દક્ષિણ કોરિયા : મોટેલમાં રોકાવા માટે ન આપ્યો રૂમ તો ગુસ્સે થઈને લગાવી આગ, 5ના મોત

નવી દિલ્હી : દક્ષિણ કોરિયાની રાજધાની સિઓલમાં એક મોટેલમાં આગ લાગતા પાંચ વ્યકિત્ઓના મૃત્યુ થઈ ગયા છે. આ ઘટનામાં 4 વ્યક્તિ ગંભીર રીતે ઘાયલ થઈ ગઈ છે. આ ઘાયલોની હોસ્પિટલમાં સારવાર ચાલી રહી છે. આ મામલામાં પોલીસે આગ લગાવનાર વ્યક્તિને ધરપકડ કરી લીધી છે. મળતી માહિતી પ્રમાણે આરોપી વ્યક્તિએ ગુસ્સામાં આ ઘટનાને અંજામ આપ્યો છે. આરોપી ડિલીવરી બોયનું કામ કરે છે અને તેની વય 53 વર્ષની આસપાસ છે. 

હોટલમાં ન મળ્યો રૂમ તો લગાવી આગ
મળતી માહિતી પ્રમાણે આરોપી બે માળની મોટેલમાં રૂમ લેવા ગયો હતો પણ તે નશામાં ધુત હતો. આ સંજોગોમાં મોટેલના કર્મચારીઓએ રૂમ આુપવાની ના પાડી દીધી હતી. આ મામલે કર્મચારી તેમજ આરોપી વચ્ચે લાંબો સમય તકરાર થઈ હતી અને આરોપી ઘટનાસ્થળથી રવાના થઈ ગયો હતો. 

પેટ્રોલ નાખીને લગાવી આગ
આ ઘટનાને નજરે જોનાર વ્યક્તિએ માહિતી આપી છે કે રૂમ ન મળવાથી નારાજ વ્યક્તિ ઝઘડા પછી મોટેલમાંથી ચાલ્યો ગયો હતો. તે પાસેના સર્વિસ સ્ટેશનથી ઓછામાં ઓછું 10 લિટર પેટ્રોલ લાવ્યો હતો. તેણે આ પેટ્રોલ ગ્રાઉન્ડ ફ્લોર પર નાખ્યું અને આગ લગાવી દીધી. આ આગ મોટેલમાં ઝડપથી ફેલાઈ ગઈ હતી. આ ઘટના વિશે પોલીસ અને ફાયરને જાણ કરવામાં આવી અને તેમણે માંડમાંડ આગ કંટ્રોલમાં લીધી. આ ઘટનામાં પાંચના મોત થયા છે અને ચાર લોકોને બચાવી લેવાયા છે. જોકે જે લોકોને બચાવાયા છે તેમની હાલત બહુ ગંભીર છે.