Pakistan Cricket: ପାକିସ୍ତାନ କ୍ରିକେଟରେ ହଇଚଇ,୩୬ ଘଣ୍ଟା ମଧ୍ୟରେ ୩ ଖେଳାଳି ନେଲେଣି ଅବସର

Pakistan Cricketers retirement: କ୍ରିକେଟ୍ ଖେଳରେ ଯେତେବେଳେ ଜଣେ ବୋଲର କ୍ରମାଗତ ତିନିଟି ବଲରେ ୱିକେଟ୍ ନିଅନ୍ତି ସେତେବେଳେ ଏହାକୁ ହ୍ୟାଟ୍ରିକ୍ କୁହାଯାଏ, କିନ୍ତୁ ଯେତେବେଳେ ଜଣେ ବ୍ୟାଟ୍ସମ୍ୟାନ୍ କ୍ରମାଗତ ତିନି ଚୌକା ଓ ତିନି ଛକା ମାରିଲେ, ସେତେବେଳେ ଏହାକୁ ଚୌକା କିମ୍ବା ଛକାର ହ୍ୟାଟ୍ରିକ୍ ମଧ୍ୟ କୁହାଯାଏ। କିନ୍ତୁ ପାକିସ୍ତାନରେ ଏହାଠାରୁ ଏକ ଭିନ୍ନ ପ୍ରକାରର ହ୍ୟାଟ୍ରିକ୍ ଦେଖିବାକୁ ମିଳିଛି। କହିରଖୁଛୁ ଯେ ଶେଷ ୩୬ ଘଣ୍ଟା ମଧ୍ୟରେ ପାକିସ୍ତାନର ତିନି ବଡ଼ ଖେଳାଳି ଅନ୍ତର୍ଜାତୀୟ କ୍ରିକେଟରୁ ଅବସର ନେଇଛନ୍ତି।

ପ୍ରଥମେ ଅଲରାଉଣ୍ଡର ଇମାଦ ୱାସିମ ଅବସର ନେଇଥିଲେ। ତା’ପରେ ବାମହାତ ଦ୍ରୁତ ବୋଲର ମହମ୍ମଦ ଆମିର ଅନ୍ତର୍ଜାତୀୟ କ୍ରିକେଟକୁ ବିଦାୟ ଦେଇଥିଲେ। ବର୍ତ୍ତମାନ ଖତରନାକ ଦ୍ରୁତ ବୋଲର ମହମ୍ମଦ ଇରଫାନ୍ ମଧ୍ୟ ନିଜର ଅବସର ଘୋଷଣା କରିଛନ୍ତି। ଇରଫାନ୍ ନିଜ ହାଇଟକୁ ନେଇ ଦୀର୍ଘ ସମୟ ହେଡଲାଇନରେ ରହିଲେ। ତାଙ୍କର ଉଚ୍ଚତା ୭ ଫୁଟ ୧ ଇଞ୍ଚ ଥିଲା।

ମହମ୍ମଦ ଇରଫାନ୍ ହଠାତ୍ ଅବସର ଘୋଷଣା କରି ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି। ସୋସିଆଲ ମିଡିଆରେ ଏକ ପୋଷ୍ଟ କରି ଆନ୍ତର୍ଜାତୀୟ କ୍ରିକେଟ୍ ଛାଡିବାକୁ ଇରଫାନ୍ ନିଷ୍ପତ୍ତି ନେଇଛନ୍ତି। ସେ ଲେଖିଛନ୍ତି, "ମୁଁ ଅନ୍ତର୍ଜାତୀୟ କ୍ରିକେଟରୁ ଅବସର ନେବାକୁ ଏକ ବଡ ନିଷ୍ପତ୍ତି ନେଇଛି। ମୁଁ ମୋର ସାଥୀ ଖେଳାଳି, ପ୍ରଶିକ୍ଷକ ଏବଂ ପରିବାରବର୍ଗଙ୍କୁ ଧନ୍ୟବାଦ ଦେବାକୁ ଚାହୁଁଛି। ଆପଣଙ୍କ ପ୍ରେମ, ଉତ୍ସାହ ଏବଂ ସମର୍ଥନ ପାଇଁ ସମସ୍ତଙ୍କୁ ଧନ୍ୟବାଦ।"

ଇରଫାନ୍ ପାକିସ୍ତାନ ପାଇଁ ଚାରୋଟି ଟେଷ୍ଟ, ୬୦ଟି ଦିନିକିଆ ଓ ୨୨ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ସେ ଟେଷ୍ଟରେ ୧୦ ୱିକେଟ୍, ଦିନିକିଆରେ ୮୩ ୱିକେଟ୍ ଏବଂ ଟି-୨୦ ଇଣ୍ଟରନ୍ୟାସନାଲରେ ୧୬ ୱିକେଟ୍ ନେଇଥିଲେ। ସେ ଦୀର୍ଘ ସମୟ ଧରି ପାକିସ୍ତାନ ଦଳରୁ ବାହାରେ ଥିଲେ। ୨୦୧୯ ରେ ଇରଫାନ୍ ନିଜର ଶେଷ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ।