ଅଲୋଡା ଏଡସ ରୋଗୀଙ୍କ ମୃତଦେହ, ସତ୍କାର ପାଇଁ 'ସମ୍ବଳ' ସାହା

ଜସ୍ମିନ ରେଖା ମହନ୍ତ, ଭୁବନେଶ୍ୱର: ୩୩ ଘଣ୍ଟା ଧରି ପଡିରହିଥିବା ଜଣେ ଏଡସ ରୋଗୀଙ୍କ ମୃତଦେହକୁ ସତ୍କାର କରିବା ପାଇଁ ଆଗେଇ ଆସିଲା ସମ୍ବଲପୁରର ସ୍ୱେଚ୍ଛାସେବୀ ଅନୁଷ୍ଠାନ ସମ୍ବଳ । ମେଡିକାଲ ପରିସରରୁ ଶବ ନେଇ ରାଜଘାଟରେ ସତ୍କାର କରାଯାଇଛି । ଅନୁଷ୍ଠାନର ଏପରି କାର୍ଯ୍ୟକୁ ସମସ୍ତେ ପ୍ରଂଶସା କରିଛନ୍ତି । 

ଏଡସ ରୋଗକୁ ନେଇ ଏବେ ବି ଆମ ଭିତରେ ରହିଛି ଅନେକ ଭୟ ଏବଂ ଘୃଣା । ଯେଉଁଥିପାଇଁ ତ ଜଣେ ଏଡସ ରୋଗୀଙ୍କ ମୃତ୍ୟୁ ପରେ ମୃତଦେହ ଉଠାଇବା ପାଇଁ କେହି ଆସିନଥିଲେ । ୩୩ ଘଣ୍ଟା ଧରି ପଡି ରହିଥିଲା ମୃତଦେହ । 

ପୁରା ଘଟଣା ଥିଲା ଏପରି । ଗତ ୨୩ ତାରିଖରେ ଜଣେ ଏଡସ ରୋଗୀଙ୍କ ଆଖିରେ ଟିଉମର ଅପରେସନ କରିବା ପାଇଁ ବୁର୍ଲା ଭୀମସାରର ମେଡ଼ିସିନ ୱାର୍ଡ ୟୁନିଟ -୨ରେ ଭର୍ତ୍ତି କରାଯାଇଥିଲା । ଗତ ୩ ତାରିଖ ସକାଳ ୮ଟାରେ ଚିକିତ୍ସିତ ଅବସ୍ଥାରେ ତାଙ୍କ ମୃତ୍ୟୁ ହୋଇଥିଲା । 
ଖୋଦ ମୃତକଙ୍କ ପରିବାର ବର୍ଗ ମଧ୍ୟ ମୃତଦେହ ଛାଡି ଚାଲିଯାଇଥିଲେ । ୩୩ ଘଣ୍ଟା ଧରି 
ବୁର୍ଲା ଭୀମସାରର ଶବଗୃହରେ ପଡିରହିଥିଲା ମୃତଦେହ । ପୋଲିସ ପରିବାର ଲୋକଙ୍କୁ ଖବର ଦେଇଥିଲା । ହେଲେ ମୃତଦେହ ନେବାକୁ କେହି ମଧ୍ୟ ଆସିନଥିଲେ । 

ଶେଷରେ ସହାୟତାର ହାତ ବଢାଇଲା ସମ୍ବଲପୁରର ସ୍ୱେଚ୍ଛାସେବୀ ଅନୁଷ୍ଠାନ 'ସମ୍ବଳ' । ଅନୁଷ୍ଠାନର ସଦସ୍ୟମାନେ ମୃତଦେହକୁ ରାଜଘାଟ ନେଇ ସତ୍କାର କଲେ । ଏପର୍ଯ୍ୟନ୍ତ ୪ଶହରୁ ଅଧିକ ଶବ ସତ୍କାର କରିସାରିଛି ଏହି ଅନୁଷ୍ଠାନ । ଯେଉଁ ଲୋକର କେହି ନାହିଁ, ତାଙ୍କ ମୃତ୍ୟୁ ପରେ ଶବ ସତ୍କାର କରିଥାନ୍ତି ଅନୁଷ୍ଠାନର ସଦସ୍ୟ । ତେବେ ଜଣେ ଏଡସ ରୋଗୀଙ୍କ ମୃତ ଦେହ ସତ୍କାର ପରେ ବିଭିନ୍ନ ମହଲରେ ପ୍ରଂଶସା କରାଯାଇଛି ।