ZEE 24 કલાકના રિયાલિટી ચેકમાં અમદાવાદ મ્યુ. કમિશનરના દાવા પોકળ નીકળ્યા, જુઓ આ BRTS બસોને..

સોશિયલ ડિસ્ટન્સિંગનું પાલન કર્યા વગર BRTS ની બસોમાં ખીચોખીચ મુસાફરો ભરવામાં આવી રહ્યાં છે. મુસાફરોના ચેકીંગ માટે BRTS બસ સ્ટોપ પર કોઈ સ્ટાફ પણ ઉપસ્થિત નથી. 

ગાઈડલાઈનમાં મુસાફરોની બસમાં ઉભા ઉભા મુસાફરી કરવાની છૂટ નથી, છતાં સામાન્ય દિવસોની જેમ જ મોટી સંખ્યામાં લોકો ઉભા ઉભા મુસાફરી કરી રહ્યા છે.

બેઠક ક્ષમતાના અડધા મુસાફરોને બેસવા દેવાની તંત્રની વાત છે. ઉભા ઉભા મુસાફરી નહિ થઈ શકે તેવો નિયમ પણ રાખવામાં આવ્યો છે. ત્યારે અમદાવાદ મ્યુનિસિપલ તંત્રના સબ સલામતના દાવાના લીરેલીરા ઉડી રહેલા દરેક રસ્તા પર જોવા મળી રહ્યાં છે. 

આ બસ રસ્તા પરથી પસાર થાય છે, ત્યારે લાખો લોકો તેને જુએ છે. સરકારી અધિકારીઓ, ટ્રાફિક અધિકારીઓ દરેકનું ધ્યાન પડે છે, છતા કોઈ કાર્યવાહી કરાતી નથી. પરંતુ સામાન્ય પ્રજાને દંડ ભરાવવાનું તેઓ ચૂકતા નથી.