കമൽഹാസൻ, ഫഹദ് ഫാസിൽ, വിജയ് സേതുപതി എന്നിവർ അഭിനയിച്ച ആക്ഷൻ ചിത്രം വിക്രം, മണിരത്‌നത്തിന്റെ പൊന്നിയിൻ സെൽവൻ 1 തുടങ്ങിയ ബ്ലോക്ക്ബസ്റ്ററുകൾക്ക് ശേഷം, തമിഴ് സിനിമ പ്രേക്ഷകർക്ക് മുന്നിലേക്ക് മികച്ച സിനിമകൾ എത്തുമെന്ന് പ്രതീക്ഷിക്കുന്ന വർഷമാണ് 2023.
2023 ജനുവരിയിൽ പൊങ്കലിന് റിലീസ് ആകുന്ന വാരിസ് ഈ വർഷത്തെ ആദ്യത്തെ പ്രധാന തമിഴ് റിലീസായിരിക്കും. ദളപതി വിജയ്, രശ്മിക മന്ദാന എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രം സംവിധാനം ചെയ്യുന്നത് വംശി പൈഡിപ്പള്ളിയാണ്.
അജിത് കുമാർ നായകനാകുന്ന ആക്ഷൻ ത്രില്ലർ തുനിവ്, വാരിസുമായി ബോക്‌സ് ഓഫീസിൽ ഏറ്റുമുട്ടുന്ന ചിത്രമായിരിക്കും. നേർകൊണ്ട പാർവൈയ്ക്കും വലിമൈയ്ക്കും ശേഷം അജിത്തും സംവിധായകൻ എച്ച്. വിനോദും നിർമ്മാതാവ് ബോണി കപൂറും ഒന്നിക്കുന്ന തുടർച്ചയായ മൂന്നാമത്തെ ചിത്രമാണ് തുനിവ്.
ഐശ്വര്യ റായ് ബച്ചൻ, വിക്രം, കാർത്തി എന്നിവർ അഭിനയിച്ച മണിരത്‌നം സംവിധാനം ചെയ്ത പൊന്നിയിൻ സെൽവൻ 1 ബോക്‌സ് ഓഫീസിൽ 400 കോടിയിലധികം നേടി. അതിന്റെ തുടർച്ചയായ പൊന്നിയിൻ സെൽവൻ 2 2023ൽ റിലീസ് ചെയ്യുമെന്നാണ് പ്രതീക്ഷിക്കുന്നത്.
രജനികാന്ത് നായകനാകുന്ന ആക്ഷൻ കോമഡി ചിത്രം ജയിലർ ഏപ്രിൽ 14 ന് തമിഴ് പുതുവത്സര റിലീസിനായി ഒരുങ്ങുകയാണ്. റിലീസ് തീയതി ഔദ്യോഗികമായി പ്രഖ്യാപിച്ചിട്ടില്ല. ബീസ്റ്റ്, ഡോക്ടർ, കോലമാവ് കോകില എന്നീ ചിത്രങ്ങളിലൂടെ ശ്രദ്ധേയനായ നെൽസണാണ് ജയിലർ സംവിധാനം ചെയ്യുന്നത്.
23 വർഷത്തിന് ശേഷം കമൽഹാസൻ തന്റെ ഹിറ്റ് ചിത്രത്തിന്റെ രണ്ടാംഭാഗവുമായി എത്തും. ശങ്കർ ഷൺമുഖം സംവിധാനം ചെയ്യുന്ന ഇന്ത്യൻ 2 വിൽ കാജൽ അഗർവാൾ, ഗുൽഷൻ ഗ്രോവർ, സിദ്ധാർത്ഥ്, രാകുൽ പ്രീത് സിംഗ് എന്നിവരും അഭിനയിക്കുന്നു.
