Virat Kohli: ୧୫ ବର୍ଷ ପୂର୍ବେ ଅନ୍ତର୍ଜାତୀୟ କ୍ରିକେଟ୍ ରେ ପାଦ ଦେଇଥିଲେ 'କିଙ୍ଗ କୋହଲି', ଜାଣନ୍ତୁ ଏପର୍ଯ୍ୟନ୍ତ କିପରି ରହିଛି ତାଙ୍କ ଯାତ୍ରା

Virat Kohli 15 years in cricket: ଭାରତୀୟ ଦଳର ତାରକା ଖେଳାଳି ତଥା ଚେଜ୍ ମାଷ୍ଟର ଭାବରେ ଜଣାଶୁଣା ବିରାଟ କୋହଲି ଅନ୍ତର୍ଜାତୀୟ କ୍ରିକେଟ୍ ରେ ନିଜର ୧୫ ବର୍ଷ ପୂରଣ କରିଛନ୍ତି । ସେ ତାଙ୍କର ପ୍ରଥମ ମ୍ୟାଚ୍ ୧୮ ଅଗଷ୍ଟ ୨୦୦୮ ରେ ଶ୍ରୀଲଙ୍କା ବିପକ୍ଷରେ ଖେଳିଥିଲେ । କିଙ୍ଗ କୋହଲି ଏହି ମ୍ୟାଚରେ ବିଶେଷ କିଛି କରିପାରିନଥିଲେ ଓ ମାତ୍ର ୧୨ ରନ୍ ସ୍କୋର କରିବାରେ ସଫଳ ହୋଇଥିଲେ । ଅବଶ୍ୟ, ଏହା ପରେ ସେ ଏପରି ଏକ ଖେଳ ପ୍ରଦର୍ଶନ କରିଥିଲେ ଯାହା ଦୁନିଆର ସମସ୍ତ କ୍ରିକେଟରଙ୍କୁ ଆଶ୍ଚର୍ଯ୍ୟ କରିଥିଲା ​। ୧୫ ବର୍ଷ ବ୍ୟାପୀ ଏହି କ୍ୟାରିୟରରେ କୋହଲି ଅନେକ ସଫଳତା ହାସଲ କରିଛନ୍ତି, ଯାହା ତାଙ୍କୁ ଦୁନିଆର ସର୍ବଶ୍ରେଷ୍ଠ ଖେଳାଳି ଭାବରେ ପରିଣତ କରିଛି ।

ବିରାଟ କୋହଲିଙ୍କ ଏହି ରେକର୍ଡ ଯାହା ତାଙ୍କୁ ସ୍ୱତନ୍ତ୍ର କରିଥାଏ
ଦିଲ୍ଲୀରୁ ଆସିଥିବା ବିରାଟ କୋହଲି ଭାରତର ୨୦୧୧ ବିଶ୍ୱ ବିଜେତା ଦଳର ଏକ ଅଂଶ ଥିଲେ । ସେ ନିଜର ୧୫ ବର୍ଷର କ୍ୟାରିଅରରେ ଏପରି ଅନେକ ରେକର୍ଡ ସୃଷ୍ଟି କରିଛନ୍ତି, ଯାହାକୁ ଭାଙ୍ଗିବା ବହୁତ କଷ୍ଟକର । ସେ ଭାରତ ପାଇଁ ଟି-୨୦ ରେ ସର୍ବାଧିକ ରନ୍ ସ୍କୋରର । କୋହଲି ଏକମାତ୍ର ଖେଳାଳି ଯିଏକି ଟେଷ୍ଟ କ୍ରିକେଟରେ ସାତଟି ଦ୍ୱିଶତକ ହାସଲ କରିଛନ୍ତି । ଅନ୍ତର୍ଜାତୀୟ କ୍ରିକେଟରେ ସର୍ବାଧିକ ଶତକ ହାସଲ କରିଥିବା କୋହଲି ହେଉଛନ୍ତି ଦ୍ୱିତୀୟ ଖେଳାଳି । ତାଙ୍କ ନାମରେ ମୋଟ ୭୬ଟି ଶତକ ରହିଛି । ସେ ODI ରେ ୮୦୦୦, ୯୦୦୦, ୧୦୦୦୦, ୧୧୦୦୦ ଓ ୧୨୦୦୦ ରନ୍ ସ୍କୋର କରିବାରେ ଦ୍ରୁତତମ ଖେଳାଳି । ଏହା ବ୍ୟତୀତ, ତାଙ୍କର ଅନେକ ରେକର୍ଡ ଅଛି ଯାହା ତାଙ୍କର ଯାତ୍ରାକୁ ବହୁତ ସ୍ୱତନ୍ତ୍ର କରିଥାଏ ।

କୋହଲି ଏକ ରନ୍ ମେସିନ୍, ପ୍ରତ୍ୟେକ ଫର୍ମାଟରେ କରିଛନ୍ତି ରନ୍ ବର୍ଷା
ବିରାଟ କୋହଲି ଏପର୍ଯ୍ୟନ୍ତ ୫୦୧ ଟି ମ୍ୟାଚ୍ ଖେଳିଛନ୍ତି, ଯେଉଁଥିରେ ସେ ମୋଟ ୨୫,୫୮୨ ରନ୍ ସ୍କୋର କରିଛନ୍ତି । କୋହଲି ହାରାହାରି ୪୯.୨୯ ଓ ଷ୍ଟ୍ରାଇକ୍ ହାର ୫୫.୨୩ ରେ ୧୮୭ ଟି ଇନିଂସରେ ୮,୬୭୬ ରନ୍ ସଂଗ୍ରହ କରିଛନ୍ତି । ଅନ୍ୟପକ୍ଷରେ ସେ ହେଉଛନ୍ତି ODI କିଙ୍ଗ୍ । ସେ ଏହି ଫର୍ମାଟରେ ହାରାହାରି ୫୭.୩୨ ଓ ଷ୍ଟ୍ରାଇକ୍ ହାର ୯୩.୬୨ ରେ ୨୬୫ ଇନିଂସରେ ୧୨,୮୯୮ ରନ୍ ସ୍କୋର କରିଛନ୍ତି । ଓ ଟି-୨୦ ରେ ସେ ହାରାହାରି ୫୨.୭୩ ରେ ୪,୦୦୮ ରନ୍ କରିଛନ୍ତି ଓ ଏହି ସମୟରେ ତାଙ୍କର ଷ୍ଟ୍ରାଇକ୍ ରେଟ୍ ୧୩୭.୯୬ ରହିଛି । ସେ ମଧ୍ୟ ଏହି ଫର୍ମାଟରେ ଭାରତର ସବୁଠାରୁ ସଫଳ ବ୍ୟାଟ୍ସମ୍ୟାନ୍ । ବିରାଟ କୋହଲି ଟେଷ୍ଟ, ଦିନିକିଆ ଓ ଟି-୨୦ ଫର୍ମାଟରେ ଯଥାକ୍ରମେ ୨୯, ୪୬ ଓ ୧ ଟି ଶତକ ହାସଲ କରିଛନ୍ତି । ଆଇପିଏଲରେ ବିରାଟ କୋହଲିଙ୍କ ନାମରେ ୭ଟି ଶତକ ରହିଛି ।

କୋହଲି ତାଙ୍କ  ୧୫ ବର୍ଷ କ୍ୟାରିୟରରେ ୨୨-ୟାର୍ଡ ପିଚରେ ଦୌଡି ସାରିଛନ୍ତି ୫୦୦ କିମିରୁ ଅଧିକ 
ବିରାଟ କୋହଲି ନିଜର ୧୫ ବର୍ଷ କ୍ୟାରିଅରରେ କ୍ରିକେଟ୍ ପିଚ୍ ରେ ୫୧୦ କିଲୋମିଟର ଦୌଡ଼ିଛନ୍ତି । ସେ ନିଜ ରନ୍ ପାଇଁ ୨୭୭ କିଲୋମିଟର ଦୌଡ଼ିଥିବାବେଳେ ତାଙ୍କ ସାଥୀ ଖେଳାଳିଙ୍କ ରନ ପାଇଁ ୨୩୩ କିଲୋମିଟର ଦୂରତା ଦୌଡ଼ି ସାରିଛନ୍ତି । ଏଥିମଧ୍ୟରେ କେବଳ ସେହି ରନ୍ ଅନ୍ତର୍ଭୁକ୍ତ ଯାହା ସେ ଦୌଡ଼ିବା ଦ୍ୱାରା ସ୍କୋର କରିଥିଲେ ।

ଏହା ବି ପଢ଼ନ୍ତୁ: World Cup 2023: ବିଶ୍ୱକପରେ ଟିମ୍ ଇଣ୍ଡିଆରେ ଏଣ୍ଟ୍ରି ମାରିବ ଏହି ଯୁବ ଖତରନାକ୍ ଖେଳାଳି! ରବିନ୍ ଉଥାପ୍ପା କହିଲେ ତାଙ୍କ କ୍ୱାଲିଟି

ଏହା ବି ପଢ଼ନ୍ତୁ: Lisa Sthalekar inspiring story: ଭାରତରେ ଜନ୍ମ ହେବା ମାତ୍ରେ ଡଷ୍ଟବିନରେ ଫିଙ୍ଗି ଦିଆଯାଇଥିବା ଶିଶୁ କନ୍ୟା ହୋଇଛନ୍ତି ଅଷ୍ଟ୍ରେଲିଆ କ୍ରିକେଟ୍ ଦଳର ସଫଳ ଅଧିନାୟକ