Draupadi Murmu: ସାଧାରଣ ଦୁଇ ମହଲା କୋଠାରୁ ରାଷ୍ଟ୍ରପତି ଭବନ...

Draupadi Murmu: ପାର୍ଲାମେଣ୍ଟ ସେଣ୍ଟ୍ରାଲ ହବରେ ଶପଥ ଗ୍ରହଣ କରିଛନ୍ତି ଭାରତର ୧୫ତମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଓଡ଼ିଶା ମାଟିର ସୁଯୋଗ୍ୟ କନ୍ୟା ପ୍ରଥମ ଆଦିବାସୀ ରାଷ୍ଟ୍ରପତି  ହୋଇଛନ୍ତି। ୬୪ ବର୍ଷୀୟା ମୁର୍ମୁ ହେଉଛନ୍ତି ଦେଶର ସର୍ବକନିଷ୍ଠା, ପ୍ରଥମ ଜନଜାତି ସମ୍ପ୍ରଦାୟର ଏବଂ ଦେଶ ସ୍ବାଧୀନ ହେବା ପରେ ଜନ୍ମିତା ରାଷ୍ଟ୍ରପତି। ସାରା ଓଡ଼ିଶା ଆଜି ତାଙ୍କ ପାଇଁ ଗର୍ବିତ । ତେବେ  ରାଷ୍ଟ୍ରପତି ଭାବରେ ଶପଥ ନେବା ସହିତ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କର ଠିକଣା ବଦଳିଛି । ଦ୍ରୌପଦୀଙ୍କୁ ନେଇ ଆମେ ଆଜି ଏପରି କଥା କହିବୁ ଯାହା ଆପଣଙ୍କୁ ପ୍ରେରଣା ଯୋଗାଇବ ନିଶ୍ଚିତ।  

ଓଡ଼ିଶାର ମୟୂରଭଞ୍ଜ ଜିଲ୍ଲାର ଏକ ଛୋଟ ଘରେ ରହୁଥିବା ଦ୍ରୌପଦୀ ମୁର୍ମୁ ଏବେ ଶହ ଶହ ଏକରର ରାଷ୍ଟ୍ରପତି ଭବନରେ ରହିବେ । ମୁର୍ମୁଙ୍କ ଓଡ଼ିଶା ଘର ଉପରେ ନଜର ପକାଇଲେ ଆପଣ ସ୍ପଷ୍ଟ  ଜାଣିପାରିବେ ଏହା କୌଣସି ଭିଭିଆଇପି  ଘର ନୁହେଁ ଏକ ସାଧାରଣ ମଧ୍ୟବିତ୍ତ ପରିବାର ବସବାସ କରୁଥିବା ଘର। ୨ମହଲା ଘର ଯେଉଁଥିରେ ୬ଟି ରୁମ ରହୁଛି । ତେବେ ଏଠାରୁ ଏବେ ଦିଲ୍ଲୀର ରାଷ୍ଟ୍ରପତି ଭବନରେ ଯାଇ ବାସ କରିବେ ମୁର୍ମୁ । ଯେଉଁ ଭବନ କି ୩୩୦ ଏକର କ୍ଷେତ୍ରରେ ପର୍ଯ୍ୟବେଶିତ।  

ରାଷ୍ଟ୍ରପତି ଭବନରେ ୩୪୦ଟି ରୁମ ରହିଥିବା ବେଳେ କେବଳ ଗାର୍ଡେନ ଏରିଆ ହିଁ ୧୯୦ ଏକରର । ୭୫୦ କର୍ମଚାରୀ ଏଠାରେ  କାମ କରନ୍ତି । ଏବେ  ଏଠାରେ ରହିବେ ମ୍ୟାଡାମ ପ୍ରେସିଡେଣ୍ଟ ଦ୍ରୌପଦୀ ମୁର୍ମୁ। ଯାହାକି ସମଗ୍ର ଓଡ଼ିଶାରେ ଖୁସିର ଲହରୀ ଆଣିଦେଇଛି । ଏବେ ଭାରତର ଦୁଇ ଶ୍ରେଷ୍ଠ ସାମ୍ବିଧାନିକ ପଦବୀରେ ଥିବା ନେତା ସ୍ବାଧିନତା ପରେ ଜନ୍ମିତ। ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ସ୍ବାଧିନତା ପରେ ଜନ୍ମିତ ପ୍ରଥମ ପ୍ରଧାନ ମନ୍ତ୍ରୀ ହୋଇଥିଲେ ।  

ତେବେ ଆଜି ରାଷ୍ଟ୍ରପତି ଶପଥ ଗ୍ରହଣ ଉତ୍ସବରେ ଦ୍ରୌପଦୀ ମୁର୍ମୁଙ୍କ ଝିଅ, ପରିବାରର ଅନ୍ୟ ସଦସ୍ୟଙ୍କ ସହ ସହପାଠୀ ଓ ବନ୍ଧୁବାନ୍ଧବଙ୍କୁ ମିଶାଇ ୫୦ରୁ ଅଧିକ ଲୋକ ଉପସ୍ଥିତ ରହିଥିଲେ। ମୟୁରଭଞ୍ଜ ଜିଲ୍ଲାର ୬ ବିଜେପି ବିଧାୟକ ମଧ୍ୟ ଯୋଗ ଦେଇଥିଲେ । ସେହିପରି ଦ୍ରୌପଦୀଙ୍କ ଶପଥ ସମାରୋହରେ  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହିତ ଅନ୍ୟାନ୍ୟ କିଛି ରାଜ୍ୟର ମୁଖ୍ୟମନ୍ତ୍ରୀ ବି ସାମିଲ ହୋଇଥିଲେ । ପାର୍ଲାମେଣ୍ଟର ସେଣ୍ଟ୍ରାଲ ହଲରେ ଦ୍ରୌପଦୀ ମୁର୍ମୁଙ୍କ ଶପଥ ସମାରୋହରେ ଉପରାଷ୍ଟ୍ରପତି, ପ୍ରଧାନମନ୍ତ୍ରୀ, ପ୍ରଧାନ ବିଚାରପତି, ଲୋକସଭା ବାଚସ୍ପତି, କେନ୍ଦ୍ର ମନ୍ତ୍ରିମଣ୍ଡଳର ସଦସ୍ୟ, ବିଭିନ୍ନ ରାଜ୍ୟର ରାଜ୍ୟପାଳ ଓ ମୁଖ୍ୟମନ୍ତ୍ରୀ, ସାଂସଦ, ଭାରତ ସରକାରଙ୍କ ପ୍ରମୁଖ ସାମରିକ ଓ ବେସାମରିକ ଅଧିକାରୀ ବି ଉପସ୍ଥିତ ରହିଥିଲେ ।

ଏହା ବି ପଢ଼ନ୍ତୁ: ରାମନାଥ କୋବିନ୍ଦଙ୍କ ଉପରେ ଜୋରଦାର ଟାର୍ଗେଟ କଲେ ମେହବୁବା; କହିଲେ- ସମ୍ବିଧାନକୁ ଭାଙ୍ଗି ...