Nepal General Elections 2022: ନେପାଳ ନିର୍ବାଚନର ତଦାରଖ କଲେ ଭାରତ ସମେତ ଏହି ୬ଟି ଦେଶ

Nepal General Elections, କାଠମାଣ୍ଡୁ: ନେପାଳରେ ସାଧାରଣ ନିର୍ବାଚନ ଅନୁଷ୍ଠିତ ହୋଇଯାଇଛି। ଆର୍ଥିକ ସଙ୍କଟ ସମୟରେ ଏକ ନୂତନ ସରକାର ବାଛିବା ପାଇଁ ଲକ୍ଷ ଲକ୍ଷ ନେପାଳୀ ରବିବାର ମତଦାନ କରିଛନ୍ତି। ନେପାଳ କମ୍ୟୁନିଷ୍ଟ ୟୁନିଫାଏଡ୍ ମାର୍କ୍ସବାଦୀ ଲେନିଷ୍ଟ ପାର୍ଟି ବିରୁଦ୍ଧରେ ପ୍ରଧାନମନ୍ତ୍ରୀ ଶେର ବାହାଦୂର ଦେଉବାଙ୍କ ନେତୃତ୍ୱରେ ନେପାଳୀ କଂଗ୍ରେସ ଦଳକୁ ଅଧିକ ଭୋଟ ମିଳିଥିବା କୁହାଯାଉଛି। ତେବେ ଏହି ନିର୍ବାଚନକୁ ଭାରତ ସମେତ ଛଅଟି ଦେଶ ତଦାରଖ କରିଥିଲେ। 

ନେପାଳର ମୁଖ୍ୟ ନିର୍ବାଚନ କମିଶନର ଦୀନେଶ ଥାପାଲିଆ କହିଛନ୍ତି ଯେ,  ଦେଶର ୧୮ ନିୟୁତ ଯୋଗ୍ୟ ଭୋଟରଙ୍କ ମଧ୍ୟରୁ ରବିବାର ମାତ୍ର ୬୧% ବାଲାଟ ମାଧ୍ୟରେ ମତଦାନ କରିଛନ୍ତି। ପ୍ରାଥମିକ ଆକଳନ ଅନୁଯାୟୀ, ଗତ ୨୦୧୭ ସାଧାରଣ ନିର୍ବାଚନରେ ୬୮% ହୋଇଥିଲା। ଯାହା ବର୍ତ୍ତମାନ ୭% ଖସିଛି। ଅନେକ ଭୋଟର ଶ୍ରମିକ ଶ୍ରେଣୀର ଏବଂ ସେମାନେ ରୋଜଗାର ପାଇଁ ଭାରତ କିମ୍ବା ଅନ୍ୟ ଦେଶକୁ ଚାଲିଯାଇଥିବାରୁ ଭୋଟ ସଂଖ୍ୟା ହ୍ରାସ ପାଇଥିବା କୁହାଯାଉଛି। ଭୋଟ୍ ସମୟରେ ଏକ ସଂଘର୍ଷରେ ଜଣଙ୍କର ମୃତ୍ୟୁ ଘଟିଥିଲା। ଅନ୍ତିମ ଫଳାଫଳ ଘୋଷଣା କରିବାକୁ ଦୁଇ ସପ୍ତାହ ପର୍ଯ୍ୟନ୍ତ ସମୟ ଲାଗିପାରେ ବୋଲି ନେପାଳ ନିର୍ବାଚନ ଆୟୋଗ କହିଛି। 

Also Read: Uttar Pradesh Politics: ରାମପୁର ଉପନିର୍ବାଚନ ପୂର୍ବରୁ ଆଜାମ ଖାନଙ୍କୁ ଲାଗିଲା ଆଉ ଏକ ଝଟକା

ନିର୍ବାଚନ ପୂର୍ବରୁ କୌଣସି ମତଦାନ ହୋଇନଥିଲା, ଯଦିଓ ରାଜନୌତିକ ବିଶ୍ଳେଷକମାନେ ଆଶା କରୁଛନ୍ତି ଯେ, ନେପାଳ କଂଗ୍ରେସ କ୍ଷମତା ବଜାୟ ରଖିପାରେ। ରବିବାର ନେପାଳ ଲୋକସଭାର ୨୭୫ ସଦସ୍ୟ ଏବଂ ସାତୋଟି ବିଧାନସଭାର ୫୫୦ଟି ଆସନ ଚୟନ କରିବାକୁ ଫେଡେରାଲ ଏବଂ ପ୍ରାଦେଶିକ ସର୍ଭେ କରାଯାଇଥିଲା। ଭାରତର ମୁଖ୍ୟ ନିର୍ବାଚନ କମିଶନର ରାଜୀବ କୁମାରଙ୍କ ନେତୃତ୍ୱରେ ଭାରତର ନିର୍ବାଚନ ଆୟୋଗର ଏକ ପ୍ରତିନିଧୀ ଦଳ, ନେପାଳର ଅନେକ ମତଦାନ କେନ୍ଦ୍ର ପରିଦର୍ଶନ କରିଛନ୍ତି। ମତଦାନର ତଦାରଖ ପାଇଁ ଚାଳିଶଟି ସଂଗଠନକୁ ଦାୟିତ୍ୱ ଦିଆଯାଇଥିଲା ଯେଉଁଥିରେ ଭାରତ, ବାଂଲାଦେଶ, ଭୁଟାନ, ମାଲଦ୍ୱୀପ, ଶ୍ରୀଲଙ୍କା ଏବଂ ଦକ୍ଷିଣ କୋରିଆର ନିର୍ବାଚନ ଆୟୋଗର ଅଧିକାରୀମାନେ ସାମିଲ ଥିଲେ।

ରାଜୀବ କୁମାର ଭାରତୀୟ ଦଳର ନେତୃତ୍ୱ ନେଉଥିବାବେଳେ ବାଂଲାଦେଶର ପ୍ରତିନିଧି ଦଳର ନେତୃତ୍ୱ ମୁଖ୍ୟ ନିର୍ବାଚନ କମିଶନର କାଜି ହବିବୁଲ ଆୱାଲ ନେଇଥିଲେ। ସେହିଭଳି ଭୁଟାନ ସିଇସି ସୋନମ ଟପଗେ ଏବଂ ମାଳଦ୍ୱୀପ ନିର୍ବାଚନ ଆୟୋଗର ଅଧ୍ୟକ୍ଷ ଫୋୱାଡ ଥୋଫେକ, ନେପାଳରେ ହୋଇଥିବା ନିର୍ବାଚନର ତଦାରଖ କରିଥିଲେ। ଶ୍ରୀଲଙ୍କାର ଦୁଇ ନିର୍ବାଚନ କମିଶନର ଏମ.ଏମ ମହମ୍ମଦ ଏବଂ ଏସବି ଡିଭାରଟନେ ଏବଂ ଦକ୍ଷିଣ କୋରିଆ ନିର୍ବାଚନ କମିଶନର କିମ ୱାଙ୍ଗ-ବୋ ମଧ୍ୟ ମତଦାନର ତଦାରଖ କରିଥିଲେ। ନେପାଳରେ ଘରୋଇ କିମ୍ବା ବିଦେଶୀ ବ୍ୟକ୍ତି କିମ୍ବା ସଂଗଠନକୁ ନିର୍ବାଚନ ସହ ଜଡିତ କାର୍ଯ୍ୟର ତଦାରଖ କରିବାକୁ ଅନୁମତି ଅଛି। ତଦାରଖରେ ନିୟୋଜିତ ବ୍ୟକ୍ତି ଏବଂ ସଂଗଠନଗୁଡିକ ନିର୍ବାଚନର ବୈଧତା, ସ୍ୱାଧୀନତା, ନ୍ୟାୟ, ନିରପେକ୍ଷତା ଏବଂ ସମାନତା ଉପରେ ନଜର ରଖିଥିଲେ। 

Also Read: ଶିବସେନାର 'ଗୋମୂତ୍ର' ରାଜନୀତି, ସିନ୍ଦେଙ୍କ ପୂର୍ବରୁ ଏହି ମନ୍ତ୍ରୀଙ୍କୁ କରାଯାଇଛି ଅପମାନ