Photos: કચ્છ રણોત્સવ.. સંસ્કૃતિ અને પર્યટનનો અનોખો સંગમ, આ રીતે બદલાઈ ઉજ્જડ જમીનની રંગત

કચ્છનું રણ તેના સફેદ મીઠાના રણ, જીવંત સંસ્કૃતિ અને અદ્ભુત સૂર્યાસ્ત માટે પ્રખ્યાત છે. 2005માં ગુજરાતના તત્કાલિન મુખ્યમંત્રી નરેન્દ્ર મોદી દ્વારા શરૂ કરાયેલ વાર્ષિક રણ ઉત્સવએ આ પ્રદેશની કાયાપલટ કરી નાખી છે. કલા, પરંપરા અને પ્રકૃતિની આ ઉજવણીએ માત્ર સ્થાનિક અર્થતંત્રને વેગ આપ્યો નથી પરંતુ તેને વૈશ્વિક સાંસ્કૃતિક પ્લેટફોર્મમાં પણ પરિવર્તિત કર્યું છે. ટેન્ટ સિટીના મેનેજર અમિત ગુપ્તાએ જણાવ્યું હતું કે, રણ ઉત્સવ દરમિયાન તેની અનોખી સુગંધ કચ્છમાં સર્વત્ર અનુભવાય છે. કચ્છનો આત્મા કલા, સંસ્કૃતિ અને ખોરાકમાં પણ પ્રતિબિંબિત થાય છે. (All Photos: ANI)

ટેન્ટ સિટી આ ફેસ્ટિવલનું મુખ્ય આકર્ષણ છે. જે લાખો પ્રવાસીઓને આકર્ષે છે. ગયા વર્ષે, 7.42 લાખ પ્રવાસીઓએ તહેવારનો આનંદ માણ્યો હતો, જેનાથી કચ્છના હસ્તકલા અને ખાદ્યપદાર્થોના સ્ટોલ માટે કરોડો રૂપિયાની આવક થઈ હતી. આ વર્ષે પ્રવાસીઓ માટે 3-સ્ટાર સુવિધાઓ સાથે 400 ટેન્ટ ઉભા કરવામાં આવ્યા છે. ગુજરાત ટુરિઝમના મેનેજિંગ ડિરેક્ટર સડિંગપુઇ ચકચુઆકે જણાવ્યું હતું કે, “રન ઉત્સવ હવે સરકારી સહાય પર નિર્ભર નથી પરંતુ રેવન્યુ-સરપ્લસ ઇવેન્ટ બની ગયો છે.

આ ફેસ્ટિવલથી માત્ર પ્રવાસનને વેગ મળ્યો નથી પરંતુ સ્થાનિક સમુદાયોને પણ ફાયદો થયો છે. કચ્છના કારીગરોને તેમના ઉત્પાદનો માટે વૈશ્વિક પ્લેટફોર્મ મળ્યું છે. હેન્ડલૂમ અને હેન્ડીક્રાફ્ટની દુકાનો તેમજ સાંસ્કૃતિક કાર્યક્રમો પણ પ્રવાસીઓનું ધ્યાન ખેંચે છે. સ્થાનિક કલાકાર હંસરાજ ભટ કહે છે, "રણ ઉત્સવએ અમને અમારી કલા પ્રદર્શિત કરવાની તક આપી છે. અગાઉ અમારે કામ માટે બહાર જવું પડતું હતું, પરંતુ હવે આ ઉત્સવ અમારી આજીવિકાનો મુખ્ય સ્ત્રોત બની ગયો છે.

પ્રવાસીઓની સંખ્યામાં સતત વધારો થવાથી આ વિસ્તાર એક મુખ્ય પર્યટન સ્થળ બની ગયો છે. લંડનના પ્રવાસી ચાંદનીએ જણાવ્યું હતું કે, "અહી આવ્યા પછી સફેદ રણની સુંદરતાએ અમને મંત્રમુગ્ધ કરી દીધા હતા. કચ્છનું દરેક પાસું અનોખું છે."

દરમિયાન અન્ય પ્રવાસી કુણાલ ચંદારાણાએ જણાવ્યું હતું કે, "2001ના ભૂકંપ પછી કચ્છનો જે વિકાસ થયો છે તે પ્રશંસનીય છે. હવે અહીંના લોકો આત્મનિર્ભર બન્યા છે.