Old Vehicles: જૂની ગાડી વાપરનારાઓ થઈ જાઓ સાવધાન...ભરવો પડશે હવે આ ટેક્સ 

નવી દિલ્હી: દેશના રસ્તાઓ પર 15 વર્ષ કરતા પણ વધુ જૂના લગભગ 4 કરોડ વાહનો દોડી રહ્યા છે. આ બધી ગાડીઓ પર હવે ગ્રીન ટેક્સ લાગવાનો છે. આ મામલે કર્ણાટક ટોપ પર છે. ત્યાં આવી 70 લાખ જેટલી ગાડીઓ રસ્તા પર દોડે છે. 

2 કરોડ વાહનો 20 વર્ષથી જૂના
રોડ પરિવહન અને રાજમાર્ગ મંત્રાલયે દેશભરમાં ચાલી રહેલી આવી જૂની ગાડીઓના આંકડાને જાહેર કર્યા છે. આ આંકડામાં આંધ્ર પ્રદેશ, મધ્ય પ્રદેશ, તેલંગાણા અને લક્ષદ્વીપનો ડેટા સામેલ નથી. આ રાજ્યોના આંકડા હાલ ઉપલબ્ધ નથી. સરકારી આંકડા મુજબ દેશમાં 15 વર્ષથી જૂના 4 કરોડ વાહનો રસ્તા પર દોડી રહ્યા છે. જેમાંથી 2 કરોડ વાહનો  તો 20 વર્ષથી પણ વધુ જૂના છે. 

કર્ણાટક પ્રથમ અને ઉત્તર પ્રદેશ બીજા નંબરે
મંત્રાલયના જણાવ્યાં મુજબ જૂના વાહનોથી સૌથી વધુ પ્રદૂષણ ફેલાવનારા રાજ્યોમાં કર્ણાટક પહેલા નંબરે અને ઉત્તર પ્રદેશ બીજા સ્થાને છે. ઉત્તર પ્રદેશમાં આવા વાહનોની સંખ્યા 56.54 લાખ છે. જેમાંથી 24.55 લાખ વાહનો 20 વર્ષથી વધુ જૂના છે. દેશની રાજધાની દિલ્હી આ મામલે બીજા નંબરે છે. જ્યાં 15 વર્ષથી જૂના વાહનો 49.93 લાખ છે. 

આ રાજ્યોમાં દોડી રહ્યા છે 15 વર્ષ જૂના વાહન
કેરળમાં આવા વાહનોની સંખ્યા 34.64 લાખ, તામિલનાડુમાં 33.43 લાખ, પંજાબમાં 25.38 લાખ અને પશ્ચિમ બંગાળમાં 22.69 લાખ છે. મહારાષ્ટ્ર, ઓડિશા, ગુજરાત, રાજસ્થાન અને હરિયાણામાં આવા વાહનોની સંખ્યા 17.58 લાખથી 12.29 લાખ વચ્ચે છે. ઝારખંડ, ઉત્તરાખંડ, છત્તીસગઢ, હિમાચલ પ્રદેશ, પુડ્ડુચેરી, આસામ, બિહાર, ગોવા, ત્રિપુરા, દાદરા નગર હવેલી, અને દમણ-દીવમાં આવા વાહનોની સંખ્યા એક લાખથી 5.44 લાખ વચ્ચે છે. બાકી રાજ્યોમાં આવા વાહનોની સંખ્યા એક લાખથી ઓછી છે. 

કેન્દ્ર સરકાર ગ્રીન ટેક્સ લગાવવાની તૈયારીમાં
પ્રદૂષણ ફેલાવતા આવા જૂના વાહનો પર સરકાર ગ્રીન ટેક્સ લગાવવાની તૈયારી કરી રહી છે. રોડ પરિવહન અને રાજમાર્ગ મંત્રી નિતિન ગડકરીએ આ વર્ષે જાન્યુઆરીમાં પ્રદૂષણ ફેલાવતા જૂના વાહનો પર ગ્રીન ટેક્સ લગાવવાનો પ્રસ્તાવ રજુ કર્યો હતો. આ પ્રસ્તાવને રાજ્યો પાસે વિચાર વિમર્શ માટે મોકલી દેવાયો છે. તમામ રાજ્યો સાથે ચર્ચા વિચારણા બાદ આ પ્રસ્તાવ પર ઔપચારિક રીતે સર્ક્યુલર બહાર પાડવામાં આવશે. 

ફિટનેસ સર્ટિફિકેટના નવીનિકરણ વખતે ટેક્સ
આ પ્રસ્તાવ હેઠળ 8 વર્ષથી જૂના વાહનો પર ફિટનેસ સર્ટિફિકેટના નવીનિકરણ સમયે રોડ ટેક્સના 10થી 25 ટકા બરાબર ટેક્સ લગાવવામાં આવશે. પ્રાઈવેટ ગાડીઓ પર 15 વર્ષ બાદ નવીનિકરણ કરાવતી વખતે ગ્રીન ટેક્સ(Green Tax) લાગશે. સાર્વજનિક પરિવહન વાહનો જેમ કે બસો વગેરે પર ગ્રીન ટેક્સના દર ઓછા રહેશે. સૌથી વધુ પ્રદૂષિત શહેરોમાં 15 વર્ષથી વધુ જૂની ગાડીઓ પર રોડ ટેક્સના 50 ટકા જેટલો ગ્રીન ટેક્સ લગાવવાનો પ્રસ્તાવ છે. અત્રે જણાવવાનું કે કેટલાક પ્રદેશોમાં અત્યારે પણ ગ્રીન ટેક્સ લાગી રહ્યો છે પરંતુ બધી જગ્યાએ તેનો અલગ અલગ દર છે. જેને હવે એક સમાન કરવાની તૈયારી છે. 

(અહેવાલ-સાભાર ભાષા)

લેટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube