Shraddha Murder Case: આજે આફતાબનો નાર્કો ટેસ્ટ, શ્રદ્ધા હત્યા કેસના આરોપી પર હુમલાનો પ્રયાસ

નવી દિલ્હીઃ શ્રદ્ધા મર્ડર કેસના આરોપી આફતાબ અમિન પૂનાવાલાનો આજે નાર્કો ટેસ્ટ કરવામાં આવશે. જેના પર સૌ કોઈની નજર છે. જે રીતે આફતાબ તપાસ એજન્સીઓને સહકાર આપી રહ્યો છે એ જોતા પોલીસને પણ શંકા થઈ રહી છે. હાલ હત્યાનો આરોપી પોલીસની દરેક વાત માનવા કેમ તૈયાર થઈ રહ્યો છે એ પણ મોટી શંકા છે. શ્રદ્ધાની હત્યાના આરોપી આફતાબનો આજે રોહિણીની બાબા સાહેબ આંબેડકર હોસ્પિટલમાં નાર્કો ટેસ્ટ કરવામાં આવશે. ઉલ્લેખનીય છેકે, આરોપીના નાર્કો ટેસ્ટમાં ત્રણથી ચાર દિવસ લાગી શકે છે. દિલ્હીની સાકેત કોર્ટે આ બાબતની મંજુરી આપી દીધી છે.

આફતાબ દરેકે વાતે સંમત થતા પોલીસને શંકાઃ
તપાસમાં સામેલ એક અધિકારીએ ન્યૂઝ એજન્સી ANIને જણાવ્યું કે આફતાબ ખૂબ જ હોશિયાર છે અને તે ગમે ત્યારે કેસમાં નવો વળાંક આવી શકે છે. અત્યાર સુધી તે પોલીસનું પાલન કરી રહ્યો છે અને તપાસમાં સહકાર આપી રહ્યો છે. પોલીગ્રાફ અને નાર્કો ટેસ્ટ માટે પણ સંમત થયા. જ્યારે, પોલીસને તેના આ વર્તન બાબતે શંકાઓ વધી રહી છે.

કોન્ફીડન્ટથી આફતાબ આપી રહ્યો છે સવાલના જવાબઃ
પોલીસ સુત્રોમાંથી એવું પણ જાણવા મળ્યું છે કે આફતાબ પૂછપરછ દરમિયાન ખૂબ જ આત્મવિશ્વાસ ધરાવતો હતો. તેણે ખૂબ ઝડપથી અને હળવાશથી જવાબ આપ્યા. એવું લાગતું હતું કે તે તેના જવાબો અગાઉથી સમજી વિચારીને આપી રહ્યો હતો. પોલીસને શંકા છે કે સપ્ટેમ્બર-ઓક્ટોબરમાં જ્યારે આફતાબને મુંબઈ પોલીસે પૂછપરછ માટે બોલાવ્યો હતો, ત્યારે પણ શ્રદ્ધાના કેટલાક શરીરના અંગો તેના દિલ્હીના ફ્લેટમાં રાખેલા હતા.

આફતાબની નવી ગર્લફ્રેન્ડે નિવેદન લેવાયુંઃ
દિલ્હી પોલીસે આફતાબની નવી ગર્લફ્રેન્ડની પૂછપરછ કરી છે. તેણે કહ્યું કે શ્રદ્ધાની હત્યા કે તેના ટુકડા તેની સાથે તેને કોઈ લેવાદેવા નથી. યુવતીએ કહ્યું કે જ્યારે તે આફતાબને તેના ઘરે મળવા આવતી હતી, ત્યારે તેને તે પણ ખબર ન હતી કે આફતાબે શ્રદ્ધાના મૃતદેહના ટુકડા આ ઘરમાં રાખ્યા હતા.

આરોપ આફતાબનું થઈ શકે છે બેઈન મેપિંગઃ
ફોરેન્સિક સાયન્સ લેબોરેટરી (FSL)ની ટીમે નાર્કો ટેસ્ટ માટે તૈયારીઓ પૂર્ણ કરી લીધી છે. નાર્કો ટેસ્ટ દરમિયાન FSLની ટીમ સાથે તબીબો પણ હાજર રહેશે. અહેવાલો અનુસાર, જો નાર્કો ટેસ્ટ અનિર્ણિત રહે તો પોલીસ આફતાબનો બ્રેઈન મેપિંગ ટેસ્ટ કરાવવાની પણ માંગ કરી શકે છે.

બ્રેઈન મેપિંગ ટેસ્ટ શું છે?
શ્રદ્ધા હત્યા કેસના આરોપી આફતાબનો બ્રેઈન મેપિંગ ટેસ્ટ પણ થઈ શકે છે. આપણું મગજ અબજો ન્યુરોન્સનું બનેલું છે. આ ચેતાકોષો શરીરના તમામ ભાગોમાંથી મગજમાં સંદેશા પહોંચાડે છે અને મગજનો સંદેશ પણ શરીરના તમામ અંગો સુધી પહોંચાડો. આ સંદેશ તરંગોના રૂપમાં થાય છે બ્રેઈન મેપિંગ ટેસ્ટમાં આ તરંગોનું નિરીક્ષણ કરવામાં આવે છે. આ કારણે વ્યક્તિની માનસિક સ્વાસ્થ્યની સ્થિતિ અંગેની જાણકારી મેળવવામાં આવે છે.

પોલીગ્રાફ ટેસ્ટ બાદ પુનાવાલા પર હુમલાનો પ્રયાસઃ
પોલીગ્રાફ ટેસ્ટ પુરો થયા બાદ પોલીસ આરોપી આફતાબને લઈ જઈ રહી હતી ત્યારે તેને લઈ જતી વાન પર અજાણ્યા શખ્સો દ્વારા હુમલો કરવામાં આવ્યો. રોહિણી સ્થિત ફોરેન્સિક સાયન્સ લેબોરેટરી (FSL)ની બહાર પોલીસ વાન પર 4-5 લોકોએ હુમલો કરવાનો પ્રયાસ કર્યો હતો. તેઓના હાથમાં તલવારો હતી. પોલીસે આ હુમલાખોરોથી આફતાબને બચાવી લીધો હતો. પોલીસે જણાવ્યું હતું કે આરોપી આફતાબ સુરક્ષિત છે. એક હુમલાખોરે કહ્યું હતું કે 15 લોકો ગુરુગ્રામથી આવ્યા હતા. અને એફએસએલની બહાર બેઠા હતા. આ લોકો કારમાં ઘણી તલવારો અને હથોડા લઈને આવ્યા હતા. હુમલાખોરનું કહેવું છે કે અમારી બહેનના જેણે 35 ટુકડાઓ કર્યા છે, તે આફતાબના અમે 70 ટુકડાઓ કરવા આવ્યા હતા.

પોલીગ્રાફ ટેસ્ટનું પરિણામઃ
આફતાબને હત્યા કર્યાનો અફસોસ ન હોવાની કબૂલાત કરી. આફતાબનો પોલીગ્રાફ ટેસ્ટ પૂર્ણ થઈ ગયો છે, જેનો અંતિમ રિપોર્ટ તૈયાર કરવામાં આવી રહ્યો છે. મીડિયા રિપોર્ટ્સ અનુસાર પૂછપરછ દરમિયાન આફતાબે કબૂલ્યું છે કે તેણે શ્રદ્ધાની હત્યા કરી હતી. એમ પણ કહ્યું કે તેને શ્રદ્ધાની હત્યાનો કોઈ અફસોસ નથી. મીડિયા રિપોર્ટ્સમાં ટેસ્ટિંગ ટીમ સાથે જોડાયેલા સૂત્રોને ટાંકીને કહેવામાં આવ્યું છે કે આફતાબે આ હત્યા કરી છે. જે બાદ તેણે લાશના ટુકડા જંગલમાં ફેંકી દેવાની વાત કબૂલી લીધી છે. તેણે જણાવ્યું કે તેણે ડેટિંગ એપ દ્વારા ઘણી છોકરીઓ સાથે મિત્રતા કરી હતી. શ્રદ્ધાની હત્યા પહેલા અને તે પછી પણ તેના અન્ય યુવતીઓ સાથે સંબંધો હતા.