Petrol-Diesel Price: ડીઝલના ભાવમાં લીટરે 25 રૂપિયાનો વધારો, પેટ્રોલના પણ વધી શકે છે ભાવ

નવી દિલ્હીઃ ગ્રાહકો માટે ફરી એકવાર મોંઘવારીમાં અધિકમાસ જેવા સમાચાર મળી રહ્યા છે. જથ્થાબંધ ગ્રાહકો માટે ડીઝલના ભાવમાં 25 રૂપિયા પ્રતિ લીટરનો વધારો કરવામાં આવ્યો છે. સૂત્રોએ આ માહિતી આપતા જણાવ્યું હતું કે જથ્થાબંધ ગ્રાહકોને વેચવામાં આવતા ડીઝલ 25 રૂપિયા પ્રતિ લિટર મોંઘું થયું છે. આંતરરાષ્ટ્રીય સ્તરે ક્રૂડ ઓઈલના ભાવમાં 40 ટકાના ઉછાળા બાદ આ પગલું લેવામાં આવ્યું છે. જો કે, પેટ્રોલ પંપ દ્વારા વેચાતા ડીઝલના છૂટક ભાવમાં કોઈ ફેરફાર કરવામાં આવ્યો નથી.

રિટેલિંગ કંપનીઓનું નુકસાન વધ્યું
આ મહિને પેટ્રોલ પંપના વેચાણમાં 20 ટકાનો ઉછાળો આવ્યો છે. બસ ફ્લીટ ઓપરેટરો અને મોલ્સ જેવા જથ્થાબંધ ઉપભોક્તાઓએ પેટ્રોલ પંપમાંથી ઇંધણ ખરીદ્યું છે. સામાન્ય રીતે તેઓ પેટ્રોલિયમ કંપનીઓ પાસેથી સીધું જ ઇંધણ ખરીદી કરે છે. તેનાથી ફ્યુઅલ રિટેલિંગ કંપનીઓની ખોટ વધી છે.

આ કારણે બંધ થઈ શકે છે પેટ્રોલ પંપ
સૌથી વધુ અસર નાયરા એનર્જી, જિયો-બીપી અને શેલ જેવી કંપનીઓને થઈ છે. વેચાણમાં વધારો થયો હોવા છતાં આ કંપનીઓએ હજુ સુધી જથ્થામાં ઘટાડો કર્યો નથી. પરંતુ હવે પંપ ચલાવવા માટે તે આર્થિક રીતે સધ્ધર રહેશે નહીં. આ બાબતની જાણકારી ધરાવતા ત્રણ સૂત્રોએ જણાવ્યું હતું કે રેકોર્ડ 136 દિવસથી ઈંધણના ભાવમાં વધારો થયો નથી, જેના કારણે કંપનીઓ માટે આ દરો પર વધુ ઈંધણ વેચવાને બદલે પેટ્રોલ પંપ બંધ કરવા તે વધુ વ્યવહારુ વિકલ્પ હશે.
 
રિટેલિંગ કંપનીઓનું નુકસાન વધ્યું
વર્ષ 2008માં રિલાયન્સ ઈન્ડસ્ટ્રીઝે તેના તમામ 1,432 પેટ્રોલ પંપ બંધ કર્યા પછી વેચાણ 'શૂન્ય' થઈ ગયું. આજે પણ આવી જ સ્થિતિ હોવાનું સૂત્રોએ જણાવ્યું હતું. જથ્થાબંધ ગ્રાહકો પેટ્રોલ પંપ પરથી ખરીદી કરી રહ્યા છે. જેના કારણે છૂટક વેપારીઓની ખોટ વધી રહી છે. મુંબઈમાં બલ્ક ગ્રાહકો માટે ડીઝલની કિંમત 122.05 રૂપિયા પ્રતિ લીટર થઈ ગઈ છે. પેટ્રોલ પંપ પર ડીઝલ 94.14 રૂપિયા પ્રતિ લીટરના ભાવે વેચાઈ રહ્યું છે.

આ રીતે દિલ્હીના પેટ્રોલ પંપો પર ડીઝલની કિંમત 86.67 રૂપિયા પ્રતિ લિટર છે, જ્યારે હોલસેલ અથવા ઔદ્યોગિક ગ્રાહકો માટે તેની કિંમત 115 રૂપિયા પ્રતિ લિટર છે. જાહેર ક્ષેત્રની પેટ્રોલિયમ કંપનીઓએ 4 નવેમ્બર, 2021થી પેટ્રોલ અને ડીઝલના ભાવમાં વધારો કર્યો નથી. જોકે, આ સમયગાળા દરમિયાન વૈશ્વિક સ્તરે ઈંધણના ભાવમાં ઉછાળો આવ્યો છે. એવું માનવામાં આવે છે કે પાંચ રાજ્યોની વિધાનસભા ચૂંટણીને ધ્યાનમાં રાખીને ઈંધણના ભાવમાં વધારો કરવામાં આવ્યો નથી.

રિટેલ પેટ્રોલ પંપ પર તેલની માંગ વધી
વિધાનસભા ચૂંટણીના પરિણામો 10 માર્ચે આવી ગયા છે, પરંતુ તે પછી પણ સંસદના બજેટ સત્રના બીજા તબક્કાના કારણે હાલમાં ભાવમાં વધારો થયો નથી. જથ્થાબંધ ગ્રાહકો અને પેટ્રોલ પંપના ભાવમાં રૂ. 25નો મોટો તફાવત હોવાને કારણે જથ્થાબંધ ગ્રાહકો પેટ્રોલ પંપ પરથી ઇંધણ ખરીદે છે.

તે પેટ્રોલિયમ કંપનીઓ પાસેથી સીધા ટેન્કર બુક કરાવતા નથી. જેના કારણે પેટ્રોલિયમ કંપનીઓનું નુકસાન વધ્યું છે. નાયરા એનર્જીએ આ સંબંધમાં મોકલેલા ઈ-મેઈલનો જવાબ આપ્યો ન હતો. Jio-BPએ કહ્યું કે રિટેલ આઉટલેટ્સ પર માંગમાં ભારે વધારો થયો છે. છૂટક અને ઔદ્યોગિક ભાવમાં પ્રતિ લિટર રૂ. 25ના તફાવતને કારણે જથ્થાબંધ ગ્રાહકો પણ છૂટક પેટ્રોલ પંપ પરથી ખરીદી કરી રહ્યા છે.

લેટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube