ନୂତନ ରାଷ୍ଟ୍ରପତିଙ୍କ ପାଇଁ ବିଜେପିରେ ୧୦ରୁ ଅଧିକ ନାମ ଉପରେ ଚାଲିଛି ମନ୍ଥନ, ଏହି ୫ ନାଁକୁ ନେଇ ସବୁଠାରୁ ଅଧିକ ଚର୍ଚ୍ଚା

ନୂଆଦିଲ୍ଲୀ: Presidential Election 2022: ବର୍ତ୍ତମାନ ଦେଶର ସର୍ବୋଚ୍ଚ ପଦ ଅର୍ଥାତ୍ ରାଷ୍ଟ୍ରପତିଙ୍କ ପାଇଁ ନିର୍ବାଚନକୁ ମାତ୍ର ୨୮ ଦିନ ରହିଯାଇଛି । ଚଳିତ ବର୍ଷ ଜୁଲାଇ ୨୮ରେ ମତଦାନ ହେବ । ନିର୍ବାଚନ ତାରିଖ ପାଖେଇ ଆସୁଥିବାରୁ ରାଜନୈତିକ ସକ୍ରିୟତା ଓ ଚର୍ଚ୍ଚା ବଢ଼ି ଚାଲିଛି । ବିଜେପି (BJP) ନେତୃତ୍ୱାଧୀନ ଏନଡିଏ (NDA) ଓ କଂଗ୍ରେସ (Congress) ନେତୃତ୍ୱାଧୀନ ୟୁପିଏ (UPA) ପ୍ରାର୍ଥୀଙ୍କୁ ନେଇ ଜୋରସୋରରେ ମନ୍ଥନ କରୁଛନ୍ତି । ସମସ୍ତଙ୍କ ନଜର ଏନଡିଏ ପ୍ରାର୍ଥୀ (NDA Presidential Nominee) ଙ୍କ ଉପରେ ରହିଛି । ଏହାର କାରଣ ହେଉଛି ସଂଖ୍ୟା ବଳ ଅନୁଯାୟୀ ଏନଡିଏ ନିର୍ବାଚନରେ ମଜଭୁତ ଦେଖାଯାଉଛି ।

ଭାରତୀୟ ଜନତା ପାର୍ଟି (BJP) ରେ ରାଷ୍ଟ୍ରପତି ପ୍ରାର୍ଥୀ (BJP Presidential Nominee) ଙ୍କ ପାଇଁ ୧୦ରୁ ଅଧିକ ଦିଗଜଙ୍କ ନାମ ଉପରେ ଆଲୋଚନା ଜାରି ରହିଛି । ତଥାପି, ଏପରି ୫ ନାମ ଅଛି, ଯାହାକୁ ନେଇ ଅଧିକ ଚର୍ଚ୍ଚା କରାଯାଉଛି । ଏଭଳି ପରିସ୍ଥିତିରେ ଆସନ୍ତୁ ଜାଣିବା ବିଜେପିରୁ ରାଷ୍ଟ୍ରପତି ପ୍ରାର୍ଥୀଙ୍କ ଦୌଡ଼ରେ କିଏ ଆଗରେ ଅଛନ୍ତି? ନିର୍ବାଚନ ପାଇଁ ଏନଡିଏରେ ପ୍ରସ୍ତୁତି କ’ଣ ଚାଲିଛି?

ଏନଡିଏ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କୁ ଦାୟିତ୍ୱ ଦେଇଛନ୍ତି ଯେ ସେ ବିରୋଧୀ ଦଳ ତଥା ଏନଡିଏରେ ସାମିଲ ଦଳଗୁଡ଼ିକର ସମର୍ଥନ ହାସଲ କରନ୍ତୁ । ଏଥିପାଇଁ ରାଜନାଥ ସିଂ ମମତା ବାନାର୍ଜୀ, ଶରଦ ପାୱାର, ମଲ୍ଲିକାର୍ଜୁନ ଖଡ଼ଗେ, ଅଖିଳେଶ ଯାଦବ, ଉଦ୍ଧବ ଠାକରେ, ବିହାର ମୁଖ୍ୟମନ୍ତ୍ରୀ ନୀତିଶ କୁମାର, ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ବିରୋଧୀ ଦଳର ବହୁ ବଡ଼ ନେତା ତଥା ଏନଡିଏ ସହଯୋଗୀଙ୍କ ସହ ଯୋଗାଯୋଗ କରିଛନ୍ତି ।

ଏହା ବ୍ୟତୀତ ବିଜେପି ପରିଚାଳନା ଟିମ୍ ମଧ୍ୟ ଗଠନ କରିଛି । ଏହାର ସଂଯୋଜକ ହେଉଛନ୍ତି ଗଜେନ୍ଦ୍ର ସିଂ ଶେଖୱାତ । ବିନୋଦ ତାୱଡେ ଓ ସିଟି ରବିଙ୍କୁ ସହ-ସଂଯୋଜକ କରାଯାଇଛି । ଏଥିସହିତ ୧୧ ଜଣ ସଦସ୍ୟଙ୍କୁ ମଧ୍ୟ ନିଯୁକ୍ତ କରାଯାଇଛି ।

ବିରୋଧୀ ଏପର୍ଯ୍ୟନ୍ତ କ’ଣ କରିଛନ୍ତି?

ବିରୋଧୀଙ୍କୁ ଏକଜୁଟ କରିବା ପାଇଁ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ବହୁ ଉଦ୍ୟମ କରୁଛନ୍ତି । ଜୁନ ୧୫ରେ ସେ ୨୨ଟି ବିରୋଧୀ ଦଳର ଏକ ବୈଠକ ଡାକିଥିଲେ, ଯେଉଁଥିରେ ୧୭ଟି ଦଳର ନେତା ଯୋଗ ଦେଇଥିଲେ । ଆମ୍ ଆଦମୀ ପାର୍ଟି, ଟିଆରଏସ, ବିଜେଡି ଏବଂ YSR କଂଗ୍ରେସ ଏହି ବୈଠକରୁ ଦୂରେଇ ରହିଥିଲେ । ବର୍ତ୍ତମାନ ଜୁନ ୨୧ରେ ବିରୋଧୀଙ୍କ ଏକ ବୈଠକ ଚାଲିଛି । ଏହାର ଅଧ୍ୟକ୍ଷତା ଶରଦ ପାୱାର କରିବେ ।

NDA ରେ ଏସବୁ ନାମକୁ ଚାଲିଛି ଚର୍ଚ୍ଚା

୨୦୧୪ ପରଠାରୁ ବିଜେପି ଏପରି କରୁଛି ଯାହା କେହି କଳ୍ପନା କରି ନଥିବେ । ଯେପରି ୨୦୧୭ରେ ରାମ ନାଥ କୋବିନ୍ଦ ହଠାତ୍ ରାଷ୍ଟ୍ରପତି ଓ ଭେଙ୍କୟା ନାଇଡୁ ଉପରାଷ୍ଟ୍ରପତି ଭାବରେ ନିର୍ବାଚିତ ହୋଇଥିଲେ । ଏହା ପୂର୍ବରୁ ଏହି ଦୁଇଟି ନାମ ଉପରେ କୌଣସି ଚର୍ଚ୍ଚା ହୋଇନଥିଲା ।
 
ଏଥର ମଧ୍ୟ ସମାନ ଘଟଣା ଘଟିପାରେ । ରାଷ୍ଟ୍ରପତି ରାମ ନାଥ କୋବିନ୍ଦ ଉତ୍ତରପ୍ରଦେଶର ଜଣେ ଦଳିତ ଓ ଉପରାଷ୍ଟ୍ରପତି ଭେଙ୍କୟା ନାଇଡୁ ଆନ୍ଧ୍ରପ୍ରଦେଶର କମ୍ମା ପରିବାରରୁ ଆସନ୍ତି । ରାମ ନାଥ କୋବିନ୍ଦଙ୍କୁ ରାଷ୍ଟ୍ରପତି କରାଯିବା ସମୟରେ ସେ ବିହାରର ରାଜ୍ୟପାଳ ଥିଲେ । ଏଭଳି ପରିସ୍ଥିତିରେ ବିଜେପି କାହାକୁ ବି ପ୍ରାର୍ଥୀ କରିପାରେ । ବିଜେପି କାହାକୁ ପ୍ରାର୍ଥୀ କରିବ, ତାହାର ସଠିକ୍ ଅନୁମାନ କରିବା ସମ୍ଭବ ହେବ ନାହିଁ, ଯଦିଓ ବର୍ତ୍ତମାନ ଦଳ ମଧ୍ୟରେ ୧୦ରୁ ଅଧିକ ନାମ ଉପରେ ଚର୍ଚ୍ଚା ହେଉଛି । ଏଥିମଧ୍ୟରୁ ଏହିପରି ୫ ନାମ ଅଛି, ଯାହା ଉପରେ ଅଧିକ ମନ୍ଥନ ଚାଲିଛି ।

୧. ଥାୱର ଚନ୍ଦ ଗେହଲୋଟ୍: କର୍ଣ୍ଣାଟକ ରାଜ୍ୟପାଳ ଥାୱର ଚନ୍ଦ ଗେହଲୋଟ (Thawar Chand Gehlot) ଙ୍କୁ ନାମକୁ ନେଇ ଅଧିକ ଚର୍ଚ୍ଚା ହେଉଛି । ଗେହଲୋଟ୍ ମଧ୍ୟପ୍ରଦେଶର ଦଳିତ ସମ୍ପ୍ରଦାୟରୁ ଆସନ୍ତି । କୁହାଯାଉଛି ଯେ ବିଜେପି ଲଗାତାର ଦ୍ୱିତୀୟ ଥର ପାଇଁ ଦଳିତ ଭୋଟରଙ୍କୁ ଆକୃଷ୍ଟ କରିବା ପାଇଁ ଦଳିତ ଚେହେରା ଉପରେ ବାଜି ଖେଳିବାକୁ ଚାହୁଁଛି ।

୨. ଅନୁସୁଇୟା ଉଇକି କିମ୍ବା ଦ୍ରୌପଦୀ ମୁର୍ମୁ: ଏକ ଅନୁମାନ ଏହା ମଧ୍ୟ ରହିଛି ଯେ ପ୍ରଥମ ଥର ପାଇଁ ବିଜେପି ଆଦିବାସୀ ଚେହେରାକୁ ରାଷ୍ଟ୍ରପତି ପ୍ରାର୍ଥୀ କରିପାରେ । ଏଥିରେ ଛତିଶଗଡ ରାଜ୍ୟପାଳ ଅନୁସୁଇୟା ଉଇକେ (Anusuiya Uikey) ଓ ଝାଡ଼ଖଣ୍ଡର ପୂର୍ବତନ ରାଜ୍ୟପାଳ ଦ୍ରୌପଦୀ ମୁର୍ମୁ (Draupadi Murmu) ଙ୍କ ନାମର ସର୍ବାଧିକ ଚର୍ଚ୍ଚା ହେଉଛି । ବିଶେଷ କଥା ହେଉଛି ଉଭୟ ମହିଳା ଅଟନ୍ତି ।

୩. ଆରିଫ ମହମ୍ମଦ ଖାନ କିମ୍ବା ମୁଖ୍ତାର ଅବ୍ବାସ ନକଭି: କୌଣସି ମୁସଲମାନ ଚେହେରାକୁ ରାଷ୍ଟ୍ରପତି କିମ୍ବା ଉପରାଷ୍ଟ୍ରପତି ପ୍ରାର୍ଥୀ କରାଯାଇପାରେ ବୋଲି କଳ୍ପନାଜଳ୍ପନା ମଧ୍ୟ କରାଯାଉଛି । ଏଥିମଧ୍ୟରେ କେରଳର ରାଜ୍ୟପାଳ ଆରିଫ ମହମ୍ମଦ ଖାନ (Arif Mohammad Khan) ଓ କେନ୍ଦ୍ର ମନ୍ତ୍ରୀ ମୁଖ୍ତାର ଅବ୍ବାସ ନକଭି (Mukhtar Abbas Naqvi) ଅଛନ୍ତି । କୌଣସି ମୁସଲମାନ ଚେହେରାକୁ ରାଷ୍ଟ୍ରପତି କିମ୍ବା ଉପରାଷ୍ଟ୍ରପତି କରି ବିଜେପି ଏକ ବାର୍ତ୍ତା ଦେବାକୁ ଚାହୁଁଛି । ଅଟଳ ବିହାରୀ ବାଜପେୟୀ ସରକାର ସମୟରେ ମଧ୍ୟ ସମାନ ଘଟଣା ଘଟିଥିଲା ​। ସେହି ସମୟରେ ଡକ୍ଟର ଏପିଜେ ଅବଦୁଲ କଲାମଙ୍କୁ ବିଜେପି ତରଫରୁ ପ୍ରାର୍ଥୀ କରାଯାଇଥିଲା ।

ଏହା ବି ପଢ଼ନ୍ତୁ:-ଉଦ୍ଧବ ସରକାରଙ୍କ ସମର୍ଥନରେ କେତେ ବିଧାୟକ, ବିଜେପି ପାଖରେ ରହିଛି ଏତେ ବିଧାୟକଙ୍କ ସମର୍ଥନ; ଜାଣନ୍ତୁ ମହାରାଷ୍ଟ୍ର ବିଧାନସଭାର ସମ୍ପୂର୍ଣ୍ଣ ସମୀକରଣ

ଏହା ବି ପଢ଼ନ୍ତୁ:-ମହାରାଷ୍ଟ୍ରରେ ବିଜେପି ଗଢ଼ିବ ସରକାର! ଗୁଜୁରାଟରେ ଶିବସେନାର ୧୩ ନୁହେଁ ଅଛନ୍ତି ୨୬ ବିଧାୟକ

ଏହା ବି ପଢ଼ନ୍ତୁ:-ରାଷ୍ଟ୍ରପତି ନିର୍ବାଚନ 2022: ଏହି ନେତା ହେବେ ବିରୋଧୀ ମେଣ୍ଟର ରାଷ୍ଟ୍ରପତି ପ୍ରାର୍ଥୀ!

୪. ଏସବୁ ନାମର ମଧ୍ୟ ହେଉଛି ଚର୍ଚ୍ଚା: ଏସବୁ ନାମ ବ୍ୟତୀତ ଅନେକ ନାମ ଉପରେ ଚର୍ଚ୍ଚା ହେଉଛି । ଉପରାଷ୍ଟ୍ରପତି ଭେଙ୍କୟା ନାଇଡୁଙ୍କ ନାମ ମଧ୍ୟ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । କୁହାଯାଉଛି ଯେ ଭେଙ୍କୟା ନାଇଡୁଙ୍କୁ ଏଥର ରାଷ୍ଟ୍ରପତି କରାଯାଇପାରେ । ଏହା ମାଧ୍ୟମରେ ଦକ୍ଷିଣ ଭାରତର ରାଜନୈତିକ ଗଣିତ ନିଜ ସପକ୍ଷରେ ଆଣିବା ପାଇଁ ବିଜେପି ଚେଷ୍ଟା କରୁଛି । ଅନେକ ବିରୋଧୀ ଦଳ ମଧ୍ୟ ଭେଙ୍କୟା ନାଇଡୁଙ୍କ ନାମରେ ସମର୍ଥନ କରିପାରନ୍ତି । ଏହା ବ୍ୟତୀତ ଆନ୍ଧ୍ରପ୍ରଦେଶର ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ, ବିହାର ରାଜ୍ୟପାଳ ଫାଗୁ ଚୌହାନ, ହରିୟାଣା ରାଜ୍ୟପାଳ ବଣ୍ଡାରୁ ଦତ୍ତାତ୍ରେୟ, ତେଲେଙ୍ଗାନା ରାଜ୍ୟପାଳ ତମିଲିସାଇ ସୁନ୍ଦରରାଜଙ୍କ ନେଇ ମଧ୍ୟ ଆଲୋଚନା ଚାଲିଛି ।

ଏହା ବ୍ୟତୀତ କୌଣସି ଶିଖଙ୍କୁ ମଧ୍ୟ ରାଷ୍ଟ୍ରପତି ପ୍ରାର୍ଥୀ କରିବା ନେଇ ଗୁଜବ ସୃଷ୍ଟି ହୋଇଛି । ଏହାର କାରଣ ହେଉଛି ବର୍ତ୍ତମାନ ଶିଖ୍ ଉପରେ ବିଜେପିର ବହୁତ ଧ୍ୟାନ ରହିଛି । କୃଷକଙ୍କ ଆନ୍ଦୋଳନ ପରେ ଶିଖ ସମ୍ପ୍ରଦାୟରେ ବିଜେପି ପ୍ରତି ଅସନ୍ତୋଷ ବୃଦ୍ଧି ପାଇଥିଲା । ଏଭଳି ପରିସ୍ଥିତିରେ ଶିଖ ଚେହେରାକୁ ରାଷ୍ଟ୍ରପତି କିମ୍ବା ଉପରାଷ୍ଟ୍ରପତି ପ୍ରାର୍ଥୀ କରାଯାଇପାରେ । ଏଭଳି ପରିସ୍ଥିତିରେ ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ, ଉତ୍ତରପ୍ରଦେଶ ରାଜ୍ୟପାଳ ଲେଫ୍ଟନାଣ୍ଟ ଗୁରୁମିତ ସିଂଙ୍କ ନାମ ଅଧିକ ଚର୍ଚ୍ଚା ହେଉଛି ।