Jeep ભારતમાં પોતાની સૌથી નાની અને સસ્તી SUV કરશે લોન્ચ, Venue અને Sonet ને આપશે ટક્કર

નવી દિલ્હીઃ સબકોમ્પેક્ટ SUV ઓટોમોબાઈલ ઉદ્યોગના સૌથી ઝડપથી વિકસતા સેગમેન્ટમાંનું એક છે. સતત નવા લોન્ચિંગને કારણે તેનું માર્કેટ ખૂબ જ ગરમ છે. વધતી માગને ધ્યાનમાં રાખીને, જીપ અને એમજી જેવી કાર ઉત્પાદકો સબ-4-મીટર SUV સ્પેસમાં પ્રવેશવાનું આયોજન કરી રહી છે. અમેરિકન SUV નિર્માતા 2022ની શરૂઆતમાં 7-સીટર SUV જીપ મેરિડીયન લોન્ચ કરવા માટે તૈયાર છે. જે બાદ કંપની સબકોમ્પેક્ટ SUV લોન્ચ કરવાની યોજના ધરાવે છે. જોકે આ SUVનું સત્તાવાર નામ અને વિગતો હજુ સુધી જાહેર કરવામાં આવી નથી.

એન્જીન અને પાવર-

મળતા માહિતી મુજબ નવી જીપ કોમ્પેક્ટ SUV ગ્રુપ PSAના સીએમપી (કોમન મોડ્યુલર પ્લેટફોર્મ) પર બનાવવામાં આવશે. જે 90%થી વધુ સ્થાનિક રીતે મેળવેલા ઘટકો સાથે વિકસાવવામાં આવ્યું છે. આ જ પ્લેટફોર્મનો ઉપયોગ નવી Citroen C3 હેચબેકમાં કરવામાં આવ્યો છે જે 2022ની શરૂઆતમાં લૉન્ચ થવાની છે. આ SUVમાં 1.2-લિટર ટર્બો પેટ્રોલ એન્જીન છે જે 100 bhpનો પાવર જનરેટ કરે છે.

વિશેષતા-

અફવા એવી છે કે જીપની નાની SUV તેના સેગમેન્ટમાં AWD (ઓલ-વ્હીલ ડ્રાઇવ) સિસ્ટમ ઓફર કરતી પ્રથમ હશે. આ મોડેલ લાઇનઅપમાં પ્રમાણભૂત ફિટમેન્ટ તરીકે આવી શકે છે. નવી જીપ કોમ્પેક્ટ એસયુવીની ડિઝાઇન અને ફીચરની વિગતો હજુ જાહેર કરવામાં આવી નથી. તે બ્રાન્ડની સિગ્નેચર 7-સ્લેટ ગ્રિલ, LED DRLs સાથે LED હેડલેમ્પ્સ, સ્પોર્ટી બ્લેક ક્લેડીંગ, એલોય વ્હીલ્સ અને LED ટેલલેમ્પ્સ મેળવવાની શક્યતા છે.

કિંમત-

નવી જીપ કોમ્પેક્ટ એસયુવી દેશમાં અમેરિકન ઓટોમેકરની સૌથી સસ્તી એસયુવી હશે. આ મોડલ CMP પ્લેટફોર્મ પર બનાવવામાં આવી રહી હોવાથી, તે કાર નિર્માતાને તેની કિંમતો પોસાય તેવી રાખવામાં મદદ કરશે. એન્ટ્રી-લેવલ વેરિઅન્ટ માટે તેની કિંમત લગભગ 10 લાખ અને ટોપ-એન્ડ મોડલ માટે 13 લાખ સુધી જવાની ધારણા છે.

સ્પર્ધા-

આ કાર ભારતની સૌથી નાની જીપ એસયુવી પણ હશે. જો કે તેની સાઈઝ કેટલી હશે તેના આંકડા હજુ જાહેર કરવામાં આવ્યા નથી. લૉન્ચ કર્યા પછી, ભારતીય બજારમાં જીપની નવી નાની એસયુવી હ્યુન્ડાઈ વેન્યુ, કિયા સોનેટ, મારુતિ વિટારા બ્રેઝા, મહિન્દ્રા XUV300 અને ટાટા નેક્સન સાથે સ્પર્ધા કરશે.