શંકર ચૌધરીના ફરી વિવાદિત બોલ, સ્ટેટ્સમાં મારી સાથેનો ફોટો મુકશો તો પોલીસ નહીં કરે હેરાન

Gujarat Elections 2022 અલ્પેશ ઠાકોર/બનાસકાંઠા : ચૂંટણીના દિવસો જેમ જેમ નજીક આવી રહ્યાં છે, તેમ તેમ ઉમેદવારો બેફામ બની રહ્યાં છે. ચૂંટણી પ્રચારમાં ઉમેદવારો બેફામ વાણીવિલાસ કરતા જોવા મળી રહ્યાં છે. મોંઘવારી, પેટ્રોલ જેવા મુદ્દાઓ તો બાજુમાં રહ્યાં, પરંતુ નેતાઓની આ નિવેદનબાજી જ સૌથી વધુ ચર્ચામા છે. આવામાં ભાજપના દિગ્ગજ નેતા શંકર ચૌધરી પણ વિવાદોમાં ઘેરાયેલા છે. હજી થોડા દિવસ પહેલા જ તેમણે વિવાદાસ્પદ નિવેદન આપ્યુ હતું. ત્યારે હવે તેમનો વધુ એક વિવાદિત વીડિયો સોશિયલ મીડિયામાં સામે આવ્યો છે. 

થરાદમાં ભાજપના ઉમેદવાર શંકર ચૌધરીનો વિવાદાસ્પદ વીડિયો હાલ સોશિયલ મીડિયામાં વાયરલ થયો છે. જેમાં એક જાહેર સભામાં સ્ટેજ ઉપરથી શંકર ચૌધરી કહી રહ્યાં છે કે, હું હાવ નામલો માણસ નથી હો ભાઈબંધી રાખવા જેવો છું. મારી સાથે ભાઈબંધી રાખશો ને તો અડધી રાતના હુંકારો દઈશ. એટલો તો ભરોસો રાખજો કે ખાલી સ્ટેટ્સમાં ફોટો મુકેલો હશે ને તો હાઇવે ઉપર કે ક્યાંય પોલીસ હેરાન નહિ કરે એમને એટલી તો ખબર પડે કે આ એના ભેગો ફોટો છે. 

તેમણે સભામાં એમ પણ કહ્યું કે, તમે મારી સાથે હોય અને ફરક એ પડે કે તમે મહેસાણામાં કે ક્યાંય રસ્તા ઉપર જતા હોય અને કોઈએ તમારી ગાડી રોકી હોય અને તમે એમ કહો કે થરાદથી શંકરભાઈને ત્યાંથી આવું છું, તો એ સેલ્યુટ મારીને કહે કે ‘સારું જવા દો.’ આ બાબતનું ગૌરવ મારે દરેકને આપવું છે.

ઉલ્લેખનીય છે કે તાજેતરમાં પણ ભાજપ નેતા શંકર ચૌધરીની ગર્ભિત ધમકી ચર્ચામાં આવી હતી. શંકર ચૌધરીએ કહ્યુ હતું કે, કાર્યકર્તા કે પ્રજા ને કોઈ રંજડવાનો પ્રયાસ કરશે તો એ દુશ્મનાવટ મારી સાથે કરી છે એમ માનજો, તમામને એ જ ભાષામાં જવાબ આપવામાં આવશે. કેટલાક લોકો થરાદની અંદર દાદાગીરીની ભાષાથી કામ કરે છે. કાર્યકર્તાઓને ફોન કરીને ધમકાવે છે તમે કેમ સ્ટેટસ ચડાવો છો તમે કેમ મિટિંગમાં ગયા છો. જે કાર્યકર્તાઓના દબાવવાળા લોકો હતા એમની સામે મેં કહ્યું છે. તમે કાર્યકર્તાઓને એકલા સમજીને ધમકી આપો છો કાર્યકર્તાઓ એકલા નથી હું તેમની સાથે છું.