T20 WC 2022: ପାକିସ୍ତାନୀଙ୍କୁ ନିରାଶ କଲେ ବାବର ଆଜମ; ବିଶ୍ୱକପକୁ ନେଇ ଦେଲେ ବଡ଼ ବୟାନ

PAK vs ZIM 2022, Babar Azam: ଜିମ୍ବାୱେ (Zimbabwe) ଏକ ରୋମାଞ୍ଚକର ମ୍ୟାଚରେ ଗୁରୁବାର ଦିନ ପାକିସ୍ତାନକୁ (Pakistan) ୧ ରନରେ ପରାସ୍ତ କରିଛି । ଟି-୨୦ ବିଶ୍ୱକପ ୨୦୨୨ (T20 World Cup 2022) ରେ ଏହା ପାକିସ୍ତାନର କ୍ରମାଗତ ଦ୍ୱିତୀୟ ପରାଜୟ । ଏହାପୂର୍ବରୁ ମେଲବୋର୍ଣ୍ଣରେ (Melbourne) ଭାରତ ବିପକ୍ଷ ମ୍ୟାଚରେ ପାକିସ୍ତାନକୁ ୪ ୱିକେଟରେ ପରାଜୟର ସମ୍ମୁଖୀନ ହେବାକୁ ପଡିଥିଲା । ଏହି ପରାଜୟ ପରେ ସେମିଫାଇନାଲରେ (Semi-finals) ପ୍ରବେଶ କରିବାର ପାକିସ୍ତାନର ଆଶା ଧୂଳିସାତ ହୋଇ ଯାଇଛି । ଜିମ୍ବାୱେ ବିପକ୍ଷରେ ପାକିସ୍ତାନର ପରାଜୟ ପରେ ପାକିସ୍ତାନୀ ଅଧିନାୟକ ବାବର ଆଜାମ (Babar Azam) ସେମିଫାଇନାଲରେ ପ୍ରବେଶ କରିବାର ସମ୍ଭାବନାକୁ ନେଇ ଏକ ବଡ଼ ବୟାନ ଦେଇଛନ୍ତି ।

ବାସ୍ତବରେ ଜିମ୍ବାୱେ ବିପକ୍ଷରେ ପରାଜୟ ପରେ ପାକିସ୍ତାନ ଅଧିନାୟକ ବାବର ଆଜମ କହିଛନ୍ତି ଯେ ଯଦି ମୁଁ ସଚ୍ଚୋଟ ଭାବରେ କହିବି, ତେବେ ଆମ ଦଳ ପାଇଁ ରାସ୍ତା ବହୁତ କଷ୍ଟସାଧ୍ୟ ହୋଇପଡିଛି । ଆମ ଦଳ ପାଇଁ ଟି-୨୦ ବିଶ୍ୱକପ ୨୦୨୨ ର ସେମିଫାଇନାଲରେ ପ୍ରବେଶ କରିବା ଅତ୍ୟନ୍ତ କଷ୍ଟକର ହୋଇପଡିଛି । ଉଲ୍ଲେଖନୀୟ କଥା ହେଉଛି, ଟି-୨୦ ବିଶ୍ୱକପ ୨୦୨୨ ରେ ଜିମ୍ବାୱେ ବିପକ୍ଷ ମ୍ୟାଚରେ ପାକିସ୍ତାନକୁ ପରାଜୟର ସାମ୍ନା କରିବାକୁ ପଡିଛି । ଏହାପୂର୍ବରୁ ଟିମ୍ ଇଣ୍ଡିଆ ମେଲବୋର୍ଣ୍ଣରେ ପାକିସ୍ତାନକୁ ପରାସ୍ତ କରିଥିଲା । ଏହିପରି, ଟି-୨୦ ବିଶ୍ୱକପ ୨୦୨୨ ରେ କ୍ରମାଗତ ଦ୍ୱିତୀୟ ଥର ପରାଜୟ ପରେ ପାକିସ୍ତାନ ଦଳ ପାଇଁ ଟପ୍-୪ ରେ ପହଞ୍ଚିବା କଷ୍ଟସାଧ୍ୟ ହୋଇପଡିଛି ।

ମ୍ୟାଚରେ ଜିମ୍ବାୱେ ଟସ୍ ଜିତି ପ୍ରଥମେ ବ୍ୟାଟିଂ କରିବା ପରେ ନିର୍ଦ୍ଧାରିତ ୨୦ ଓଭରରେ ୮ ୱିକେଟ୍ ହରାଇ ୧୩୦ ରନ୍ ସଂଗ୍ରହ କରିଥିଲା । ଜିମ୍ବାୱେର ୧୩୦ ରନ୍ ଜବାବରେ ପାକିସ୍ତାନୀ ଦଳ ୨୦ ଓଭରରେ ୮ ୱିକେଟ୍ ହରାଇ ମାତ୍ର ୧୨୯ ରନ୍ ସ୍କୋର କରିପାରିଥିଲେ । ଏହିପରି ଭାବରେ ଜିମ୍ବାୱେ ଏହି ମ୍ୟାଚକୁ ୧ ରନରେ ଜିତି ନେଇଥିଲା । ମ୍ୟାଚ ଜିତିବା ପାଇଁ ପାକିସ୍ତାନକୁ ଶେଷ ବଲରୁ ୩ ରନର ଆବଶ୍ୟକ ଥିଲା, କିନ୍ତୁ ବ୍ୟାଟ୍ସମ୍ୟାନ୍ ଶାହିନ୍ ଆଫ୍ରିଦି ମାତ୍ର ୧ ରନ୍ ସ୍କୋର କରିପାରିଥିଲେ । ଜିମ୍ବାୱେ ଅଲରାଉଣ୍ଡର ସିକନ୍ଦର ରଜା ୪ ଓଭର ବୋଲିଂ କରି ୨୫ ରନ୍ ଦେଇ ୩ ୱିକେଟ୍ ନେଇଥିଲେ । ଏହି ଉଜ୍ଜ୍ୱଳ ପ୍ରଦର୍ଶନ ପାଇଁ ସିକନ୍ଦର ରଜାଙ୍କୁ ମ୍ୟାନ ଅଫ ଦି ମ୍ୟାଚ୍‌ ଭାବେ ପୁରସ୍କାର ପ୍ରଦାନ କରାଯାଇଥିଲା ।

ଦଳ ବିଜୟକୁ ନେଇ ଜିମ୍ବାୱେ ରାଷ୍ଟ୍ରପତି ଏମର୍ସନ୍ ମନ୍ନାଙ୍ଗାଗୱା ଏକ ଟ୍ୱିଟ୍ କରିଛନ୍ତି । ଟ୍ୱିଟ୍ ମାଧ୍ୟମରେ ସେ ମିଷ୍ଟର୍ ବିନଙ୍କ ବାହାନାରେ ପାକିସ୍ତାନକୁ କଟାକ୍ଷ କରିଛନ୍ତି । ସେ ଲେଖିଛନ୍ତି ଯେ, "ଜିମ୍ବାୱେ ପାଇଁ କି ଚମତ୍କାର ବିଜୟ । ଶୋଭରୋନ ଅଭିନନ୍ଦନ । ପରବର୍ତ୍ତୀ ସମୟରେ ପ୍ରକୃତ ମିଷ୍ଟର ବିନ୍ ପଠାଇବେ ।" ବାସ୍ତବରେ, ନିକଟ ଅତୀତରେ ନକଲି ମିଷ୍ଟର ବିନକୁ ନେଇ ବହୁତ ଚର୍ଚ୍ଚା ହେଉଥିଲା, ଯିଏ ଜିମ୍ବାୱେରେ ଫଟୋ କ୍ଲିକ୍ କରିବା ନାମରେ ଟଙ୍କା ସଂଗ୍ରହ କରୁଥିଲେ । ଏହି ଘଟଣାରେ ଅନେକ ବଡ଼ ଲୋକ ମଧ୍ୟ ଫସି ଥିଲେ । ଏହି ବ୍ୟକ୍ତି ଜଣକଙ୍କ ସମ୍ପର୍କ ପାକିସ୍ତାନ ସହ ଥିଲା ବୋଲି କୁହାଯାଏ ।

ଏହା ବି ପଢ଼ନ୍ତୁ: ଜିମ୍ବାୱେ ବିପକ୍ଷରେ ହାରିବା ପରେ ଆଣ୍ଠୁମାଡ଼ି ଧକେଇ କାନ୍ଦିଲେ ପାକିସ୍ତାନ ଉପ-ଅଧିନାୟକ: Video