ରିଲ ବନାଇବା ପଡ଼ିଲା ମହଙ୍ଗା, ବିଦା ହେଲେ ବାଳୁଙ୍ଗା

କୋରାପୁଟ (ନିରଜ ଶତପଥୀ): ନବରଙ୍ଗପୁର (Nabarangpur) ଜିଲ୍ଲା ରାଇଘର (Raighar) ମୁଖ୍ୟ ଦପ୍ତରଠାରେ ଥିବା ପୂର୍ବତନ ବୋର୍ଡ ଉଚ୍ଚ ପ୍ରାଥମିକ ବିଦ୍ୟାଳୟର କିଛି ଛାତ୍ର ବିଦ୍ୟାଳୟ ସମୟରେ ରିଲ୍‌ ବନେଇବା ନିଶାରେ ଗୋଟାଏ ଛାତରୁ ଅନ୍ୟ ଏକ ଛାତକୁ ଡେଇଁବା ଭିଡିଓ ଏବେ ଭାଇରଲ୍ ହେବାରେ ଲାଗିଛି। ଅନ୍ୟପଟେ ବିଦ୍ୟାଳୟ ପ୍ରଧାନଶିକ୍ଷକ ଉକ୍ତ ଛାତ୍ରଙ୍କୁ ସ୍କୁଲ ଲିଭିଂ ସାର୍ଟିଫିକେଟ ଦେବା ପରେ ଅବିଭାବକ ମାନେ ଆସି ପିଲାଙ୍କ ପରୀକ୍ଷା ହେବା ପର୍ଯ୍ୟନ୍ତ ପିଲାମାନଙ୍କୁ ସ୍କୁଲରେ ରହିବାକୁ ଅନୁରୋଧ କରିଥିଲେ।

ଖବର ନେବାରେ ଜଣାପଡ଼ିଛି ଯେ ସ୍ଥାନୀୟ ପୂର୍ବତନ ବୋର୍ଡ ଉଚ୍ଚ ପ୍ରାଥମିକ ବିଦ୍ୟାଳୟରେ ଦିବ୍ୟାଙ୍ଗଙ୍କ ଏକ କାର୍ଯ୍ୟକ୍ରମ ଚାଲିଥିବା ବେଳେ ଦିନ ପ୍ରାୟ ୧୧ଟା ସମୟରେ କିଛି ପିଲା ସ୍କୁଲ ଛାତ ଉପରକୁ ଚଢି ଯାଇଥିଲେ। ସେହି ଛାତ ଉପରୁ ସେମାନଙ୍କ ମଧ୍ୟରୁ କିଛି ପିଲା ବିଦ୍ୟାଳୟ ପରିସର ବାହାରେ ଥିବା ଏକ ପରିତ୍ୟକ୍ତ ଏଏନଏମ କ୍ବାର୍ଟର୍ ଉପରକୁ ଡେଇଁବା ସମୟରେ ଭିଡିଓ ବନେଇ ଫେସବୁକ ଓ ଇନଷ୍ଟାଗ୍ରାମରେ ଅପଲୋଡ୍‌ କରିଥିଲେ। ଉକ୍ତ ଭିଡିଓ ଏବେ ମୋବାଇଲ ରୁ ମୋବାଇଲକୁ ଘୁରି ବୁଲିବା ପରେ ଏହି ଘଟଣାଟି ସ୍ଥାନୀୟ ସରକାରୀ ପୂର୍ବତନ ବୋର୍ଡ ଉଚ୍ଚ ପ୍ରାଥମିକ ବିଦ୍ୟାଳୟର ବୋଲି ଜଣାପଡିଥିଲା। ଏହି ଖବର ପ୍ରଚାର ହେବା ପରେ ପ୍ରଧାନଶିକ୍ଷକ ସୁଶଂକର ମିସ୍ତ୍ରୀ ଉକ୍ତ ଭିଡିଓ କରିଥିବା ୭ ଜଣ ଛାତ୍ରଙ୍କୁ ବିଦ୍ୟାଳୟକୁ ଡକାଇ ଟିସି ଦେଇଥିଲେ। ଏହି ୭ ଜଣ ଛାତ୍ରଙ୍କ ବ୍ୟତୀତ ବାହାର ବିଦ୍ୟାଳୟର ଛାତ୍ରମାନେ ବି ସାମିଲ୍ ଥିବା ପ୍ରଧାନଶିକ୍ଷକ ଶ୍ରୀ ମିସ୍ତ୍ରୀ ପ୍ରକାଶ କରିଥିଲେ। 

ଅପରପକ୍ଷରେ ପିଲାଙ୍କ ଭବିଷ୍ୟତ ନଷ୍ଟ ହେବାକୁ ଯାଉଥିବା ଜାଣିପାରି ଅବିଭାବକମାନେ ବିଦ୍ୟାଳୟରେ ପହଂଚି ପ୍ରଧାନଶିକ୍ଷକଙ୍କ ନିକଟରେ ନିଜ ନିଜ ପିଲାଙ୍କ ଭୁଲ୍ ସ୍ବୀକାର କରିବା ସହିତ ପରୀକ୍ଷା ଦେବା ପର୍ଯ୍ୟନ୍ତ ପିଲାମାନଙ୍କୁ ବାହାର ନ କରିବାକୁ ଅନୁରୋଧ କରିଥିଲେ। ପରେ ଏକ ବୈଠକରେ ସମସ୍ତଙ୍କୁ ଡକାଇ ସମାଧାନ ହେବା ପରେ ପିଲାମାନଙ୍କୁ ସ୍କୁଲରେ ରହିବାକୁ ନିଷ୍ପତି ନିଆଯାଇଥିଲା। ଏଠାରେ ସୂଚନାଯୋଗ୍ୟ ଯେ ଏକ ବିଦ୍ୟାଳୟ ପରିସରରେ ଏହି ପିଲାମାନଙ୍କୁ ଛାତ ଉପରକୁ ଚଢିବା ସମୟରେ କେହି ଶିକ୍ଷକ ଶିକ୍ଷୟିତ୍ରୀ ଦେଖି ପାରିଲେ ନାହିଁ କେମିତି ? ଏଥିସହିତ ଛାତ୍ର ଜଣକ ସ୍କୁଲ ଛାତ ଠାରୁ ଏଏନଏମ କ୍ବାର୍ଟର୍ ଛାତ ପ୍ରାୟ ୧୦ ଫୁଟ ଦୂର ଡିଆଁ ମାରିବା ସମୟରେ ଆଜବେଷ୍ଟ୍ ଭାଙ୍ଗି ଘର ଭିତରକୁ ଗଳି ପଡିଥିଲା। ଯଦି ଏହି ବିପଦପୂର୍ଣ୍ଣ ଡିଆଁରେ ଛାତ୍ରର କିଛି ଅଘଟଣ ଘଟିଥାନ୍ତା, ତେବେ ସେଥିପ୍ରତି କିଏ ଦାୟୀ ହୋଇଥାଆନ୍ତେ ବୋଲି ପ୍ରଶ୍ନ ଉଠୁଛି।