Video: વિદ્યાર્થી વચ્ચેની મસ્તી બની ખતરનાક, એક છાત્રએ લાત મારીને બીજાને ચાલુ બસમાંથી ફેંકી દીધો બહાર

રાજકોટઃ ચાલુ બસમાં વિદ્યાર્થી વચ્ચે થતી મસ્તી અને ઝઘડો કેટલો ખતરનાક સાબિત થઈ શકે છે તેનો એક વીડિયો સોશિયલ મીડિયામાં વાઈરલ થયો છે. વીડિયો રાજકોટનો છે. સ્કૂલ બસમાં લગાવેલા સીસીટીવીમાં આ ઘટના કેદ થઈ છે જેમાં ચાલુ સ્કૂલ બસમાં એક વિદ્યાર્થી બીજા વિદ્યાર્થીને લાત મારે છે જેથી તે વિદ્યાર્થી દરવાજામાંથી બહાર પડી જાય છે. પહેલી જ સીટ પાસે આ બન્ને વિદ્યાર્થીઓ ઉભા છે ત્યારે એક વિદ્યાર્થી બીજા વિદ્યાર્થીને પાછળથી લાત મારે છે અને વિદ્યાર્થી બસના દરવાજામાંથી બહાર ફેંકાય જાય છે. બસનો દરવાજો ખુલ્લો હોવાથી આ વિદ્યાર્થી બહાર ફેંકાઈ જાય છે. જો કે તેમ છતાં ઘણીવાર સુધી બસ ચાલતી રહે છે. બાદમાં જાણ થતા ડ્રાઈવર બસને ઉભી રાખે છે.

આ વીડિયો રાજકોટની દિલ્હી પબ્લિક સ્કૂલની બસનો છે. સ્કૂલ સંચાલકોએ કબૂલ્યું છે કે આ વીડિયો તેમની સ્કૂલ બસનો છે અને દોઢ-બે મહિના પહેલા આ ઘટના બની હતી. હાલ આ વીડિયો સોશિયલ મીડિયામાં વાઈરલ થયો છે. આ વીડિયો ઘણો ખતરનાક છે. પહેલી નજરે જોનારના શ્વાસ પણ અધ્ધર થઈ શકે છે. ત્યારે સ્કૂલ બસમાં વિદ્યાર્થીઓની સુરક્ષાને લઈને પણ સવાલો થઈ રહ્યા છે. ચાલુ બસે સ્કૂલ બસનો દરવાજો જ ખુલ્લો હતો તે મોટી બેદરકારી ગણી શકાય.