Mahua Moitra ଙ୍କ ପୂର୍ବରୁ କେଉଁ ସାଂସଦଙ୍କର ରଦ୍ଦ ହୋଇଛି ଲୋକସଭା ସଦସ୍ୟତା ଓ କାହିଁକି?

MP Lok Sabha membership: ସଂସଦରେ ଟଙ୍କା ନେଇ ପ୍ରଶ୍ନ ପଚାରିବା ମାମଲାରେ କାର୍ଯ୍ୟାନୁଷ୍ଠାନ ପରେ ଗୁରୁବାର ଦିନ ତୃଣମୂଳ କଂଗ୍ରେସ (ଟିଏମସି) ନେତା ମହୂଆ ମୈତ୍ରାଙ୍କ (Mahua Moitra) ଲୋକସଭା ସଦସ୍ୟତା ରଦ୍ଦ କରାଯାଇଛି । କିନ୍ତୁ ସେ ପ୍ରଥମ ଲୋକସଭା ସଦସ୍ୟ ନୁହଁନ୍ତି ଯାହାର ଲୋକସଭା ସଦସ୍ୟତା ରଦ୍ଦ ହୋଇଛି । ତାଙ୍କ ପୂର୍ବରୁ ରାହୁଲ ଗାନ୍ଧୀଙ୍କୁ ମଧ୍ୟ ଲୋକସଭାରୁ ବହିଷ୍କାର କରାଯାଇଥିଲା । ଆପଣଙ୍କୁ କହିରଖୁଛୁ ଯେ ଏକ ରିପୋର୍ଟ ଅନୁଯାୟୀ, ୧୯୮୮ ମସିହାରୁ ୪୨ ଜଣ ସାଂସଦଙ୍କୁ ବହିଷ୍କାର କରାଯାଇଛି, ସେଥିମଧ୍ୟରୁ ୧୪ ତମ ଲୋକସଭାରେ ଟଙ୍କା ନେଇ ପ୍ରଶ୍ନ ପଚାରିବା ମାମଲାରେ ୧୯ ଜଣ ସାଂସଦଙ୍କୁ ବହିଷ୍କାର କରାଯାଇଥିଲା ।

୧୯୮୫ ରେ ସଦସ୍ୟତା ହରାଇଥିଲେ କଂଗ୍ରେସ ସାଂସଦ 
୧୯୮୫ ରେ ଦଳବଦଳ ବିରୋଧୀ ଆଇନ କାର୍ଯ୍ୟକାରୀ ହେବା ପରେ କଂଗ୍ରେସ ସାଂସଦ ଲାଲଦୁହୋମାଙ୍କ ଲୋକସଭା ସଦସ୍ୟତା ପ୍ରଥମେ ରଦ୍ଦ ହୋଇଥିଲା, ଯିଏ ମିଜୋରାମ ବିଧାନସଭା ନିର୍ବାଚନ ପାଇଁ ମିଜୋ ନ୍ୟାସନାଲ ୟୁନିଅନର ପ୍ରାର୍ଥୀ ଭାବରେ ନିଜ ନାମାଙ୍କନପତ୍ର ଦାଖଲ କରିଥିଲେ ।

ଭିପି ସିଂଙ୍କ ମିଳିତ ମଞ୍ଚରେ ୯ ଜଣଙ୍କ ସଦସ୍ୟତା ରଦ୍ଦ ହୋଇଥିଲା 
ନବମ ଲୋକସଭାରେ ଯେତେବେଳେ ତତ୍କାଳୀନ ଜନତା ଦଳର ନେତା ଭିପି ସିଂ ଏକ ମିଳିତ ସରକାର ଗଠନ କରିଥିଲେ, ସେତେବେଳେ ନଅ ଜଣ ଲୋକସଭା ସଦସ୍ୟ ଦଳବଦଳ ବିରୋଧୀ ଆଇନ ଉଲ୍ଲଂଘନ କରିଥିବା ଅଭିଯୋଗ ହୋଇଥିଲା, ଯେଉଁଥିପାଇଁ ସେମାନେ ଅଯୋଗ୍ୟ ହୋଇଥିଲେ ।

ଦଶମ ଲୋକସଭାରେ ଚାରିଜଣ ସଦସ୍ୟ ସେମାନଙ୍କ ସାଂସଦ ପଦ ହରାଇଥିଲେ
ଦଶମ ଲୋକସଭାରେ ଯେତେବେଳେ ପ୍ରଧାନମନ୍ତ୍ରୀ ପି.ଭି ନରସିଂହ ରାଓ ଏକ ମିଳିତ ସରକାରର ନେତୃତ୍ୱ ନେଇଥିଲେ, ସେତେବେଳେ ଦଳବଦଳ ବିରୋଧୀ ଆଇନ ଅନୁଯାୟୀ ଚାରିଜଣ ସଦସ୍ୟଙ୍କୁ ଗୃହରୁ ଅଯୋଗ୍ୟ କରାଯାଇଥିଲା ।

୧୪ ତମ ଲୋକସଭାରେ ୧୦ ଜଣ ସଦସ୍ୟ ସଂସଦରେ ପ୍ରଶ୍ନ ପାଇଁ ଲାଞ୍ଚ ନେବା ଓ ୟୁପିଏ-1 ସରକାର ଚାହୁଁଥିବା ଟ୍ରଷ୍ଟ ଭୋଟ୍ ସମୟରେ କ୍ରସ୍ ଭୋଟ୍ ପାଇଁ ୯ ଜଣଙ୍କୁ ଗୃହରୁ ବରଖାସ୍ତ କରାଯାଇଥିଲା । ୨୦୦୫ ରେ, 'ପ୍ରଶ୍ନ ପଚାରିବା ପାଇଁ ଟଙ୍କା ନେବା' ମାମଲାରେ ବିଜେପିର ୬ ଜଣ ସଦସ୍ୟ, ବିଏସପିର ୨ ଜଣ ଓ କଂଗ୍ରେସ ଓ ଆରଜେଡିକୁ ଜଣେ ଲେଖାଁଏ ସଦସ୍ୟ ଲୋକସଭାରୁ ବହିଷ୍କୃତ ହୋଇଥିଲେ । ବିଏସପିରୁ ଜଣକୁ ମଧ୍ୟ ରାଜ୍ୟସଭା ସଦସ୍ୟ ପଦରୁ ବହିଷ୍କାର କରାଯାଇଥିଲା ।

ସୋନିଆ ଗାନ୍ଧୀ ମଧ୍ୟ ହରାଇଲେ ସଦସ୍ୟତା 
କେବଳ ଏତିକି ନୁହେଁ, ତତ୍କାଳୀନ କଂଗ୍ରେସ ସାଂସଦ ସୋନିଆଙ୍କୁ ଜାତୀୟ ପରାମର୍ଶଦାତା ପରିଷଦର ଅଧ୍ୟକ୍ଷ ପଦବୀ ଗ୍ରହଣ କରିବା ପାଇଁ ୨୦୦୬ ରେ ଲୋକସଭା ପଦ ଛାଡିବାକୁ ପଡିଥିଲା । ତାଙ୍କ ବ୍ୟତୀତ ଚାରା ଘୋଟାଲା ମାମଲାରେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଓ ଜେଡିୟୁ ସଦସ୍ୟ ଜଗଦୀଶ ଶର୍ମା ଦୋଷୀ ସାବ୍ୟସ୍ତ ହେବା ପରେ ଲୋକସଭାରୁ ସଦସ୍ୟତା ହରାଇଥିଲେ ।