mystery of jagannath: ଜାଣନ୍ତୁ, କାହା ଅଭିଶାପରେ ଶ୍ରୀଜଗନ୍ନାଥ ରହିଛନ୍ତି ଅଧାଗଢା?

spiritual news : ଜଗାର ଲୀଳା ବଡ ବିଚିତ୍ର । ନିଜ ଭକ୍ତର ଦୁଃଖ ବୁଝିବା ପାଇଁ ସେ ପ୍ରତି ବର୍ଷ ବଡ ଦେଉଳ ଛାଡି ବଡଦାଣ୍ଡକୁ ଆସିଥାନ୍ତି । କିନ୍ତୁ ଆପଣ ଜାଣିଛନ୍ତି କି ବିଶ୍ୱବ୍ରହ୍ମାଣ୍ଡ ପାଳନ କର୍ତ୍ତା ଭଗବାନ ବିଷ୍ଣୁଙ୍କ ଅବତାର ଶ୍ରୀଜଗନ୍ନାଥ ଅଧାଗଢା କାହିଁକି ? କାହିଁକି ଦାରୁ ଦିଅଁଙ୍କର ନାହିଁ ପାପୁଲି କିମ୍ବା କାନ?

 ଶାସ୍ତ୍ର ଅନୁଯାୟୀ ଭଗବାନଙ୍କୁ ମିଳିଥିବା ଅଭିଶାପ ଯୋଗୁଁ ସେ ଆଜି ଅଧାଗଢା ହୋଇ ରହି ଯାଇଛନ୍ତି । ଏହା ସତ୍ୟ ଯେ, ବିଶ୍ୱକର୍ମା ଶ୍ରୀଜିଉଙ୍କ ମୂର୍ତ୍ତି ନିର୍ମାଣ କରୁଥିବା ସମୟରେ ରାଜା ଇନ୍ଦ୍ରଦ୍ୟୁମ୍ନଙ୍କ ଭୁଲ ଯୋଗୁଁ ସେ ଅଧାଗଢା ରହିଛନ୍ତି । ତେବେ ଏହା ପଛରେ ଏକ ବିରାଟ ରହସ୍ୟ ରହିଛି 

ଭଗବାନ ବିଷ୍ଣୁଙ୍କ ଅନ୍ୟ ଅବତାରରେ ସେ ଦୁଇ ଜଣଙ୍କ ପାଖରୁ ଅଭିଶାପ ପାଇଥିଲେ । ତେଣୁ କଳି ଯୁଗରେ ସେ ଅଧାଗଢା ରହିବା ପାଇଁ ବଚନ ମଧ୍ୟ ଦେଇଥିଲେ । ରାମାୟଣ ଅନୁସାରେ, କିସ୍କିନ୍ଧା ରାଜ୍ୟର ରାଜା ବାଳିଙ୍କୁ ବଦ୍ଧ କରି ଶ୍ରୀରାମଚନ୍ଦ୍ର ବନ୍ଧୁ ସୁଗ୍ରୀବଙ୍କୁ ରାଜା ଭାବରେ ଅଭିଷେକ କରାଇଥିଲେ । ସେଥିପାଇଁ ପରାକ୍ରମୀ ବାଳିଙ୍କୁ ଛଳନା କରି ମାରିଥିଲେ ପୁରୁଷୋତ୍ତମ ଶ୍ରୀରାମଚନ୍ଦ୍ର । ବାଳି ଏବଂ ସୁଗ୍ରୀବ ମଧ୍ୟରେ ଯୁଦ୍ଧ ଚାଲିଥିବା ବେଳେ ଏକ ଗଛ ଆଢୁଆଳରେ ରହି ରଘୁନାଥ ବାଳିଙ୍କ ଉପରକୁ ଶର ମାରିଥିଲେ । ଯାହା ଫଳରେ ବାଳି ସେହିଠାରେ ହିଁ ଲୋଟି ପଡିଥିଲେ । କିନ୍ତୁ ମୃତ୍ୟୁ ପୂର୍ବରୁ ସେ ଶ୍ରୀରାମଙ୍କୁ ଗୋଟିଏ ବର ମାଗିଥିଲେ । ସେ କହିଥିଲେ ଯେ, ହେ ଶ୍ରୀରାମ ଆପଣ ନାରାୟଣଙ୍କ ଅବତାର ହୋଇ ମଧ୍ୟ ମୋତେ କପଟ କରି ହତ୍ୟା କରିଛନ୍ତି । ତେଣୁ ମୁଁ ଆପଣଙ୍କୁ ଏତିକି ବର ମାଗୁଛି ଯେ ଆପଣ ଯେଉଁ ପାପୁଲିରେ ଶରବିଦ୍ଧ କରିଛନ୍ତି, ସେହି ହାତ ଆପଣଙ୍କର ନ ରହୁ ।

ବାଳିଙ୍କର ଏହି କଥା ଶୁଣି ଶ୍ରୀରାମ ମଧ୍ୟ କାନ୍ଦି ପକାଇଥିଲେ ଏବଂ କହିଥିଲେ, ତଥାସ୍ତୁ… ହେ ପରାକ୍ରମୀ ବାଳି, ଆପଣଙ୍କର ଏହି ଅଭିଶାପକୁ ମୁଁ ଏହି ଜନ୍ମରେ ପୂରଣ କରିପାରିବି ନାହିଁ । ତେଣୁ କଳିଯୁଗରେ ମୁଁ ଯେବେ ଜନ୍ମ ନେବି, ଆପଣଙ୍କୁ ଦେଇଥିବା ବର ଅନୁସାରେ ମୋର ହାତ ରହିବ ହେଲେ ପାପୁଲି ନଥିବ । ଅଧାଗଢା ହୋଇ ମୁଁ ଶ୍ରୀଜଗନ୍ନାଥ ରୂପରେ ଅବତାର ନେବି । ସେତେବେଳେ ମୋ ପାଖରେ ପାପୁଲି ନଥିବ କି ମୁଁ କାହାକୁ ଏପରି ଛଳନା କରି ହତ୍ୟା କରିପାରିବି ନାହିଁ । ଏତିକି ଶୁଣିବା ପରେ ବାଳି ଶ୍ରୀରାମଚନ୍ଦ୍ରଙ୍କ କୋଳରେ ପ୍ରାଣତ୍ୟାଗ କରିଥିଲେ । ତେଣୁ ତ୍ରେତୟା ଯୁଗରେ ବାଳିଙ୍କୁ ଦେଇଥିବା ବରଦାନ ଏବଂ ପ୍ରତିଜ୍ଞା ଯୋଗୁଁ କଳି ଯୁଗରେ ଅଧାଗଢା ହୋଇ ରହିଛନ୍ତି ପ୍ରଭୁ ନାରାୟଣଙ୍କ ଅବତାର ଶ୍ରୀଜଗନ୍ନାଥ ।