Onion Prices: મોંધી ડુંગળીથી મળશે છુટકારો, વધતી કિંમતને રોકવા માટે શું છે સરકારનો પ્લાન?

Onion Price Hike: ડુંગળીના ભાવ ફરી આસમાને પહોંચ્યા છે. દરમિયાન, સરકાર ડુંગળીના ભાવને નિયંત્રણમાં રાખવાનો પ્રયાસ કરી રહી છે. આ માટે, તાજેતરમાં જ સરકારે બફર સ્ટોકમાંથી ખુલ્લા બજારમાં ડુંગળીની સપ્લાય કરી હતી જેથી કરીને ભાવને નિયંત્રિત કરી શકાય. આ ઉપરાંત સરકારે NCCF અને NAFED દ્વારા પણ સસ્તા દરે ડુંગળી વેચી હતી, જેથી ડુંગળીના વધતા ભાવને રોકી શકાય. હવે સરકારે મંગળવારે કહ્યું કે તે ડુંગળીના ભાવો પર નજીકથી નજર રાખી રહી છે અને અસ્થાયી પુરવઠાના અવરોધો વચ્ચે ભાવ સ્થિર કરવા માટે છૂટક બજારમાં બફર સ્ટોકમાંથી વધુ ડુંગળી છોડશે.

રાજધાનીમાં ડુંગળીનો છૂટક ભાવ 67 રૂપિયા પ્રતિ કિલો છે.

સરકારી ડેટા અનુસાર, રાજધાનીમાં ડુંગળીનો છૂટક ભાવ 67 રૂપિયા પ્રતિ કિલો છે, જ્યારે તેની સમગ્ર ભારતમાં સરેરાશ છૂટક કિંમત 58 રૂપિયા પ્રતિ કિલો છે. એક સરકારી નિવેદનમાં કહેવામાં આવ્યું છે કે, 'તહેવારોની મોસમ અને મંડીઓ બંધ હોવાને કારણે છેલ્લા 2-3 દિવસમાં કેટલાક બજારોમાં ડુંગળીના પુરવઠામાં કામચલાઉ વિક્ષેપને દૂર કરવા માટે સરકારે ડુંગળીનો પુરવઠો વધારવાનો નિર્ણય કર્યો છે.' આ અઠવાડિયે સહકારી સંસ્થા નાફેડે દિલ્હી-એનસીઆર માટે બે રેક અને ગુવાહાટી માટે એક રેકનો ઓર્ડર આપ્યો છે. તેવી જ રીતે, બજારમાં ડુંગળીની ઉપલબ્ધતા સુનિશ્ચિત કરવા માટે, માર્ગ પરિવહન દ્વારા માલસામાનમાં પણ વધારો કરવામાં આવશે.

સરકાર કિંમતોને સ્થિર કરવા માટે યોગ્ય પગલાં લઈ રહી છે,
સરકારે પંજાબ, હરિયાણા, ચંદીગઢ, હિમાચલ પ્રદેશ, જમ્મુ-કાશ્મીર, દિલ્હી વગેરેની જરૂરિયાતોને પહોંચી વળવા માટે સોનીપતના કોલ્ડ સ્ટોરેજમાં રાખવામાં આવેલી ડુંગળીને ઉતારવાનો પણ નિર્ણય લીધો છે. નિવેદનમાં કહેવામાં આવ્યું છે કે, "સરકાર બજારના વિકાસથી વાકેફ છે અને ડુંગળીના ભાવને સ્થિર કરવા માટે યોગ્ય પગલાં લઈ રહી છે." દરમિયાન, સરકારે કહ્યું કે મંડીઓમાં ભાવ ઘટવાથી ટામેટાંના છૂટક ભાવમાં ઘટાડો થઈ રહ્યો છે. 

આઝાદપુર મંડીમાં, સાપ્તાહિક સરેરાશ ભાવ 27 ટકા ઘટીને રૂ. 4,000 પ્રતિ ક્વિન્ટલ અને પિંપલગાંવ (મહારાષ્ટ્ર)માં સાપ્તાહિક સરેરાશ ભાવ 35 ટકા ઘટીને રૂ. 2,250 પ્રતિ ક્વિન્ટલ થયો છે. મદનપલ્લે (આંધ્ર પ્રદેશ)માં, સાપ્તાહિક સરેરાશ ભાવ 26 ટકા ઘટીને રૂ. 2,860 પ્રતિ ક્વિન્ટલ થયો છે છતાં કુલ સાપ્તાહિક આવકમાં 20 ટકાનો વધારો થયો છે. કોલાર (કર્ણાટક)માં સાપ્તાહિક સરેરાશ ભાવ 27 ટકા ઘટીને રૂ. 2,250 પ્રતિ ક્વિન્ટલ થયો છે. છેલ્લા ત્રણ મહિનાથી બટાકાની સરેરાશ છૂટક કિંમત 37 રૂપિયા પ્રતિ કિલોની આસપાસ રહી છે.