Independence Day 2023: ਬਨਵਾਰੀਲਾਲ ਪੁਰੋਹਿਤ ਪਰੇਡ ਗਰਾਊਂਡ 'ਚ ਲਹਿਰਾਉਣਗੇ ਤਿਰੰਗਾ, ਕਈ ਸੜਕਾਂ ਰਹਿਣਗੀਆਂ ਬੰਦ, ਦੇਖੋ ਬਦਲਵਾਂ ਰਸਤਾ

Independence Day 2023 Chandigarh News: ਚੰਡੀਗੜ੍ਹ ਵਿੱਚ 77ਵੇਂ ਸੁਤੰਤਰਤਾ ਦਿਵਸ (Independence Day 2023) ਦਾ ਪ੍ਰੋਗਰਾਮ ਸੈਕਟਰ 17 ਪਰੇਡ ਗਰਾਊਂਡ ਵਿੱਚ ਹੋਣਾ ਹੈ। ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਬਨਵਾਰੀਲਾਲ ਪੁਰੋਹਿਤ ਝੰਡਾ ਲਹਿਰਾਉਣਗੇ। ਪ੍ਰੋਗਰਾਮ ਵਿੱਚ ਆਪਣੇ-ਆਪਣੇ ਖੇਤਰਾਂ ਵਿੱਚ ਸ਼ਾਨਦਾਰ ਕੰਮ ਕਰਨ ਵਾਲੇ 23 ਵਿਅਕਤੀਆਂ ਨੂੰ ਸਨਮਾਨਿਤ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ ਚੰਡੀਗੜ੍ਹ ਪੁਲੀਸ ਦੇ ਕਈ ਅਧਿਕਾਰੀਆਂ ਤੇ ਕਰਮਚਾਰੀਆਂ ਨੂੰ ਵੀ ਸਨਮਾਨਿਤ ਕੀਤਾ ਜਾਣਾ ਹੈ।

ਪ੍ਰਸ਼ਾਸਨ ਨੇ ਪ੍ਰੋਗਰਾਮ ਲਈ ਪੰਜਾਬ ਰਾਜ ਭਵਨ ਤੋਂ ਸ਼ਹੀਦ ਮੈਮੋਰੀਅਲ ਪਾਰਕ ਅਤੇ ਸੈਕਟਰ 17 ਪਰੇਡ ਗਰਾਊਂਡ ਤੱਕ ਕਈ ਸੜਕਾਂ 'ਤੇ ਆਵਾਜਾਈ ਨੂੰ ਮੋੜ ਦਿੱਤਾ ਹੈ।

ਇਹ ਵੀ ਪੜ੍ਹੋ: Independence Day 2023: ਆਜ਼ਾਦੀ ਘੁਲਾਟੀਆਂ ਦੀਆਂ ਕੁਰਬਾਨੀਆਂ ਨੂੰ ਰਹਿੰਦੀ ਦੁਨੀਆਂ ਤੱਕ ਕੀਤਾ ਜਾਵੇਗਾ ਸਿਜਦਾ

ਅੱਜ ਕਈ ਸੜਕਾਂ ਬੰਦ ਰਹਿਣਗੀਆਂ, ਜੇਕਰ ਪਰੇਡ ਦੇਖਣੀ ਹੈ ਤਾਂ ਕੋਈ ਬਦਲਵਾਂ ਰਸਤਾ ਚੁਣੋ

-ਆਜ਼ਾਦੀ ਦਿਵਸ ਸਬੰਧੀ ਮੁੱਖ ਸਮਾਗਮ ਸੈਕਟਰ-17 ਸਥਿਤ ਪਰੇਡ ਗਰਾਊਂਡ ਵਿਖੇ ਹੋਵੇਗਾ। ਸਮਾਗਮ ਵਾਲੀ ਥਾਂ ਦੇ ਆਲੇ-ਦੁਆਲੇ ਸੁਰੱਖਿਆ ਦੇ ਸਖ਼ਤ ਪ੍ਰਬੰਧ ਹੋਣਗੇ। ਇਸ ਦੇ ਨਾਲ ਹੀ ਕੁਝ ਸੜਕਾਂ ਆਮ ਲੋਕਾਂ ਲਈ ਬੰਦ ਰਹਿਣਗੀਆਂ। ਚੰਡੀਗੜ੍ਹ ਟਰੈਫਿਕ ਪੁਲਿਸ ਨੇ ਇਸ ਸਬੰਧੀ ਐਡਵਾਈਜ਼ਰੀ ਜਾਰੀ ਕੀਤੀ ਹੈ। ਇਹ ਕਿਹਾ ਗਿਆ ਹੈ ਕਿ ਪੰਜਾਬ ਰਾਜ ਭਵਨ ਤੋਂ ਪਰੇਡ ਗਰਾਊਂਡ ਤੱਕ ਕੁਝ ਸੜਕਾਂ ਸਵੇਰੇ 6:30 ਵਜੇ ਤੋਂ ਪ੍ਰੋਗਰਾਮ ਖਤਮ ਹੋਣ ਤੱਕ ਲੋਕਾਂ ਲਈ ਬੰਦ ਰਹਿਣਗੀਆਂ।

ਇਹਨਾਂ ਰਸਤਿਆਂ ਤੋਂ ਬਚੋ
ਸੈਕਟਰ 16-17 ਅਤੇ ਸੈਕਟਰ 22-23 ਤੋਂ ਸੈਕਟਰ 22 ਗੁਰਦਿਆਲ ਸਿੰਘ ਪੈਟਰੋਲ ਪੰਪ, ਪੁਰਾਣੀ ਜ਼ਿਲ੍ਹਾ ਅਦਾਲਤ ਸੈਕਟਰ 17 ਤੋਂ ਸ਼ਿਵਾਲਿਕ ਵਿਹਾਰ ਹੋਟਲ, ਐਮਸੀ ਦਫ਼ਤਰ ਸੈਕਟਰ 17 ਤੋਂ ਪਰੇਡ ਗਰਾਉਂਡ ਸੜਕ ਬੰਦ ਰਹੇਗੀ। ਇਸ ਦੇ ਨਾਲ ਹੀ ਕੋਈ ਵੀ ਆਮ ਵਿਅਕਤੀ ਪ੍ਰੋਗਰਾਮ ਖਤਮ ਹੋਣ ਤੱਕ ਸੈਕਟਰ-22ਏ ਮਾਰਕੀਟ ਦੇ ਸਾਹਮਣੇ ਪਾਰਕਿੰਗ ਵਿੱਚ ਆਪਣੀ ਕਾਰ ਪਾਰਕ ਨਹੀਂ ਕਰ ਸਕੇਗਾ। ਪਰੇਡ ਗਰਾਊਂਡ ਸਮਾਗਮ ਵਿੱਚ ਸ਼ਾਮਲ ਹੋਣ ਵਾਲੇ ਮਹਿਮਾਨਾਂ ਨੂੰ ਕ੍ਰਿਕਟ ਸਟੇਡੀਅਮ ਚੌਕ ਅਤੇ ਸੈਕਟਰ 22 ਏ ਦੀਆਂ ਦੁਕਾਨਾਂ ਨੇੜੇ ਪਾਰਕ ਕਰਕੇ ਆਉਣਾ ਪਵੇਗਾ। ਆਮ ਲੋਕਾਂ ਨੂੰ ਸੈਕਟਰ-17 ਬੱਸ ਸਟੈਂਡ ਚੌਕ ਜਾਂ ਸੈਕਟਰ 17, 18 ਲਾਈਟ ਪੁਆਇੰਟ ਤੋਂ ਪਰੇਡ ਗਰਾਊਂਡ ਵੱਲ ਆਉਣ ਦੀ ਅਪੀਲ ਕੀਤੀ ਗਈ ਹੈ।

ਇੱਥੋਂ ਟਰੈਫਿਕ ਨੂੰ ਡਾਇਵਰਟ ਕੀਤਾ ਜਾਵੇਗਾ
ਆਮ ਲੋਕਾਂ ਦੀ ਆਵਾਜਾਈ ਨੂੰ ਸਵੇਰੇ 10.45 ਤੋਂ 11.30 ਵਜੇ ਤੱਕ ISBT-17 ਚੌਂਕ ਤੋਂ ਦੂਜੇ ਰੂਟਾਂ ਵੱਲ ਮੋੜ ਦਿੱਤਾ ਜਾਵੇਗਾ ਤਾਂ ਜੋ ਪ੍ਰੋਗਰਾਮ ਦੀ ਸਮਾਪਤੀ ਤੱਕ ਜਾਮ ਦੀ ਸਥਿਤੀ ਨਾ ਬਣੇ ਅਤੇ ਆਵਾਜਾਈ ਸੁਚਾਰੂ ਢੰਗ ਨਾਲ ਚਲਦੀ ਰਹੇ। ਸੈਕਟਰ 17, 18 ਲਾਈਟ ਪੁਆਇੰਟ, ਅਰੋਮਾ ਲਾਈਟ ਪੁਆਇੰਟ, ਸੈਕਟਰ 18, 19, 20, 21 ਚੌਕ ਅਤੇ ਕ੍ਰਿਕਟ ਸਟੇਡੀਅਮ ਚੌਕ ਤੋਂ ਟਰੈਫਿਕ ਨੂੰ ਡਾਇਵਰਟ ਕੀਤਾ ਜਾਵੇਗਾ। ਇਸ ਰੂਟ 'ਤੇ ਸਿਰਫ਼ ਬੱਸਾਂ ਨੂੰ ਚੱਲਣ ਦੀ ਇਜਾਜ਼ਤ ਹੋਵੇਗੀ। ਲੋਕਾਂ ਨੂੰ ਬਦਲਵੇਂ ਰਸਤੇ ਅਪਣਾਉਣ ਲਈ ਕਿਹਾ ਗਿਆ ਹੈ ਤਾਂ ਜੋ ਉਨ੍ਹਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਨਾ ਕਰਨਾ ਪਵੇ।

ਆਮ ਲੋਕਾਂ ਲਈ ਪਾਰਕਿੰਗ ਦੀ ਨਿਸ਼ਾਨਦੇਹੀ
ਪੁਲਿਸ ਨੇ ਸੁਤੰਤਰਤਾ ਦਿਵਸ ਪ੍ਰੋਗਰਾਮ ਦੇਖਣ ਆਉਣ ਵਾਲੇ ਆਮ ਲੋਕਾਂ ਲਈ ਪਾਰਕਿੰਗ ਦੀ ਨਿਸ਼ਾਨਦੇਹੀ ਕੀਤੀ ਹੈ। ਸੈਕਟਰ 22ਬੀ ਪਾਰਕਿੰਗ ਏਰੀਆ, ਸਰਕਸ ਗਰਾਊਂਡ ਸੈਕਟਰ 17 ਦੀ ਪਾਰਕਿੰਗ, ਨੀਲਮ ਸਿਨੇਮਾ ਦੇ ਨਾਲ ਲੱਗਦੀ ਪਾਰਕਿੰਗ ਅਤੇ ਸੈਕਟਰ 17 ਵਿੱਚ ਮਲਟੀ ਲੈਵਲ ਪਾਰਕਿੰਗ ਵਿੱਚ ਆਮ ਲੋਕ ਆਪਣੇ ਵਾਹਨ ਪਾਰਕ ਕਰ ਸਕਦੇ ਹਨ।

ਸ਼ਾਮ 4 ਵਜੇ ਤੋਂ ਪੰਜਾਬ ਅਤੇ ਹਰਿਆਣਾ ਰਾਜ ਭਵਨ ਵਿਖੇ ਘਰੇਲੂ ਸਮਾਗਮ ਕਰਵਾਇਆ ਜਾਵੇਗਾ। ਇਸ ਦੌਰਾਨ ਸੈਕਟਰ 5-6 ਅਤੇ 7-8 ਚੌਕ ਤੋਂ ਵਿਗਿਆਨ ਮਾਰਗ ’ਤੇ ਵਨ-ਵੇ ਸਿਸਟਮ ਲਾਗੂ ਕੀਤਾ ਜਾਵੇਗਾ। ਪੰਜਾਬ ਰਾਜ ਭਵਨ ਦੇ ਸਾਹਮਣੇ ਵਾਲੀ ਸੜਕ ਸੈਕਟਰ 5-6 ਅਤੇ 7-8 ਤੋਂ ਲੈ ਕੇ ਸੁਖਨਾ ਮਾਰਗ 'ਤੇ ਸਥਿਤ ਵਿਗਿਆਨ ਮਾਰਗ ਅਤੇ ਚੰਡੀਗੜ੍ਹ ਗੋਲਫ ਕਲੱਬ ਦੇ ਟੀ ਪੁਆਇੰਟ ਤੱਕ ਬੰਦ ਰਹੇਗੀ। ਇਸੇ ਤਰ੍ਹਾਂ ਹਰਿਆਣਾ ਰਾਜ ਭਵਨ ਤੋਂ ਗੁਰਸਾਗਰ ਸਾਹਿਬ ਗੁਰਦੁਆਰਾ ਟਰਮ ਪੁਆਇੰਟ ਤੱਕ ਸੜਕ ਬੰਦ ਰਹੇਗੀ।

ਇਹ ਵੀ ਪੜ੍ਹੋ: Independence Day 2023: CM ਭਗਵੰਤ ਮਾਨ ਅੱਜ ਪਟਿਆਲਾ 'ਚ ਲਹਿਰਾਉਣਗੇ ਤਿਰੰਗਾ, ਟਵੀਟ ਕਰ ਦਿੱਤੀ ਦੇਸ਼ ਵਾਸੀਆਂ ਨੂੰ ਵਧਾਈ

ਕਿਹਾ ਜਾ ਰਿਹਾ ਹੈ ਕਿ ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਚੰਡੀਗੜ੍ਹ ਪੁਲਿਸ ਦੇ ਦੋ ਅਧਿਕਾਰੀਆਂ ਨੂੰ ਰਾਸ਼ਟਰਪਤੀ ਪੁਲਿਸ ਮੈਡਲ ਪ੍ਰਦਾਨ ਕਰਨਗੇ। ਅਧਿਕਾਰੀਆਂ ਨੂੰ ਇਹ ਸਨਮਾਨ ਸੁਤੰਤਰਤਾ ਦਿਵਸ ਮੌਕੇ ਉਨ੍ਹਾਂ ਦੀਆਂ ਸ਼ਾਨਦਾਰ ਸੇਵਾਵਾਂ ਬਦਲੇ ਦਿੱਤਾ ਜਾਵੇਗਾ। ਇਨ੍ਹਾਂ ਵਿੱਚ ਟਰੈਫਿਕ ਪੁਲਿਸ ਵਿੱਚ ਸੇਵਾ ਨਿਭਾਅ ਰਹੇ ਡੀਐਸਪੀ ਗੁਰਜੀਤ ਕੌਰ ਅਤੇ ਸਬ-ਇੰਸਪੈਕਟਰ ਪਰਮਿੰਦਰ ਜੀਤ ਸਿੰਘ ਸ਼ਾਮਲ ਹਨ।

ਗੁਰਜੀਤ ਕੌਰ ਅਪਰੈਲ 1990 ਵਿੱਚ ਪੁਲੀਸ ਵਿਭਾਗ ਵਿੱਚ ਏਐਸਆਈ ਵਜੋਂ ਭਰਤੀ ਹੋਈ ਸੀ। ਜਦਕਿ ਪਰਮਿੰਦਰ ਜੀਤ ਸਿੰਘ ਅਪ੍ਰੈਲ 1987 ਵਿੱਚ ਕਾਂਸਟੇਬਲ ਵਜੋਂ ਭਰਤੀ ਹੋਇਆ ਸੀ। ਪਰਮਿੰਦਰ ਜੀਤ ਸਿੰਘ ਇਸ ਵੇਲੇ ਓਐਸਡੀ ਵਿਜੀਲੈਂਸ ਹਨ।

ਚੰਡੀਗੜ੍ਹ ਪੁਲਿਸ ਦੇ 10 ਪੁਲਿਸ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਨੂੰ ਮੈਡਲ ਦਿੱਤੇ ਜਾਣਗੇ
ਚੰਡੀਗੜ੍ਹ ਪੁਲਿਸ ਦੇ 10 ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਨੂੰ ਸੋਨੇ, ਚਾਂਦੀ ਅਤੇ ਕਾਂਸੀ ਦੇ ਤਗਮਿਆਂ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਡੀਜੀਪੀ ਪ੍ਰਵੀਰ ਰੰਜਨ ਨੇ ਇਨ੍ਹਾਂ ਹਵਾਲਿਆਂ ਲਈ ਨਾਵਾਂ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਐਸਪੀ ਸਿਟੀ ਮ੍ਰਿਦੁਲ, ਡੀਐਸਪੀ ਸ੍ਰੀ ਪ੍ਰਕਾਸ਼ ਅਤੇ ਐਸਆਈ ਮਹਿੰਦਰ ਸਿੰਘ (ਮਰਨ ਉਪਰੰਤ) ਨੂੰ ਸੋਨੇ ਦੇ ਤਗਮੇ ਦਿੱਤੇ ਜਾਣਗੇ। ਇਸ ਦੇ ਨਾਲ ਹੀ ਚਾਂਦੀ ਦੇ ਤਗਮੇ ਲਈ ਡੀਐਸਪੀ ਜਸਵਿੰਦਰ ਕੌਰ, ਏਐਸਆਈ ਜੋਗਿੰਦਰ ਸਿੰਘ ਅਤੇ ਹੌਲਦਾਰ ਵੀਰ ਸਿੰਘ ਦੇ ਨਾਂ ਸ਼ਾਮਲ ਹਨ। ਇਨ੍ਹਾਂ ਤੋਂ ਇਲਾਵਾ ਕਾਂਸੀ ਦੇ ਤਗਮੇ ਲਈ ਐਸਆਈ ਰਮੇਸ਼ ਕੁਮਾਰ, ਐਸਆਈ ਜਗਦੇਵ ਕੁਮਾਰ, ਏਐਸਆਈ ਵਰਿੰਦਰ ਚੌਹਾਨ ਅਤੇ ਕਾਂਸਟੇਬਲ ਨਿੱਕੀ ਦੇ ਨਾਂ ਸ਼ਾਮਲ ਹਨ।