમાં પાણીથી પરેશાન ખેડૂતો, 50 ગામોના અન્નદાતાઓએ શરૂ કર્યું જળ આંદોલન

અલકેશ રાવ, બનાસકાંઠાઃ પાલનપુર પંથકમાં પાણીના તળ ઊંડા જતા પાણી વગર ખેડૂતોને ખેતી અને પશુપાલન મુશ્કેલ થઈ રહી છે. આજે પાલનપુર પંથકના 50 ગામોના ખેડૂતોએ મલાણા ગામના તળાવમાં ભૂમિ પૂજન અને ગંગા આરતી કરીને પાણીની માંગને લઇને જળ આંદોલન શરૂ કર્યું છે. પાલનપુર તાલુકાના મલાણા ગામેથી 100 જેટલા ટ્રેકટરો દ્વારા હજારો ખેડૂતોએ રેલી કાઢી કલેકટરને આવેદન આપ્યું હતું.

પાલનપુર તાલુકાના મલાણા ગામ અને આજુબાજુના 50 ગામોમાં પાણીની વિકટ સમસ્યા ઉભી થઇ છે. જળાશયોમાં પાણી નથી. પાણીના તળ 1000 ફૂટ નીચે ગયા છે ત્યારે છેલ્લા 25 વર્ષથી મલાણા તળાવ ભરવાની માંગ છે. જોકે પશુપાલકો અને ખેડૂતોને પાણી ન મળતા ખેતીની સ્થિતિ ખરાબ છે. ત્યારે વારંવારની માગણી છતાં મલાણા સહિતના તળાવો ભરવામાં ન આવતાં મોટી સંખ્યામાં ખેડૂતો મલાણા ગામના તળાવમાં એકત્રિત થયા અને ત્યાં ભૂમિ પૂજન અને ગંગા આરતી કરીને ટ્રેક્ટરો દ્વારા મહારેલી કાઢીને પાલનપુર તરફ પ્રસ્થાન કર્યું હતું.

આ પણ વાંચોઃ આગામી ત્રણ દિવસમાં પૂર્વ અને દક્ષિણ-પૂર્વ ગુજરાતમાં અતિ સામાન્ય વરસાદની આગાહી

ટ્રેક્ટરો દ્વારા પાલનપુરના બિહારી બાગ પાસે પહોંચીને મોટી સંખ્યામાં ખેડૂતોએ એકત્રિત થઈને ત્યાંથી 5 કિલોમીટર ચાલીને પગપાળા મહારેલી કાઢીને કલેક્ટર કચેરી પહોંચ્યા હતા અને ત્યાં જઈને કલેક્ટરને આવેદનપત્ર પાઠવીને પાણીની માંગ કરી હતી. ખેડૂતોએ ચીમકી ઉચ્ચારી હતી કે જો અમને પાણી નહિ મળે તો અમે 50 ગામોના તમામ લોકો સાથે ધરણા ઉપર ઉતરીશું અને જરૂર પડશે તો ચૂંટણીનો બહિષ્કાર કરીશું અને અમારા તમામ પશુઓ સાથે સરકારી કચેરીઓ આગળ બેસી જઈશું.

પાલનપુર પંથક પશુપાલનના વ્યવસાય સાથે સંકળાયેલો છે અને પશુપાલનના વ્યવસાય માટે સિંચાઈ માટે પાણીની જરૂર હોય છે. જોકે પાલનપુર તાલુકામાં નથી કોઈ ડેમ કે નથી કોઈ તળાવ કોઈ કેનાલની પણ સુવિધા નથી. ત્યારે પશુપાલકોને પણ સિંચાઈના પાણી લઈને ખૂબ જ મુશ્કેલીઓ ભોગવવી પડતી હોય છે. છેલ્લા ૨૫ વર્ષથી સરકાર પાણીને લઇને લોલીપોપ આપી રહી છે ત્યારે આખરે ખેડૂતોને આંદોલનનો માર્ગ અપનાવવો પડયો છે.

લેટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube