பெண் குழந்தைகளுக்கான சூப்பர் சேமிப்பு திட்டம்
'சுகன்யா சம்ரிதி யோஜனா' திட்டம் பெண் குழந்தைகளுக்கு உதவும் விதமாக செயல்பட்டு வருகிறது. இத்திட்டம் வீட்டில் பெண்கள் இருந்தால், அவர்கள் முதலீடு செய்வதற்கு ஏற்ற திட்டமாக இருக்கும்.
இதன் மூலமாக பெற்றோர்களால் தங்கள் பெண் குழந்தைகளின் எதிர்கால கல்வி மற்றும் திருமண செலவுகளுக்காக பணத்தை சேமிக்க முடியும். தமிழ்நாட்டில் செல்வமகள் சேமிப்புத் திட்டம் என்ற பெயரால் இந்த ஸ்கீம் செயல்படுத்தப்பட்டு வருகிறது.
ஒன்றிய அரசால் பெண் குழந்தைகளுக்காக பிரத்யேகமாக துவங்கப்பட்டது சுகன்யா சம்ரிதி யோஜனா திட்டம். இந்த திட்டத்தில் பெண் குழந்தை பிறந்து 10 வருடங்கள் வரை எப்போது வேண்டுமானாலும் பணத்தை முதலீடு செய்யலாம்.
அதிகபட்சமாக 1.5 லட்சம் மற்றும் குறைந்தபட்சமாக 250 ரூபாய் முதல் டெபாசிட் செய்து இத்திட்டத்தினை துவங்கலாம். பணத்தை 15 வருடங்களுக்கு முதலீடு செய்யும் போது, 21 வருடங்கள் கழித்து முதிர்ச்சி அடையும்.
பெண் குழந்தை 18 வயதை அடையும் போதும், கல்வி செலவுக்கு டெபாசிட் செய்த தொகையில் இருந்து பாதியை எடுத்து கொள்ளும் வசதியும் இத்திட்டத்தில் உள்ளது.
பெண் குழந்தைகள் பிறந்த பத்து ஆண்டுகளில் பெற்றோர்கள் அல்லது அதிகாரபூர்வ பாதுகாவலர்கள் செல்வ மகள் சேமிப்புத் திட்டத்தில் SSY ஓபன் பண்ணலாம். இந்த கணக்கை அதிகபட்சமாக ஒரு வீட்டில் இரண்டு பெண் பிள்ளைகளுக்கு மட்டுமே திறக்க இயலும்.
வேறெந்த திட்டத்திற்கும் இல்லாத அளவிற்கு தற்போது சுகன்யா சம்ரித்தி யோஜனாவிற்கு 8.2 சதவீத அளவில் வட்டி விகிதம் வழங்கப்பட்டு வருகிறது. சிறு சேமிப்பு திட்டங்களுக்கான வட்டி விகிதங்கள் அவ்வப்போது மாற்றப்படுவது வழக்கம்.